Yezekele 41:1-26
41 I bosi, unkotese muna nzo avauka,* otezele malunzi ma mwelo; e lunzi dia sambu edi yinkoso* sambanu, e lunzi dia sambu diankaka mpe yinkoso sambanu.
2 O mwelo ukedi yinkoso 10 muna lambuka, e yaka kia mwelo kia sambu edi yinkoso tanu, e kia sambu diankaka mpe yinkoso tanu. Otezele fulu kiavauka, yinkoso 40 muna lá, yinkoso 20 muna lambuka.
3 I bosi, oyandi okotele muna kati,* otezele e lunzi dia mwelo a fulu kisundidi o vauka, yinkoso yole muna nkandu, o mwelo ukedi yinkoso sambanu muna lambuka. E yaka ya mwelo ikedi* yinkoso nsambwadi.
4 Otezele e suku ditadidi kuna fulu kiavauka, dikedi yinkoso 20 muna lá, yinkoso 20 muna lambuka.+ Umpovese vo: “Ekiaki i Fulu Kisundidi o Vauka.”+
5 I bosi, otezele e yaka kia tempelo, yinkoso sambanu muna nkandu. O masuku muna kinzieta kia tempelo makedi yinkoso yá muna lambuka.+
6 O masuku makedi mu banga tatu, suku dimosi vana ntandu a suku diankaka, konso banga kikedi ye masuku 30. Muna kinzieta kia yaka kia tempelo mukedi nsuvila za yaka muna mwatensekwanga mvuambu za masuku, kimana e mvuambu zalembi kota muna yaka ya tempelo.+
7 Kuna lunene ye kuna lumonso lwa tempelo kukedi sikada imosi-imosi yazietomoka,* o sanzuka kwandi kwawokelanga ekolo yayendanga kuna masuku ma ntandu.+ E sikada yasanzukanga muna konso banga, tuka vana banga kiayanda, iviokele vana banga kiakati yakuna banga kiantandu.
8 Mbwene nkubilwa yazanguka muna kinzieta kiawonso kia tempelo, e nkubilwa za masuku zikedi tutu dimosi dia yinkoso sambanu tuka vana ntoto yavana konko.
9 O nkandu a yaka kiambazi kia masuku, yinkoso tanu. Vana ntandu a nkubilwa, muna kinzieta kia yaka kia masuku, vakedi fulu kiasâdila.
10 Tuka vana tempelo yavana masuku madila+ vakedi ye yanzala kia yinkoso 20 muna lambuka kuna konso sambu.
11 Vana ndambu a masuku, vana fulu kiasâdila, vakedi mielo, umosi kuna node, wankaka kuna sude. E fulu kiasâdila kikedi yinkoso tanu muna lambuka, muna kinzieta kiawonso.
12 E nzo ikedi kuna weste, eyi itadidi vana yanzala kia nim’a tempelo, ikedi yinkoso 70 muna lambuka, yinkoso 90 muna lá; o nkandu a yaka kia nzo muna kinzieta kiawonso, yinkoso tanu.
13 Otezele e tempelo, o lá kwandi yinkoso 100. Tuka vana yanzala kina kuna nim’a tempelo, kumosi ye nzo* ye yaka yandi, vakedi yinkoso 100 muna lá.
14 O lambuka kwa yanzala kina kuna ntwal’a tempelo, eki kitadidi kuna este, yinkoso 100.
15 Otezele o lá kwa nzo itadidi kuna yanzala kina kuna nim’a tempelo, kumosi ye nzila zandi zaviokela kuna konso sambu, yinkoso 100.
Otezele mpe e fulu kiavauka, fulu kisundidi o vauka,+ veta ya yanzala,
16 kumosi ye sumbuka* yawonso, zianela zavonga muna kati yo keva oku mbazi+ ye nzila zaviokela zikedi vana fulu yoyo yau tatu. Vana ndambu a nkotelo vakedi valanganza ya mabaya+ tuka vana ntoto yavana zianela; e zianela zikedi zafukwa.
17 Otezele vana ntandu a mwelo, muna kati kwa tempelo, kuna mbazi ye yaka yawonso muna kinzieta.
18 Mukedi fwaniswa yavosonua ya akelubi+ ye ya maba,+ konso ba dikedi vana kati kwa akelubi wole, konso nkelubi okedi ye ndose zole.
19 E ndose a muntu itadidi kuna ba dina ku ndambu eyi, e ndose a nkosi* itadidi kuna ba dina ku ndambu yankaka.+ I una yavosonuenua e fwaniswa yayi muna tempelo yawonso.
20 Tuka vana ntoto yakuna ntandu a mwelo, kukedi fwaniswa ya akelubi ye maba yavosonua muna yaka kia nzo avauka.
21 E ndambu yá za malunzi ma* mwelo a nzo avauka zikedi tezo kimosi.+ Vana ntwal’a fulu kiavauka* vakedi lekwa kina nze
22 ziku dia mabaya+ dikedi ye yinkoso tatu muna zanguka ye yinkoso yole muna lá. Dikedi yo malunzi muna konko, e batu diandi* ye ndambu zandi zavangilwa mu mabaya. I bosi, oyandi umpovese vo: “Omama i meza mena vana ntadisi a Yave.”+
23 E fulu kiavauka ye fulu kisundidi o vauka kikedi ye yelo yole-yole.+
24 Konso kielo kikedi ye ndambu zole zabundikwanga, ndambu zole muna konso kielo.
25 Vakedi ye fwaniswa ya akelubi ye maba yavosonua muna yelo ya nzo avauka, nze ina yavosonua muna yaka.+ Vakedi mpe mvind’a mabaya* vana ntandu, vana ntwal’a veta, kuna mbazi.
26 Mukedi mpe ye zianela zavonga muna kati yo keva oku mbazi+ ye fwaniswa ya maba muna ndambu zau zole za veta ye muna masuku ma tempelo yo mvind’a mabaya.
Mvovo vana yand'a lukaya
^ Mvovo wa sina: “muna tempelo.” Omu kapu kia 41 ye 42, o mvovo wau uyikanga fulu kiavauka yovo nzo avauka yawonso (e tempelo, i sia vo, Fulu Kiavauka ye Fulu Kisundidi o Vauka).
^ I sia vo, okotele vana Fulu Kisundidi o Vauka.
^ Mvovo wa sina: “O lambuka kwa mwelo.”
^ Nanga sikada zazingumuka nga nkodi-ambete.
^ I sia vo, e nzo ina kuna weste ya nzo avauka.
^ I sia vo, vana veviokelanga e kielo avo kiziwilu.
^ Yovo “mwan’a nkosi a mika miayingi vana nsingu.”
^ Mvovo wa sina: “lunzi dia.” Nanga mwelo a fulu kiavauka uyikanga.
^ Nanga Fulu Kisundidi o Vauka uyikanga.
^ Mvovo wa sina: “o lá kwandi.”
^ Yovo “veta.”
