Yezekele 46:1-24
46 “I wau wuwu kavovele o Mfumu Yave: ‘E vitu dia yanzala kiakati dina ditadidi kuna este+ difwete kwamanana kala diazikama+ muna lumbu sambanu+ ya salu, kansi muna Lumbu kia Vundu ye muna lumbu kia nzangam’a ngonde, difwete ziulwa.
2 O mfumu okotela vana veta kia vitu kuna mbazi,+ otelama vana malunzi ma vitu. Anganga betambika lukau lwandi lwawonso lwa ngioka ye yimenga yandi ya ungudi, oyandi ovumbama vana sumbuka* kia vitu, i bosi kevaika. Kansi, e vitu ke difwete zikama ko yamuna nkokela.
3 O nkangu a nsi mpe uvumbama vana ntadisi a Yave, vana nkotelo a vitu diodio muna Lumbu ya Vundu ye muna nzangama za ngonde.+
4 “‘O lukau lwawonso lwa ngioka luna o mfumu kesunzula kwa Yave muna Lumbu kia Vundu, lufwete kala: wan’a mameme sambanu a makoko alunga ye meme dia koko dialunga.+
5 Mu kuma kia meme dia koko, ovana efa* mosi ya lukau lwa mbwaza; mu kuma kia wan’a mameme a makoko, olenda vana konso kina kelenda, kumosi ye yini* mosi ya mazi muna konso efa.+
6 Muna lumbu kia nzangam’a ngonde, o lukau lukala lwa mwan’a ngombe a koko a kambi walunga, wan’a mameme sambanu ye meme dia koko; mafwete kala malunga.+
7 Kafwete tambika efa mosi se lukau lwa mbwaza mu kuma kia mwan’a ngombe a koko, efa mosi mu kuma kia meme dia koko ye mu kuma kia wan’a mameme ovana konso kina kelenda. Otambika yini mosi ya mazi muna konso efa.
8 “‘Vava o mfumu kekota, kafwete kotela vana veta kia vitu, i vana mpe kevaikila.+
9 Vava o nkangu a nsi ukwiza vana ntadisi a Yave muna ntangw’a nkinzi,+ awana bekotela kuna vitu dia node mu kwiza sambila,+ bafwete vaikila kuna vitu dia sude,+ awana bekotela kuna vitu dia sude bafwete vaikila kuna vitu dia node. Ke vena muntu ko ovaikila muna vitu dina kakotele, kadi awonso bafwete vaikila kuna vitu ditalanene ye dina kakotele.
10 Vo i mfumu ona wina vana kati kwau, kafwete kota vava o nkangu ukota, yo vaika vava o nkangu uvaika.
11 Muna nkinzi ye muna nsungi za nkinzi, o lukau lwa mbwaza lufwete kala lwa efa mosi mu kuma kia mwan’a ngombe a koko, efa mosi mu kuma kia meme dia koko, ye mu kuma kia wan’a mameme olenda vana konso kina kelenda, kumosi ye yini mosi ya mazi muna konso efa.+
12 “‘Avo mfumu okubikidi lukau lwawonso lwa ngioka+ yovo kimenga kia ungudi se lukau lwa mvevo kwa Yave, e vitu ditadidi kuna este diziulwa mu kuma kiandi, oyandi okubika lukau lwandi lwawonso lwa ngioka ye yimenga yandi ya ungudi, wauna kevanganga muna Lumbu kia Vundu.+ Vava kevaika, e vitu difwete zikwa.+
13 “‘Konso lumbu, ofwete kubika mwan’a meme a koko alunga wa mvu mosi se lukau lwawonso lwa ngioka kwa Yave.+ I wau ovanga konso mene.
14 Kumosi yo mwan’a meme a koko, okubika mpe tini kia sambanu kia efa se lukau lwa mbwaza konso mene, kumosi ye tini kiatatu kia yini ya mazi ma zazila vana mfumfu se lukau lwa mbwaza kwa Yave lwa ntangwa ke ntangwa. Owau nkanikinu a mvu ke mvu.
15 Konso mene, bafwete kubika mwan’a meme a koko yo lukau lwa mbwaza yo mazi se lukau lwawonso lwa ngioka lwa ntangwa ke ntangwa.’
16 “I wau wuwu kavovele o Mfumu Yave: ‘Avo mfumu ovene lukau se vua kwa mosi-mosi muna wan’andi, o lukau lolo lukituka se vua dia wan’andi. Olwalu i lukau luna batambwidi se vua.
17 Kansi, avo obongele lukau muna vua diandi yo vana lo kwa selo yandi, o lukau lolo lukala se lwa selo yandi yamuna mvu wa luvevoko;+ i bosi, o lukau luvutulwa kwa mfumu. Vua kaka diveno kwa wan’andi i dikala se diau yakwele mvu.
18 O mfumu kafwete yinga nkangu ko muna ntoto au kimana kabonga konso vua diau. E vua kevana kwa wan’andi difwete tuka muna ntoto a yandi kibeni, kimana valembi kala mosi muna nkangu ame oyinganeswa muna ntoto andi.’”
19 I bosi, undete kuna nkotelo+ ina kuna ndambu a vitu difilanga kuna masuku madila mavauka ma anganga, mana matadidi kuna node,+ kukedi fulu kuna nima, kuna weste.
20 Umpovese vo: “Ekiaki i fulu kina anganga belambila lukau lwa kuzuka yo lukau lwa sumu, ivana beyokela lukau lwa mbwaza,+ kimana balembi nata konso lekwa kuna yanzala kiambazi yo sambukisa o vauka kwau kuna kwa nkangu.”*+
21 Undete kuna yanzala kiambazi yo kumpiokesela muna konko yá ya yanzala, mbwene yanzala kiakete kuna konso konko kia yanzala kiambazi.
22 Muna konko yá ya yanzala mukedi yanzala yakete ya yinkoso* 40 muna lá, yinkoso 30 muna lambuka. E yanzala yakete yau yá ikedi tezo kimosi.*
23 Muna kati kwa yanzala yakete yau yá mukedi vuandilwa ya matadi kuna konso sambu, vana yand’a vuandilwa vakedi fulu ya lambila tukau.
24 I bosi, umpovese vo: “Eyayi i fulu ina* awana besadilanga muna tempelo belambila yimenga ya nkangu.”+
Mvovo vana yand'a lukaya
^ I sia vo, vana veviokelanga e kielo avo kiziwilu.
^ Mvovo wa sina: “yo vaula o nkangu.”
^ Yovo “E yanzala yau yá ye mpila yatungilwa muna konko, ikedi tezo kimosi.”
^ Mvovo wa sina: “Ezazi i nzo zina.”
