Yezekele 34:1-31
34 E diambu dia Yave dizidi diaka kwa mono, oku vo:
2 “E mwan’a muntu, sakula mu kuma kia avungudi a Isaele. Sakula yo vovesa avungudi vo: ‘I wau wuwu kavovele o Mfumu Yave: “Nkenda kwa avungudi a Isaele,+ ana bekuyilunga-lunganga! Nga avungudi ke kambi ko bafwete lunga-lunganga e?+
3 Oyeno nudidi mazi ma bulu, nuvuete mvuatu mia mika, nuvondele bulu kiazala yo mazi,+ kansi ke nulunga-lunganga e kambi ko.+
4 Ke nukumikini bulu kitovokele ko ngatu wuka kina kiyelele, ke nukangidi tenda ko muna kina kitolokele yovo vutulwisa kina kiyungananga yovo vava kina kivididi;+ kansi mu ngolo ye mu ntim’ambadi nukubayadilanga.+
5 Muna kuma kiaki, e kambi dimwanganene wau vo ke vakedi mvungudi ko;+ dimwanganene yo kituka se madia ma bulu yawonso yamfuta.
6 Mameme mame mayungane muna miongo miawonso ye muna kundubulu yawonso yazanguka; mameme mame mamwanganene mu nza yawonso, ke vena muntu ko okubavavanga yovo vang’e ngolo za kubasolola.
7 “‘“Dianu vo, oyeno avungudi, nuwá e diambu dia Yave:
8 ‘“E nkal’ame kaka,” u kavovele o Mfumu Yave, “o mameme mame makitukidi se sanzu, se madia ma bulu yawonso yamfuta, wau vo ke vakedi mvungudi ko, avungudi ame ke bavavidi mameme mame ko; kansi bakwamanene kuyilunga-lunga vana fulu kia lunga-lunga mameme mame,”’
9 ozevo, yeno avungudi nuwá e diambu dia Yave.
10 I wau wuwu kavovele o Mfumu Yave: ‘Nsidi avungudi e kitantu, mbalu itá yau mu kuma kia mameme mame,* ikubakatula kiyekwa kia lunga-lunga*+ mameme mame, avungudi ke bekuyilunga-lunga diaka ko. Ivuluza mameme mame muna nua miau, ke mekala diaka se madia mau ko.’”
11 “‘Kadi i wau wuwu kavovele o Mfumu Yave: “Mon’oyu, mono kibeni ikwenda vava mameme mame yo lunga-lunga mo.+
12 Wauna o mvungudi kelunga-lungilanga mameme mandi mavila mana kasolwele, i una ilunga-lungila mameme mame.+ Ikubavuluza muna fulu yawonso ina bamwanganeswa muna lumbu kia matuti ye tombe kiangolo.+
13 Ikubavaikisa vana vena e nkangu, ikubakutakesa tuka muna zinsi, ikubatwasa muna nsi au yo kubadikila muna miongo mia Isaele,+ vana ndambu a nkoko ye muna fulu yawonso ya nsi izingilanga o wantu.
14 Ikubanata muna madilu mambote, muna miongo miandá mia Isaele i mukala o madilu mau.+ Ikuna bebubamena muna madilu mambote ma nsi,+ bedila muna miongo mia Isaele muna madilu masundidi o wete.”
15 “‘“Mono kibeni ilunga-lunga* mameme mame,+ mono kibeni ibubika mo,”+ u kavovele o Mfumu Yave.
16 “Ivava dina divididi,+ ivutulwisa dina diyungananga, ikanga e tenda dina ditolokele, ikumika dina ditovokele; kansi ifwasa dina diamazi ye dina diakumama. Fundisa ifundisa mo yo kubavana e tumbu kibafwanukini.”
17 “‘Vo i yeno, e kambi diame, i wau wuwu kavovele o Mfumu Yave: “Ke kolo ko ifundisa meme edi ye meme diankaka, mameme ma makoko ye nkombo za makoko.+
18 Nga ke diafwana ko edi dia dila vana madilu masundidi o wete? Nga nufwete mpe diatakesa madilu meno mana masidi e? Wau numene nua maza masundidi o kiá, nga nufwete timvuna* o maza mu diatakesa mo muna malu meno e?
19 Nga mameme mame mafwete dila muna madilu mana nudiatakese yo nua maza mana nutimvuini* muna malu meno e?”
20 “‘Ozevo, i wau wuwu kavovele o Mfumu Yave kwa yau: “Mon’oyu, mono kibeni ifundisa vana vena meme diamazi ye meme diatanda,
21 kadi muna luvati ye mavembo meno, nukwamanene nunguna mameme mawonso mayela; muna mpoka zeno nukwamanene kubakulanesa yavana nubamwanganese.
22 Ivuluza mameme mame, ke bekala diaka se sanzu ko;+ ifundisa vana vena meme edi ye meme diankaka.
23 Ikubabundumwina mvungudi mosi,+ o Davidi wa selo kiame,+ oyandi okubalunga-lunga. Yandi kibeni okubalunga-lunga yo kituka se mvungudi au.+
24 Omono Yave, ikala se Nzambi au,+ o Davidi wa selo kiame okala se mfumu vana kati kwau.+ Mono kibeni Yave mpovele wo.
25 “‘“Ikanga yau e kangu dia luvuvamu,+ ikatula e bulu yansisi muna nsi,+ kimana bazingila mu luvuvamu muna makanga yo leka muna mfinda.+
26 Oyau ye zunga ina muna kinzieta kia kundubulu kiame ikubakitula se nsambu,+ iyambula vo e mvula yanoka muna ntangwa ifwene. E nsambu zinoka nze mvula.+
27 E nti mia nzanza miyima e mbongo andi, o ntoto uyima e mbongo andi,+ oyau mu luvuvamu bezingila muna nsi. Bezaya wo vo mono i Yave vava itolola e vangu kiau+ yo kubavuluza vana moko ma awana bekubabundunanga.
28 Kuna kwa zula, oyau ke bekala diaka se sanzu ko, e bulu yansisi ya mfuta ke ikubadia ko, mu luvuvamu bezingila, ke vekala muntu ko okubamwesa o wonga.+
29 “‘“Ikubakunina e mpatu atunda, ke befwila diaka mu mvengele ko muna nsi,+ ke befusulwiswa diaka nsoni ko kwa zula.+
30 ‘Muna mpila yayi, i bezayila vo omono Yave wa Nzambi au ngina yau, vo i yau, e nzo a Isaele, yau i nkangu ame,’+ u kavovele o Mfumu Yave.”’
31 “‘Vo i yeno, e mameme mame,+ e mameme mana ilunga-lunganga, oyeno nu mpasi wantu, kansi omono i Nzambi eno,’ u kavovele o Mfumu Yave.”
Mvovo vana yand'a lukaya
^ Yovo “vana moko mau itombela mameme mame.”
^ Mvovo wa sina: “dikila.”
^ Mvovo wa sina: “idikila.”
^ Yovo “vunzuna.”
^ Yovo “nuvunzwini.”
