Yezekele 39:1-29
39 “Vo i ngeye, e mwan’a muntu, sakula mu kuma kia Ngonge,+ umvovesa vo: ‘I wau wuwu kavovele o Mfumu Yave: “Isidi e kitantu, e Ngonge, e mfumu anene a Meseke ye Tubali.+
2 Ikuvilula, ikufila yo kutombola tuka kuna fulu yandá kikilu ya node+ yo kulwakisa vana miongo mia Isaele.
3 Wanda iwanda o mfumba wina vana koko kwaku kwalumonso yo sotola e nzanza zina vana koko kwaku kwalunene.
4 Vana miongo mia Isaele obwila,+ ongeye yo makesa maku mawonso yo nkangu ukala yaku. Ikuvana se madia kwa nuni za mpila zawonso zidianga e nsuni ye kwa bulu yamfuta.”’+
5 “‘Vana nzanza obwila,+ kadi mono kibeni mpovele wo,’ u kavovele o Mfumu Yave.
6 “‘Itwika tiya muna Mangonge ye kwa awana bezingilanga mu luvuvamu muna sanga,+ oyau bezaya wo vo mono i Yave.
7 Zayisa izayisa e nkumbu ame avauka vana vena nkangu ame Isaele, kiyambula diaka ko vo e nkumbu ame avauka yasafulwa; e zula izaya wo vo mono i Yave,+ wa Mvauki muna Isaele.’+
8 “‘Elo, kwiza dikwiza, vangama divangama,’ u kavovele o Mfumu Yave. ‘Kiaki i lumbu kina yayika.
9 Awana bezingilanga muna mbanza za Isaele bevaika yo kwika o tiya muna nuaninua ya vita—ngubu zanene ye ngubu zakete,* mfumba ye nzanza, bota ya vita* ye madionga. Belungila yo tiya+ mu mvu nsambwadi.
10 Ke bekala yo mfunu wa tiama nkuni ko muna nzanza yovo kesa nti muna mfinda, kadi besadila e nuaninua mu lunga o tiya.’
“‘Besanza awana babasanza yo kutumuna awana babakutumuna e lekwa,’ ukavovele o Mfumu Yave.
11 “‘Muna lumbu kiakina, ivana Ngonge+ e fulu kia ziamina muna Isaele, muna ndimba uviokelanga awana bekwendanga kuna este a mbu, o ndimba ukaka e nzila ya awana beviokelanga mo. I kuna bezikila Ngonge yo nkangu andi wawonso, beyikila wo vo Ndimb’a Amone-Ngonge.*+
12 E nzo a Isaele ngonde nsambwadi ivanga muna kubazika mu velelesa e nsi.+
13 O nkangu wawonso wa nsi bekubazika, ediadi dikubatwasila tunda muna lumbu kina ikuyikembesa,’+ u kavovele o Mfumu Yave.
14 “‘Vekala yo wantu besolwa benda kangadi muna nsi yo zika mavimbu masidi ova ntoto, kimana bavelelesa wo. Bekwamanana vava mavimbu mu ngonde nsambwadi.
15 Awana bekangalanga muna nsi avo bamwene visi kia muntu, besia sinsu vana ndambu a visi. I bosi, awana bena ye kiyekwa kia zika, bezika kio muna Ndimb’a Amone-Ngonge.+
16 Ovavana vekala mpe ye mbanza iyikilwa vo Amona.* Oyau bevelelesa e nsi.’+
17 “Vo i ngeye, e mwan’a muntu, i wau wuwu kavovele o Mfumu Yave: ‘Vovesa e nuni za mpila zawonso ye bulu yawonso yamfuta vo: “Nukutakana, nuiza. Nulungalakana vana ndambu zawonso za kimenga kina inukubikidi, kimenga kianene vana miongo mia Isaele.+ Oyeno nudia nsuni yo nua menga.+
18 Oyeno nudia e nsuni mia akwa nkuma yo nua menga ma mfumu za nza—mameme ma makoko, wan’a mameme ma makoko, nkombo ye ngombe—yau awonso bulu ya mazi ya Basani.
19 Oyeno nudia mazi yo toma yukuta, nunua menga yavana nukolwa muna kimenga kina inukubikidi.”’
20 “‘Vana meza mame, nuyukuta e nsuni mia mvalu ye mia anati a makalu ma vita, akwa nkuma yo makesa ma mpila zawonso,’+ u kavovele o Mfumu Yave.
21 “‘Isonga o nkembo ame vana vena e zula, e zula yawonso imona e tumbu kina mpene yo nkuma una nsongele* vana bena.+
22 Tuka muna lumbu kiakina, e nzo a Isaele izaya wo vo mono i Yave wa Nzambi au.
23 E zula izaya wo vo, e nzo a Isaele mu kuma kia kuzuka diau bendele mu kinkole, mu kuma kia kondwa kwau kwa kwikizi omu mono.+ Muna kuma kiaki, ibaswekele e ndose ame+ yo kubayekola kwa mbeni zau,+ yau awonso babwidi muna nsosolo.
24 Ibavangidi mun’owu wa funzuka kwau ye makuzuka mau, ibaswekele e ndose ame.’
25 “Ozevo, i wau wuwu kavovele o Mfumu Yave: ‘Ivutulwisa nkangu a Yakobo+ wayenda kinkole, ifwila e nzo yawonso ya Isaele e nkenda;+ itanina e nkumbu ame avauka yo vema kwawonso.*+
26 Vava bamene fusulwiswa e nsoni mu kuma kia mavangu mau mawonso ma kondwa kwikizi omu mono,+ mu luvuvamu bezingila muna nsi au, ke vekala muntu ko okubamwesa o wonga.+
27 Vava ikubavutulwisa tuka muna minkangu yo kubakutakesa tuka muna nsi za mbeni zau,+ omono mpe ikuyivaula vana bena, vana ndose a zula yayingi.’+
28 “‘Oyau bezaya wo vo mono i Yave wa Nzambi au vava ikubafila mu kinkole vana vena e zula yo kubakutakesa diaka muna nsi au, lembi sisa kana mosi muna yau.+
29 Kikubasweka diaka ndose ame ko,+ kadi iyitila mwand’ame muna nzo a Isaele,’+ u kavovele o Mfumu Yave.”
Mvovo vana yand'a lukaya
^ E ngubu zakete zisadilwanga kwa akwa mfumba.
^ Nanga, “madionga mandá.”
^ Yovo “Ndimb’a Nkangu a Ngonge.”
^ Ina ye nsasa vo: “Nkangu.”
^ Mvovo wa sina: “koko kwame kuna ntensekele.”
^ Mvovo wa sina: “nkala ye nsongo mu kuma kia nkumbu ame avauka.”
