Yezekele 43:1-27
43 I bosi, undete kuna vitu ditadidi kuna este.+
2 Okwakuna, mbwene o nkembo a Nzambi a Isaele utukidi kuna este,+ e ndinga andi ikedi nze mazu ma maza mayingi;+ o ntoto utemene yo nkembo andi.+
3 Kina mbwene kikedi nze mona-meso kina yamona vava yayiza* fwasa e mbanza,* kikedi nze mona-meso kina yamona vana ndambu a nkoko a Keba;+ mbwidi o mambukama.
4 I bosi, o nkembo a Yave ukotele muna tempelo* muna vitu ditadidi kuna este.+
5 O mwanda untelamese yo kunkotesa muna yanzala kiakati, mbwene tempelo izele yo nkembo a Yave.+
6 Ngwidi muntu ovovananga yame tuka muna kati kwa tempelo, o muntu wizidi, otelamene vana ndambu ame.+
7 Umpovese vo:
“E mwan’a muntu, ekiaki i fulu kia kunda kiame kia kimfumu+ ye sikinua kia tambi yame,+ i vana ikala vana kati kwa nkangu a Isaele yakwele mvu.+ E nzo a Isaele, oyau ye atinu au ke besafula diaka nkumbu ame avauka ko+ muna zumba kiau kia mwanda ye muna mavimbu ma atinu au.*
8 Basidi e sumbuka* yau vana ntwal’a sumbuka kiame, e lunzi diau vana ndambu a lunzi diame, yaka kaka kina vana kati kwa mono yo yau,+ basafwidi e nkumbu ame avauka muna mambu mangemi bavangidi, muna diadi ibafwasidi muna makasi mame.+
9 Owau, yambula bavavula ova ngina e zumba kiau kia mwanda ye mavimbu ma atinu au, omono ikala vana bena yakwele mvu.+
10 “Vo i ngeye, e mwan’a muntu, zayisa kwa nzo a Isaele una wina e tempelo,+ kimana bafusukwa e nsoni mu kuma kia mbi bavangidi,+ oyau bafwete longoka e fwaniswa kia tempelo.*
11 Avo bamwene nsoni mu kuma kia mambu mawonso bavangidi, ongeye ofwete kubazayisa oma ma fwaniswa kia tempelo, e mpila yavangilwa, e mpaikilu zandi ye mielo miandi.+ Ubasonga e fwaniswa yandi yawonso ye mîna ye nsiku miandi, soneka mio vana meso mau, kimana bamona e fwaniswa kiawonso yo lemvokela e mîna miandi.+
12 Owau i nsiku a tempelo: e zunga kiawonso muna kinzieta kia mbat’a mongo kiavauka kikilu.+ Elo, owau i nsiku a tempelo.
13 “Eyayi i tezo ya ziku muna yinkoso+ (konso kinkoso kiakudikilwa e kandazi kia koko).* O zanguka kwa sina dia ziku, kinkoso kimosi, e fulu kiandi kiasâdila vana ntandu, kinkoso kimosi. Dikedi yo mvinda wa zanguka kwa kandazi kia koko* muna kinzieta kiawonso. Ediadi i sina dia ziku.
14 Tuka vana ntandu a sina dia ziku dina vana ntoto yavana ntandu a banga kiantete, yinkoso yole, e fulu kiandi kiasâdila vana ntandu, kinkoso kimosi. Tuka vana ntandu a banga kiantete yavana ntandu a banga kiazole, yinkoso yá, e fulu kiandi kiasâdila vana ntandu, kinkoso kimosi.
15 E fulu kikwikilwanga o tiya twa ziku kikedi ye yinkoso yá muna zanguka, kikedi mpe ye mpoka yá zatala kuna ntandu.+
16 E ndambu zau yá za fulu kikwikilwanga o tiya twa ziku zafwanana, yinkoso 12 muna lá, yinkoso 12 muna lambuka.+
17 E ndambu zau yá za banga* zikedi yinkoso 14 muna lá, yinkoso 14 muna lambuka; o mvinda muna kinzieta ukedi ndambu a kinkoso, e sina dia ziku dikedi kinkoso kimosi muna zanguka muna ndambu zawonso.
“E ntombokelo zandi za sikada zatala kuna este.”
18 I bosi umpovese vo: “E mwan’a muntu, i wau wuwu kavovele o Mfumu Yave: ‘Otwatu i tuludiku tufwete landwa vava kivangwa e ziku, kimana vatambikilwa tukau twawonso twangioka ye mpe vazazilwa o menga.’+
19 “‘Bonga mwan’a ngombe a koko muna kambi yo vana se lukau lwa sumu+ kwa anganga Anelevi, i sia vo, e mbongo a Sadoke,+ ana bekumfinamanga muna kunsadila,’ u kavovele o Mfumu Yave.
20 ‘Ofwete bonga findambu fia menga mandi yo sia mo muna mpoka yá za ziku, muna konko yá ya banga kianzole ye muna mvinda wina muna kinzieta kiawonso kia ziku, kimana diaveleleswa muna sumu yo lomba luyambulwilu lwa masumu mu kuma kia ziku.+
21 I bosi, bonga mwan’a ngombe a koko wa lukau lwa sumu wanyokela vana fulu kiasikidiswa muna tempelo, kuna mbazi a nzo avauka.+
22 Muna lumbu kiazole, otambika nkombo a koko alunga se lukau lwa sumu; oyau bevelelesa e ziku muna sumu wauna bavelelesele e ziku muna sumu muna mwan’a ngombe a koko.’
23 “‘Vava omana velelesa e ziku muna sumu, obonga muna kambi mwan’a ngombe a koko alunga ye meme dia koko dialunga.
24 Osunzula e bulu yayi kwa Yave, anganga besia yo mungwa+ yo tambika yo se lukau lwawonso lwa ngioka kwa Yave.
25 Muna lumbu nsambwadi, konso lumbu otambika nkombo a koko se lukau lwa sumu,+ otambika mpe mwan’a ngombe a koko a kambi ye meme dia koko dia kambi; ofwete tambika bulu yalunga.
26 Muna lumbu nsambwadi, oyau belomba luyambulwilu lwa masumu mu kuma kia ziku, bafwete dio velelesa yo sunzula dio.
27 Vava e lumbu yayi ifokoka, tuka muna lumbu kianana+ ye muna lumbu ilanda, anganga betambika tukau tweno twawonso twangioka ye yimenga yeno* ya ungudi vana ziku; omono ikunuyangalela,’+ u kavovele o Mfumu Yave.”
Mvovo vana yand'a lukaya
^ Nanga, “kayiza.”
^ Nanga wau kasakula lufwasu lwa mbanza.
^ Mvovo wa sina: “nzo.”
^ Mvovo wa sina: “muna lufwa lwau.”
^ I sia vo, vana veviokelanga e kielo avo kiziwilu.
^ Mvovo wa sina: “oyau bafwete teza e mbandu.”
^ I sia vo, banga kiazole kiyikilu muna tini kia 14.
^ I sia vo, tukau twa nkangu.
