Yezekele 47:1-23
47 I bosi, umputwidi kuna nkotelo a tempelo,+ okwakuna mbwene maza mevaikanga kuna nsi a sumbuka* kia tempelo+ yo kukula kuna ndambu a este, kadi e tempelo yatala kuna este. O maza mekukulanga tuka kuna nsi a sambu dia lunene dia tempelo, kuna sude ya ziku.
2 I bosi, umpaikisi kuna mbazi, muna nzil’a vitu dia node.+ Kuna mbazi, undete yakuna vitu dia este,+ mbwene maza mevaikanga tuka kuna sambu dia lunene.
3 O muntu vava kavaikidi yo kwenda kuna este yo nsing’andi a tezela,+ otezele yinkoso* 1.000, umpiokesele muna maza; o maza malweke yamuna nsingu za malu.
4 I bosi, otezele diaka yinkoso 1.000, umpiokesele muna maza, o maza malweke yamuna makungunu.
Otezele diaka yinkoso 1.000, umpiokesele muna maza, o maza malweke yamuna luketo.
5 Vava katezele diaka yinkoso 1.000, o maza makedi se nzadi, kilendele yo sauka kiamalu ko; muna sauka, o muntu kafwete siensia kadi e za kisakidi, e nzadi ke ilendi saukwa kiamalu ko.
6 Ungiuvuidi vo: “E mwan’a muntu, nga omwene ediadi e?”
I bosi, umfididi, umputwidi kuna kumu dia nzadi.
7 Vava mvutukidi, mbwene vo muna makumu mau mole ma nzadi mukedi nti miayingi.+
8 Umpovese vo: “O maza mama mekukulanga kuna zunga kia este yo kulumuka kuna Araba*+ yo bwa muna kalunga. Vava maza momo mebwa muna kalunga,+ o maza mena mo mewukwa.
9 Konso kuna kuviokela o maza,* e vangwa yamoyo yawonso ikala o moyo. Mu zala yo ulolo wa mbizi za maza, kadi o maza mama melwaka kwakuna. O maza ma kalunga mewukwa, konso kuna meviokela e lekwa yawonso ikala o moyo.
10 “Abaki a mbizi betelama vana kumu diandi tuka kuna Engedi+ yakuna Ene-ngelaime, kuna kukala e fulu kiayanikina makonde mau. Vekala ye ulolo wa mbizi za mpila mu mpila nze mbizi za Mbu Anene.*+
11 “Vekala ye ntaka ye zinga ya maza, e fulu yoyo ke iwukwa ko. Ikala kaka mungwa ye mungwa.+
12 “Muna makumu mau mole ma nzadi, mumena nti mia mpila zawonso mia dia. Makaya mau ke melengela ko; e nti ke mikondwa bundu ko. Miyima bundu yampa ngonde ke ngonde, kadi o maza mau kuna tempelo metuka.+ E bundu yau ikala se madia, o makaya mau mesadilwa muna wuka.”+
13 I wau wuwu kavovele o Mfumu Yave: “Ekiaki i zunga kina nukayanesa se vua dia nsi kwa makanda 12 ma Isaele, o Yosefe otambula kunku yole.+
14 Oyeno nuvua e nsi, nutambula kunku yafwanana.* Yadia e ndofi vo ivana e nsi yayi kwa akulu eno,+ owau iveno* kwa yeno se vua.
15 “Owau i mwingilu a nsi kuna node: Uyantikila kuna Mbu Anene muna nzila ikwendanga kuna Ketelone+ yakuna Sedade,+
16 Kamati,+ Berota+ ye Siberaime, eyi ina vana kati kwa zunga kia Damaseke ye zunga kia Kamati, yakuna Kase-yatikone, eyi ina vana mwingilu a Kaverane.+
17 Ozevo, o mwingilu utuka kuna mbu yakuna Kasare-enone,+ muna mwingilu a Damaseke, kuna node, ye muna mwingilu a Kamati.+ Owau i mwingilu a node.
18 “Kuna este, uviokela vana kati kwa Kaverane ye Damaseke muna nlambu a Yodani, vana kati kwa Ngiladi+ ye nsi a Isaele. Nufwete teza tuka vana mwingilu* yakuna mbu a este.* Owau i mwingilu a este.
19 “O mwingilu wa sude uyantikila tuka kuna Tama yakuna maza ma Meribate-kadese,+ i bosi tuka kuna Ndimba* yakuna Mbu Anene.+ Owau i mwingilu a sude.
20 “Kuna weste i kwina o Mbu Anene, tuka muna mwingilu* yavana fulu kiatalana ye Lebo-Kamati.*+ Owau i mwingilu a weste.”
21 “Nukayana e nsi yayi yeno ye yeno, muna makanda 12 ma Isaele.
22 Nufwete kayanesa e nsi se vua, oyeno ye nzenza zizinganga yeno, ana bawuta o wana vovo nuina; bekala kwa yeno se Aneyisaele akingutukila. Betambula e vua kumosi yo yeno vana vena makanda ma Isaele.
23 Muna zunga kia kanda dina kezingilanga o nzenza i mûna nufwete kumvanina e vua diandi,” u kavovele o Mfumu Yave.
Mvovo vana yand'a lukaya
^ I sia vo, vana veviokelanga e kielo avo kiziwilu.
^ Yovo “nzanza.”
^ Mvovo wa sina: “nkoko miau miole.”
^ I sia vo, Mediterrâneo.
^ Mvovo wa sina: “konso muntu otambula tezo kimosi yo mpangi andi.”
^ Mvovo wa sina: “owau ibwidi.”
^ I sia vo, mwingilu a node.
^ I sia vo, Mbu Afwa.
^ I sia vo, Ndimb’a Engipito.
^ I sia vo, mwingilu a sude.
^ Yovo “fula dia Kamati.”