Yezekele 32:1-32
32 Muna mvu una wa 12,* muna ngonde ya 12, muna lumbu kiantete kia ngonde, e diambu dia Yave dizidi diaka kwa mono, oku vo:
2 “E mwan’a muntu, bonga e mbembo* mu kuma kia Faro wa ntinu a Engipito, umvovesa vo:
‘Ongeye wakala nze mwan’a nkosi ankuma* a zula,Kansi obutameso.
Wakala nze vangwa kiansisi kia mbu,+ wasakatanga muna nkoko miaku,Wanikunanga o maza muna tambi yaku yo timvuna* e nkoko.’
3 I wau wuwu kavovele o Mfumu Yave:
‘Isadila buka kia zula yayingi mu kutuba e konde diame,
Oyau bekubaka muna konde diame.
4 Ikusisa vana ntoto;Ikuveta muna nzanza.
Iyambula vo e nuni zawonso za zulu ziza bela omu ngeye,Iyukutisa e bulu ya mfuta ya nza yawonso muna nsuni miaku.+
5 Veta iveta e nsuni miaku vana miongoYo zadisa e ndimba ye nsadidila zaku.+
6 Iyondeleka o ntoto yo menga maku yamuna miongo,O menga mezadisa e nkoko.’*
7 ‘Vava ofwaswa, ifuka e zulu yo bukika e ntetembwa zandi e tombe.
Ifukila e ntangwa o matuti,E ngonde ke ivana miezi miandi ko.+
8 Mu kuma kiaku, izima e mini yawonso ikezimanga kuna zulu,Ifuka e nsi aku ye tombe,’ u kavovele o Mfumu Yave.
9 ‘Imwesa e ntima mia nkangu miayingi e mpasi vava inata akaka muna nkangu aku muna zula yankaka se nkole,Kuna nsi zina kuzeye ko.+
10 Isivikisa e nkangu miayingi,E ntinu miau mizakama yo wonga vava isadila o nsosolo ame vana ntadisi au mu kutumba.
Bekwamanana zakama, konso muntu omona o wonga mu kuma kia moyo andi,Muna lumbu kina ofwaswa.’
11 Kadi i wau wuwu kavovele o Mfumu Yave:
‘O nsosolo a ntinu a Babele ukulwakila.+
12 Iyambula vo o ulolo wa nkangu aku wafwila muna nsosolo mia makesa mankuma,Yau awonso bena se zula isundidi o nsoki.+
Bekulula o umvuania wa Engipito, o nkangu andi wawonso ufukiswa.+
13 Fwasa ifwasa e twelezi yandi yawonso idilanga vana ndambu a maza mayingi,+Ke vekala diaka tambi kia muntu ko ngatu kole dia bulu ditimvuna* o maza.’+
14 ‘Muna ntangwa yayina, ivelelesa o maza mau,Ikukulwisa e nkoko miau nze mazi,’ u kavovele o Mfumu Yave.
15 ‘Vava ikitula e Engipito se nsi yasala e nkatu, se nsi ikatwilu yawonso ina mo,+Vava ifwasa awonso bezingilanga mo,Oyau bezaya wo vo mono i Yave.+
16 Eyayi mbembo, o wantu beyimbila yo;O wan’amakento a zula beyimbila yo.
Beyimbila yo mu kuma kia Engipito ye mu kuma kia ulolo wa nkangu andi,’ u kavovele o Mfumu Yave.”
17 I bosi, muna mvu una wa 12, muna lumbu kia 15 kia ngonde, e diambu dia Yave dizidi kwa mono, oku vo:
18 “E mwan’a muntu, dila mu kuma kia Engipito, unkulumuna muna nsi a ntoto, oyandi yo wan’amakento a zula ya nkuma, kumosi ye awana bena kulumuka muna wulu.*
19 “‘Nga ongeye osundidi ankaka o vienga e? Kulumuka, lavalala kumosi ye mindembi zengwa!’
20 Esi Engipito bebwá vana vena awana bafwididi muna nsosolo.+ Engipito iyekwelo vana moko ma mbeni; nunata yo kumosi ye ulolo wa ndonga andi yawonso.
21 “‘Tuka muna nsi a Ziami,* o makesa masundidi o nkuma bemokena yandi ye asadisi andi. Oyau bekulumuka kikilu yo lavalala nze mindembi zengwa, ana bafwididi muna nsosolo.
22 Asuri ina kûna kumosi yo nkangu andi wawonso. E ziami yau inzungidi, yau awonso bafwididi muna nsosolo.+
23 E ziami yandi ina muna nsi a wulu,* o nkangu andi uzungidi e ziami kiandi, yau awonso bafwididi muna nsosolo, kadi ekolo bakala o moyo bamwesanga nkangu o wonga.
24 “‘Elame+ ina kûna kumosi yo ulolo wa nkangu andi uzungidi e ziami kiandi, yau awonso bafwididi muna nsosolo. Bakulumukini muna nsi a ntoto lembi zengwa, awana bamwesanga nkangu o wonga ekolo bakala o moyo. Owau befusuk’e nsoni kumosi ye awana bakulumukini muna wulu.*
25 Bavangidi mfulu mu kuma kiandi* vana kati kwa awana bafwa, kumosi ye ulolo wa nkangu andi muna kinzieta kia ziami yandi. Yau awonso i wantu balembi zengwa, ana bafwididi muna nsosolo, kadi ekolo bakala o moyo bamwesanga nkangu o wonga; nsoni befusukwa kumosi ye awana bekulumukanga muna wulu.* Oyandi osilu vana kati kwa awana bafwidi.
26 “‘O Meseke i kûna kena kumosi ye Tubali+ ye nkangu miau* miawonso. E ziami yau* yawonso inzungidi. Yau awonso i wantu balembi zengwa, ana bafwididi muna nsosolo, kadi ekolo bakala o moyo bamwesanga nkangu o wonga.
27 Nga ke belavalala kumosi ko yo makesa mankuma malembi zengwa mana mabwidi, ana bakulumukini muna Ziami* ye nuaninua yau ya vita e? Besia e nsosolo miau kuna nsi a ntu miau* ye masumu mau vana ntandu a visi yau, kadi ekolo bakala o moyo makesa mama mankuma bamwesanga nkangu o wonga.
28 Kansi vo i ngeye, otufakeswa vana vena mindembi zengwa, olavalala kumosi ye awana bafwididi muna nsosolo.
29 “‘Edome+ ina kûna, e ntinu miandi ye mfumu zandi. Kana una vo akwa nkuma bakala, balavidikwa vana vena awana bafwila muna nsosolo; oyau mpe belavalala kumosi ye mindembi zengwa+ ye awana bekulumukanga muna wulu.*
30 “‘Ikûna bena afidi awonso a node, kumosi ye esi Sidone,+ ana bakulumukini ye nsoni kumosi ye awana bavondelo, kana una vo nkum’au wonga wayingi wamwesanga. Oyau belavalala lembi zengwa kumosi ye awana bafwididi muna nsosolo, befusukwa e nsoni kumosi ye awana bekulumukanga muna wulu.*
31 “‘O Faro omona awonso awaya, ofiaulwiswa mu kuma kia mambu mawonso mabwididi ulolo wa nkangu andi;+ o Faro ye vu kiandi kiawonso kia makesa befwila muna nsosolo,’ u kavovele o Mfumu Yave.
32 “‘Kadi ekolo kakala o moyo wamwesanga nkangu o wonga, o Faro yo ulolo wa nkangu andi belavidikwa kumosi ye mindembi zengwa, kumosi ye awana bafwididi muna nsosolo,’ u kavovele o Mfumu Yave.”
Mvovo vana yand'a lukaya
^ I sia vo, mvu 12 wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Yovo “o nkung’a mafwa.”
^ Yovo “mwan’a nkosi a mika miayingi muna nsingu.”
^ Yovo “vunzuna.”
^ Mvovo wa sina: “E nkoko mizala yo ngeye.”
^ Yovo “divunzuna.”
^ Yovo “ziami.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Yovo “ziami.”
^ Yovo “ziami.”
^ I sia vo, zula kia Elame.
^ Yovo “ziami.”
^ Mvovo wa sina: “miandi.”
^ Mvovo wa sina: “yandi.”
^ Yovo “Seol,” i sia vo, ziami kia wantu awonso. Tala Nsas’a Mvovo.
^ Nanga makesa mazikwa kumosi ye nsosolo miau yo zitu uvewanga kwa makesa.
^ Yovo “ziami.”
^ Yovo “ziami.”
