Yezekele 5:1-17
5 “Vo i ngeye, e mwan’a muntu, bonga o nsosolo watoma twa wasadila wo nga mbele a vuayi.* Zenga e nsuki zaku ye nzevo zaku, i bosi, teza e nsuki ye nzevo vana balanza yo vambula zo mu kunku tatu.
2 Vava kifokoka e nzungilu a mbanza, ongeye oyoka e kunku kiantete vana tiya.+ I bosi, obonga e kunku kiankaka yo wanda kio o nsosolo muna kinzieta kia mbanza.+ Omwanganesa e kunku kiansuka muna tembwa, omono ivola o nsosolo yo kubalakama.+
3 “Obonga mpe findambu muna kunku kiansuka yo kanga fio muna nswiku a* mvuatu aku.
4 Bonga diaka findambu ye tuba fio vana tiya, wayoka fio. O tiya twatu tumwangana muna nzo yawonso ya Isaele.+
5 “I wau wuwu kavovele o Mfumu Yave: ‘Eyayi i Yerusaleme. Nsidi yo vana kati kwa zula, kumosi ye nsi zawonso zinzungidi.
6 Kansi e Yerusaleme ikolamen’e nzengo zame za mfundisa ye mîna miame, ivangidi mambu mambi lutila nkutu e zula ye nsi zawonso zizungidi yo.+ Kadi o nkangu andi ubembwele nzengo zame za mfundisa, ke udiatidi muna mîna miame ko.’
7 “Ozevo, i wau wuwu kavovele o Mfumu Yave: ‘Wau vo oyeno nu akwa lulendo lutila e zula yawonso inuzungidi, ke nudiatidi muna mîna miame ko ngatu lemvokela e nzengo zame za mfundisa, kansi nulende kweno e nzengo za mfundisa za zula yawonso inuzungidi,+
8 i wau wuwu kavovele o Mfumu Yave: “Isidi e kitantu, e mbanza,+ fundisa ifundisa vovo kati kwaku, vana meso ma zula.+
9 Mu kuma kia mavangu maku mawonso mangemi, ivanga kwa ngeye mana kisidi vanga ko ye kisinga mo vanga mpe diaka ko.+
10 “‘“Amase vovo kati kwaku bedia wan’au,+ o wana bedia mase mau, fundisa ifundisa vovo kati kwaku yo mwanganesa muna ndambu zawonso* ana besala.”’+
11 “I wau wuwu kavovele o Mfumu Yave: ‘E nkal’ame kaka, wau vo osafwidi nzo ame avauka muna teke yaku yawonso yafunzuka ye muna mavangu maku mawonso mangemi,+ omono mpe bembola ikubembola;* e disu diame ke dikufwila nkenda ko, omono kibeni mpe kikufwila nkenda ko.+
12 E kunku kiantete kia nkangu aku kifwila muna vuku* yovo kifukila ova kati kwaku mu kuma kia mvengele. E kunku kiazole kifwila muna nsosolo+ muna kinzieta kiaku kiawonso. E kunku kiansuka imwanganesa kio muna ndambu zawonso,* ivola o nsosolo yo kubalakama.+
13 I bosi, makasi mame mefokoka, e nganzi zame mu kuma kiau zivila, omono iyangalala.+ Vava imana songa e nganzi zame muna yau, bezaya wo vo mono Yave mpovele, wau vo ivavanga kaka vo wantu basambila kaka mono.+
14 “‘Ikukitula se fulu kiafwasakana, se lekwa kia luvezo vana vena e zula izungidi ye vana meso ma awana beviokela vovo wina.+
15 Vava ikufundisa muna makasi, nganzi ye tumbu yangolo, okituka se lekwa kia lusembo ye kia luvezo,+ se mbandu a lulukisu ye kuma kia mwena o wonga kwa zula izungidi. Mono Yave mpovele wo.
16 “‘Ikubatwikila nzanza zampondi za mvengele mu kubavonda. E nzanza itwika zikunufwasa.+ Iwokesa o mvengele eno mu fwasa madia meno mawonso.*+
17 Ikunutwikila mvengele ye bulu yansisi ya mfuta+ mu fukisa o wan’eno. E vuku ye mbungulwa menga izala omu ngeye, ikutwasila o nsosolo mu kunuanisa.+ Mono Yave mpovele wo.’”
Mvovo vana yand'a lukaya
^ I sia vo, mbele yatoma twa ya zengela nzevo ye nsuki.
^ Yovo “muna nsele za.”
^ Mvovo wa sina: “muna tembwa yawonso.”
^ Yovo “kevesa ikukevesa.”
^ Yovo “mayela.”
^ Mvovo wa sina: “muna tembwa yawonso.”
^ Mvovo wa sina: “tolola itolola o nkau a mbolo.” Nanga nkau wamanikwanga e mbolo zakala nze nlunga uyikanga.