Yezekele 38:1-23
38 E diambu dia Yave dizidi diaka kwa mono, oku vo:
2 “E mwan’a muntu, vilula e ndose aku kwa Ngonge wa musi nsi a Mangonge,+ e mfumu anene a Meseke ye Tubali,+ sakula mu kuma kiandi.+
3 Vova vo: ‘I wau wuwu kavovele o Mfumu Yave: “Isidi e kitantu, e Ngonge, e mfumu anene a Meseke ye Tubali.
4 Ikuvilula, ikusia tuvaku muna matokolo+ yo kuvaikisa kumosi ye makesa maku mawonso+ ye mvalu ye akwa mvalu, yau awonso bavuete mvuatu miantalu, ulolo wa makesa bena ye ngubu zanene ye ngubu zakete,* yau awonso ye nsosolo miau;
5 Esi Parasa, Etiopia ye Puti+ bena yau kumosi, yau awonso bena ye ngubu zakete ye mpu za vita;
6 Ngome ye makesa mandi mawonso, e nzo a Tongarema+ itukidi kuna fulu yandá kikilu ya node, kumosi ye makesa mandi mawonso—elo, ulolo wa nkangu una yaku.+
7 “‘“Kubama, elo, nuyikubika, ongeye kumosi yo makesa maku mawonso ana bena yaku, ongeye okala se mfidi au.
8 “‘“Vava vevioka lumbu yayingi, osiwa e sungididi.* Vava vevioka mvu miayingi, ongeye mu kingolo okotela muna nsi ya awana bavutulwiswa, ana bavuka muna nsosolo, ana bakutakeswa tuka muna ulolo wa nkangu yo twaswa muna miongo mia Isaele, emi miasala e nkatu tuka kolo. O wantu bezingilanga mu nsi yayi batwaswa tuka muna minkangu, yau awonso mu luvuvamu bezingilanga.+
9 Ongeye okwiza nze kimbongela mu kubanuanisa, ofuka e nsi nze matuti, ongeye kumosi ye makesa maku mawonso ye ulolo wa nkangu una yaku.”’
10 “I wau wuwu kavovele o Mfumu Yave: ‘Muna lumbu kiakina, oyima ngindu muna ntim’aku yo kana mambu mambi.
11 Ongeye ovova vo: “Mu kingolo ikotela muna nsi ina yo mavata makondwa lutaninu.*+ Lwakila ilwakila awana bezingilanga mu luvuvamu kondwa kwa mvuanga, yau awonso mu mavata makondwa e yaka, mbindi ye mavitu bezingilanga.”
12 Ekani diaku i baka ulolo wa sanzu yo kutumuna e lekwa yo nuanisa e fulu yasala e nkatu owau izingilanga o wantu,+ ana bakutakeswa tuka muna zula yayingi,+ bekutikanga kimvuama yo lusalu,+ bezingilanga vana kati-kati kwa ntoto.
13 “‘Seba+ ye Dedane,+ e minkiti mia Tasisi+ yo makesa mau mawonso* bekuyuvula vo: “Nga e diambu okotela mu kingolo i sanza yo kutumuna ulolo wa lekwa? Nga e diambu olungalakesele vu yaku ya makesa i mu nata palata ye wolo, mu baka kimvuama yo lusalu, mu sanza ulolo wa sanzu?”’
14 “Muna kuma kiaki, e mwan’a muntu, vovesa Ngonge vo: ‘I wau wuwu kavovele o Mfumu Yave: “Muna lumbu kiakina, vava o nkangu ame Isaele uzingila mu luvuvamu, nga kuzaya wo ko e?+
15 Ongeye otuka vana fulu kiaku, kuna fulu yandá kikilu ya node,+ ongeye kumosi ye ulolo wa nkangu, yau awonso bekwendelanga vana mvalu, ulolo wa wantu, vu kianene kia makesa.+
16 Olwakila o nkangu ame nze matuti mefukanga e nsi. Muna lumbu yambaninu, ikutwasa wanuanisa e nsi ame+ kimana e zula yanzaya vava ikusadila mu kubasonga vo mono i Nzambi avauka, e Ngonge.”’+
17 “I wau wuwu kavovele o Mfumu Yave: ‘Nga ke ngeye ko yavovela muna selo yame, e ngunza za Isaele kuna nz’ankulu, ana basakula mu mvu miayingi vo ongeye otwaswa mu kwiza nuanisa Aneyisaele?’
18 “‘Muna lumbu kiakina, kina o Ngonge kekota muna nsi a Isaele,’ u kavovele o Mfumu Yave, ‘e nsita zame zayingi zikwama.+
19 Kadi ivovela muna nsita zame, muna tiya twa makasi mame; muna lumbu kiakina mukala nzakam’a ntoto yangolo muna Isaele.
20 E mbizi za kalunga, e nuni za zulu, e bulu yamfuta, e lekwa yawonso iyatatanga ova ntoto yo wantu awonso bena ova ntoto, bezakama mu kuma kiame. E miongo mikululwa, e miongo mia matadi miwongomoka,+ e yaka yawonso ibwa vana ntoto.’
21 “‘Vana miongo miame miawonso itwikila Ngonge o nsosolo,’ u kavovele o Mfumu Yave. ‘Konso kesa onuana yo nkwandi.+
22 Fundisa ikumfundisa.* Ikuntwikila vuku+ ye mbungul’a menga. Inokesa mvul’angolo, mvul’a matadi,+ tiya+ ye lengo+ muna yandi ye muna makesa mandi ye muna ulolo wa nkangu wina yandi.+
23 Tundidika kikilu ikuyitundidika, ikuyivaula yo yambula vo yazayakana vana meso ma zula yayingi; oyau bezaya wo vo mono i Yave.’
Mvovo vana yand'a lukaya
^ E ngubu zakete zisadilwanga kwa akwa mfumba.
^ Yovo “obokelwa.”
^ Yovo “mavata mena muna nzanza.”
^ Yovo “yo wan’au awonso a nkosi a mika miayingi vana nsingu.”
^ Yovo “Fundana ifundana yandi.”
