Yezekele 35:1-15
-
Ungunza mu kuma kia miongo mia Seyire (1-15)
35 E diambu dia Yave dizidi diaka kwa mono, oku vo:
2 “E mwan’a muntu, vilula e ndose aku kuna zunga kia miongo kia Seyire,+ sakula mu kuma kiandi.+
3 Umvovesa vo: ‘I wau wuwu kavovele o Mfumu Yave: “Isidi e kitantu, e zunga kia miongo kia Seyire, ikulambulwila o koko kwame yo kukitula se nsi yasala e nkatu.+
4 Ikitula e mbanza zaku se mazumbu, okituka se nsi yasala e nkatu;+ ozaya wo vo mono i Yave.
5 Kadi osongele kitantu kilembi fokoka,+ oyekwele Aneyisaele muna nsosolo muna ntangw’a mpasi zau, muna ntangw’a tumbu kiau kiansuka.”’+
6 “‘Ozevo, e nkal’ame kaka,’ u kavovele o Mfumu Yave, ‘Ikuyekola muna mbungul’a menga, e mbungul’a menga ikulakama.+ Wau vo o menga i mau wamenga, e mbungul’a menga ikulakama.+
7 Ikitula e zunga kia miongo kia Seyire se nsi yasala e nkatu,+ ivonda konso ona oviokela mo ye konso ona uvutukila mo.
8 Izadisa e miongo miandi yo mavimbu; vana kundubulu yaku, muna ndimba miaku ye muna nkoko miaku miawonso i bebwila awana befwila muna nsosolo.
9 Ikusisa e nkatu yakwele mvu, e mbanza zaku ke zikala diaka wantu ko;+ nuzaya wo vo mono i Yave.’
10 “Kadi ongeye ovovele vo: ‘E zula yole yayi ye nsi zole zazi zikituka se zame, vua tuvua zo,’+ kana una vo Yave yandi kibeni i mûna kakedi,
11 ‘ozevo, e nkal’ame kaka,’ u kavovele o Mfumu Yave, ‘Ikuvutulwila mun’owu wa makasi maku ye kimpala yo lumengo osongele muna yau;+ ikuyisunzula vana bena vava ikufundisa.
12 I bosi, ozaya wo vo mono kibeni Yave ngwidi e fingu yawonso ofingidi e miongo mia Isaele, vava ovovele vo: “Basisilu e nkatu, baveno kwa yeto twabafwasa.”*
13 Nuvovele mambu mambi mu kuma kiame muna umvuania, nuwokese fingu yeno omu mono.+ Ngwidi mo mawonso.’
14 “I wau wuwu kavovele o Mfumu Yave: ‘E nza yawonso iyangalala vava ikukitula se nsi yasala e nkatu.
15 Wau vo wayangalala vava e vua dia nzo a Isaele diasala e nkatu, i una ivanga kwa ngeye.+ Ongeye okituka se zumbu diasala e nkatu, e zunga kia miongo kia Seyire, elo, e Edome yawonso;+ oyau bezaya wo vo mono i Yave.’”
Mvovo vana yand'a lukaya
^ Mvovo wa sina: “kwa yeto se madia.”
