Yezekele 40:1-49
40 Muna mvu una wa 25 tuka twayendela mu kinkole,+ muna lubantiku lwa mvu, muna lumbu kia kumi kia ngonde, vioka mvu 14 tuka kiafwasilwa e mbanza,+ muna lumbu kiakina o koko kwa Yave kukedi omu mono, oyandi undete kuna mbanza.+
2 Muna mona-meso ya Nzambi, undete kuna nsi a Isaele yo kunsia va mongo wandá kikilu,+ kuna sude, vana vakedi nzo zatungwa nze mbanza.
3 Vava kandete kwakuna, mbwene muntu una ye mpwa ikezimanga nze nsongo.+ Okedi yo nsing’a lino ye tutu dia tezela* vana koko kwandi,+ otelamene vana vitu.
4 O muntu umpovese vo: “E mwan’a muntu, toma tala, toma winikina yo sia e sungididi* muna mawonso ikusonga, kadi ekiaki i kuma otwasilu okwaku. Mawonso omona zayisa mo kwa nzo a Isaele.”+
5 Mbwene yaka kuna mbazi kiazunga e tempelo.* Vana koko kwa muntu vakedi tutu dia tezela dia yinkoso sambanu muna lá (konso kinkoso kiakudikilwa e kandazi kia koko).* Oyandi oyantikidi teza e yaka: o nkandu a yaka, tutu dimosi; o lá kwandi, tutu dimosi.
6 I bosi, muntu ndioyo wizidi kuna vitu ditadidi kuna este,+ otombokele ntombokelo za sikada ya vitu. Otezel’e nkotelo a vitu: o lambuka kwandi, tutu dimosi; e nkotelo yankaka ikedi mpe yo lambuka kwa tutu dimosi.
7 Konso suku dia nyingidi dikedi ye tutu dimosi muna lá ye tutu dimosi muna lambuka, vana kati kwa masuku mole ma ayingidi vakedi yinkoso tanu.+ E nkotelo a vitu ina vana ndambu a veta kia vitu kitadidi kuna tempelo, ikedi tutu dimosi.
8 Oyandi otezel’e veta kia vitu kitadidi kuna tempelo, kikedi tutu dimosi.
9 I bosi, otezele veta kia vitu, yinkoso nana; otezele malunzi ma luvati ma veta, yinkoso yole; e veta kia vitu kikedi kuna ndambu a vitu ditadidi kuna tempelo.
10 Vakedi ye masuku tatu ma ayingidi kuna konso sambu dia vitu dia este. Mau tatu makedi tezo kimosi, o malunzi ma luvati kuna konso sambu makedi tezo kimosi.
11 I bosi, otezele o lambuka kwa nkotelo a vitu, yinkoso 10; o lá kwa vitu, yinkoso 13.
12 Vana ntwal’a masuku ma ayingidi kuna konso sambu vakedi yaka kiankufi kia kinkoso kimosi. Konso suku dia nyingidi kuna konso sambu dikedi ye yinkoso sambanu.
13 I bosi, otezele vitu tuka vana nludi a suku dimosi dia nyingidi yavana nludi a suku diankaka, yinkoso 25; konso nkotelo a suku italanene ye yankaka.+
14 Otezele malunzi ma luvati, yinkoso 60 muna lá, otezele mpe malunzi ma luvati lwa mavitu muna yanzala kiawonso.
15 Tuka vana nkotelo a vitu yavana ntwal’a veta kiatala kuna yanzala, yinkoso 50.
16 Muna kati kwa vitu, muna masuku ma ayingidi ye muna malunzi ma luvati ma masuku kuna konso sambu, mukedi zianela zavonga muna kati yo keva oku mbazi.+ Muna kati kwa veta mukedi mpe ye zianela kuna konso sambu, muna malunzi ma luvati mukedi ye fwaniswa ya maba.+
17 I bosi, unkotese kuna yanzala kia mbazi, mbwene masuku ma dila+ ye matadi malengwa vana ntoto muna kinzieta kia yanzala. Vakedi masuku 30 ma dila vana matadi malengwa vana ntoto.
18 E fulu kialengwa matadi vana ntoto vana ndambu a mavitu kiafwanana yo mavitu muna lá—ekiaki i fulu kialengwa matadi vana ntoto, vana yanda.
19 I bosi, otezele o lambuka, tuka vana ntwal’a vitu diayanda yavana lubantiku lwa yanzala kiakati, yinkoso 100 kuna este ye yinkoso 100 kuna node.
20 E yanzala kiambazi kikedi ye vitu diatala kuna node, otezele o lá yo lambuka kwandi.
21 Muna vitu mukedi masuku tatu ma ayingidi kuna konso sambu. O malunzi mandi ma luvati ye veta kiandi kikedi tezo kimosi ye kia vitu diantete. E vitu dikedi yinkoso 50 muna lá, yinkoso 25 muna lambuka.
22 E zianela zandi, veta kiandi ye fwaniswa yandi ya maba+ ikedi tezo kimosi ye ya vitu dia este. O wantu ntomboka nsambwadi za sikada batombokanga muna vo lwaka, e veta kiandi kikedi vana ntwala.
23 Vana yanzala kiakati vakedi vitu diatala kuna vitu dia node ye vitu dimosi diatala kuna vitu dia este. Otezele o lambuka tuka vana vitu dimosi yakuna vitu diankaka, vakedi yinkoso 100.
24 I bosi undete kuna sude, mbwene vitu kuna ndambu a sude.+ Otezele malunzi mandi ma luvati ye veta kiandi, yawonso ikedi tezo kimosi ye mavitu mankaka.
25 Kuna konso sambu dia vitu ye muna veta mukedi zianela, nze i zianela za mavitu mankaka. O lá kwa vitu yinkoso 50, o lambuka kwandi yinkoso 25.
26 Vakedi ntomboka nsambwadi za sikada muna vo lwaka,+ e veta kiandi kikedi vana ntwala. Muna malunzi ma luvati ma veta mukedi ye fwaniswa ya maba, dimosi kuna konso sambu.
27 Muna yanzala kiakati mukedi ye vitu diatala kuna sude; otezele ndambu a sude tuka vitu dimosi yakuna vitu diankaka, yinkoso 100.
28 I bosi, unkotese muna yanzala kiakati kuna vitu dia sude; otezele vitu dia sude, dikedi tezo kimosi ye mavitu mankaka.
29 O masuku ma vitu ma ayingidi, malunzi ma luvati ye veta kiandi kikedi tezo kimosi ye mavitu mankaka. Kuna konso sambu ye muna veta mukedi zianela. E vitu dikedi yinkoso 50 muna lá, yinkoso 25 muna lambuka.+
30 Muna mavitu ma ndambu zawonso mukedi veta; ikedi ye yinkoso 25 muna lá, yinkoso 5 muna lambuka.
31 E veta kia vitu dia sude kitadidi kuna yanzala kiambazi, muna malunzi ma luvati+ ma veta mukedi ye fwaniswa ya maba, ntomboka nana za sikada zantombokwanga muna vo lwaka.+
32 Unkotese muna yanzala kiakati kuna este, otezel’e vitu, dikedi tezo kimosi ye mavitu mankaka.
33 Masuku ma ayingidi, malunzi ma luvati ye veta kia vitu, yawonso ikedi tezo kimosi ye mavitu mankaka, kuna konso sambu dia vitu ye muna veta mukedi zianela. E vitu dikedi yinkoso 50 muna lá, yinkoso 25 muna lambuka.
34 E veta kiandi kitadidi kuna yanzala kiambazi, muna malunzi ma luvati ma veta mukedi fwaniswa ya maba, ntomboka nana za sikada zatombokwanga muna vo lwaka.
35 I bosi, unkotese muna vitu dia node,+ otezele vitu; dikedi tezo kimosi ye mavitu mankaka.
36 Masuku ma ayingidi, malunzi ma luvati ye veta kia vitu, yawonso ikedi tezo kimosi ye mavitu mankaka. Kuna konso sambu dia vitu kukedi ye zianela. E vitu dikedi ye yinkoso 50 muna lá, yinkoso 25 muna lambuka.
37 Malunzi ma luvati ma vitu matadidi kuna yanzala kiambazi, muna malunzi ma luvati mukedi ye fwaniswa ya maba, ntomboka nana za sikada zatombokwanga muna vo lwaka.
38 Vana ndambu a malunzi ma luvati ma vitu vakedi suku diadila dikedi yo mwelo, i mûna mwasukulwilwanga o tukau twangioka.+
39 Kuna konso sambu dia veta kia vitu kukedi meza mole, ivana vavondelwanga tukau twawonso twangioka,+ twa sumu+ ye twa kuzuka.+
40 Kuna sambu dimosi kuna mbazi, kuna nkotelo a vitu dia node, kukedi meza mole. Kuna sambu diankaka, muna veta kia vitu mukedi mpe meza mole.
41 Kuna konso sambu dia vitu kukedi meza yá—o lutangu lwawonso meza nana—, i vana vavondelwanga yimenga.
42 O meza yá ma lukau lwawonso lwa ngioka mu matadi mavalwa mavangilwa. Makedi ye kinkoso kimosi ye ndambu muna lá, kinkoso kimosi ye ndambu muna lambuka, kinkoso kimosi muna zanguka. Vana ntandu a meza momo i vakalanga e salanganu ya vondela tukau twangioka ye yimenga.
43 Muna kinzieta kiawonso kia yaka yakati mwasomekwa mabaya ma lambuka kwa kandazi kia koko; vana meza i vasiwanga e nsuni mia tukau.
44 Vana mbazi a luvati lwa vitu diakati vakedi masuku madila ma ayimbidi;+ makedi vana yanzala kiakati, lukufi ye vitu dia node, matadidi kuna sude. Vana ndambu a vitu dia este vakedi suku diankaka diadila, ditadidi kuna node.
45 Umpovese vo: “E suku diadila ditadidi kuna sude i dia anganga ana bena ye kiyekwa kia sadila muna tempelo.+
46 E suku diadila ditadidi kuna node i dia anganga ana bena ye kiyekwa kia sadila vana ziku.+ Yau i wan’a Sadoke,+ ana batuka muna Anelevi, ana bavewa kiyekwa kia finama Yave muna kunsadila.”+
47 I bosi, otezele yanzala kiakati. Kikedi yinkoso 100 muna lá, yinkoso 100 muna lambuka, e ndambu zau yá zafwanana. E ziku dikedi vana ntwal’a tempelo.
48 I bosi, unkotese vana veta kia tempelo,+ otezele malunzi ma luvati ma veta, e lunzi dia sambu edi yinkoso tanu, e lunzi dia sambu diankaka yinkoso tanu. O lambuka kwa vitu* kwa yinkoso tatu kuna ndambu imosi ye yinkoso tatu kuna ndambu yankaka.
49 E veta kikedi ye yinkoso 20 muna lá, yinkoso 11* muna lambuka. Wantu ntomboka za sikada batombokanga muna vo lwaka. Vakedi malunzi vana ndambu a malunzi ma luvati, lunzi dimosi kuna konso sambu.+
Mvovo vana yand'a lukaya
^ Mvovo wa sina: “sia ntim’aku.”
^ Mvovo wa sina: “tutu dia tezela dia yinkoso sambanu, kinkoso kimosi ye kandazi kia koko.” Disongele vo yinkoso yandá. Tala Nku. B14.
^ Mvovo wa sina: “nzo.” Tuka muna kapu kia 40-48 o mvovo wau usekwelo vo tempelo vava uyikanga e nzo zina kuna lûmbu lwa tempelo yovo e tempelo yankatu.
^ Yovo “lunzi.”
^ Nanga, “12.”
