Yezekele 7:1-27
7 E diambu dia Yave dizidi diaka kwa mono, oku vo:
2 “Vo i ngeye, e mwan’a muntu, i wau wuwu kavovele o Mfumu Yave kwa nsi a Isaele: ‘E mbaninu! E mbaninu a konko yau yá ya nsi ilweke.
3 Owau e mbaninu aku ilwakidi. Ikuvaikisila o makasi mame, ikufundisila mun’owu wa nzila zaku yo kutumba mu kuma kia mavangu maku mawonso mangemi.
4 E disu diame ke dikufwila nkenda ko;+ omono kibeni mpe kikufwila nkenda ko, ikutwasila e mfwilu mia nzila zaku, ongeye omona e mpasi za mavangu maku mangemi.+ Nuzaya wo vo mono i Yave.’+
5 “I wau wuwu kavovele o Mfumu Yave: ‘Tala! E mpasi mu kwiza zina, e mpasi zilembi tezakana.+
6 E mbaninu mu kwiza ina. E mbaninu ikwiza; e mbaninu ikutelamena.* Tala! E mbaninu mu kwiza ina.
7 Ongeye ozingilanga omu nsi, e ntangw’aku ifwene.* E ntangwa mu kwiza ina, e lumbu kifinamene.+ Mvuanga ina muna miongo, ke kazu ya kiese ko.
8 “‘Ke kolo ko ikuyitidila e nsita zame,+ ikuvaikisila o makasi mame mawonso,+ ikufundisila mun’owu wa nzila zaku yo kutumba mu kuma kia mavangu maku mawonso mangemi.
9 E disu diame ke dikufwila nkenda ko;+ omono kibeni mpe kikufwila nkenda ko. Ikutwasila e mfwilu mia nzila zaku, ongeye omona e mpasi za mavangu maku mangemi. Nuzaya wo vo mono i Yave, mono ikunuwandanga.+
10 “‘Tala e lumbu! Tala, mu kwiza kina!+ E ntangw’aku ifwene;* o nkau usavukidi, o umvuania uvaikisi e mvuma.
11 O nsoki ukolele yo kituka se nkau a umpumbulu.+ Ke vesala kana lekwa kimosi ko, kana yau, kana mavua mau, kana nkangu miau ngatu tunda diau.
12 E ntangwa ikwiza, e lumbu kifwana. Yambula o nsumbi kalembi mona e kiese, o nteki kalembi nionga, kadi makasi ma Nzambi mafusukidi muna nkangu au awonso.*+
13 Kadi o nteki ke vutukila kina katekele ko, kana nkutu vo osidi moyo, kadi o mambu ma mona-meso mebwila nkangu awonso. Ke mosi ko ovutuka. Mu kuma kia bi wandi,* ke mosi ko ovuluza o moyo andi.
14 “‘Basikidi e mpungi,+ wantu awonso bakubamene, kansi ke mosi ko wele kuna vita, kadi makasi mame mefusukila nkangu awonso.+
15 O nsosolo una kuna mbazi,+ e vuku yo mvengele una omu kati. Konso ndiona wina muna mpatu ofwila muna nsosolo, o mvengele ye vuku kivonda awana bena muna mbanza.+
16 Wantu au ana besala o moyo, ana belenda o tina, bekwenda kuna miongo; konso muntu muna yau obuma mu kuma kia bi wandi nze mayembe ma ndimba.+
17 O moko mau mawonso mezeza, o makungunu mawonso mesonsa o maza.*+
18 Bavuete e ngoto,+ babakamene* kwa zaka-zaka. Yau awonso befusulwiswa e nsoni, e ntu miau miawonso mikituka se luvanda.*+
19 “‘Betuba palata au muna nzila, o wolo wau ukituka se wasafuka kwa yau. Kana nkutu palata au ngatu wolo wau ke ulenda kubavuluza ko muna lumbu kia makasi ma Yave.+ Ke beyukuta ko ngatu zadisa e vumu yau, kadi ikituka* se tadi diatela sakuba dikubafilanga muna mbi.
20 Bayisanini mu kuma kia wete wa lekwa yau yaviengesela nitu, bavangidi yo* e fwaniswa yangemi, e teke yau yangemi.+ Kiaki i kuma ikitulwila e palata ye wolo wau se wasafuka kwa yau.
21 Iyekola yo* vana moko ma nzenza babaka yo ye kwa yimpumbulu ya nza basanza yo, oyau besafula yo.
22 “‘Ikatula e ndose ame kuna bena,+ besafula e fulu kiame kiaswekama,* e mivi bekota mo yo safula kio.+
23 “‘Vanga e ngonzi,*+ kadi e nsi izele ye mfundisa za mbungul’a menga,+ e mbanza izele yo nsoki.+
24 Itwasa nkangu usundidi o bi,+ o nkangu wowo uvua e nzo zau,+ isukisa umvuania wa akwa nkuma, e fulu yau yavauka isafuka.+
25 Vava e mpasi zilwaka, bevava luvuvamu, kansi ke lukala ko.+
26 Lufwasu lukwiza vana ntandu a lufwasu ye nsangu kuna nim’a nsangu. Wantu bevava e mona-meso kwa angunza,+ kansi o nsiku wa* anganga ye longi dia akuluntu divila.+
27 O ntinu mu kifwidi kekala,+ o nkuluntu odimbula e vuvu, o moko ma nkangu mezakama mu kuma kia wonga. Ikubavangila mambu mun’owu wa nzila zau, ikubafundisila una befundisilanga akaka. Bezaya wo vo mono i Yave.’”+
Mvovo vana yand'a lukaya
^ Mvovo wa sina: “e mbaninu ikusikamena.”
^ Nanga, “e kolowa aku ya mvuma izidi.”
^ Nanga, “e kolowa aku ya mvuma izidi.”
^ I sia vo, kiakala awana betekanga ntoto ye awana besumbanga ntoto ke bevua nluta ko, kadi lufwasu lukwiza kwa wantu awonso.
^ Nanga, “Muna bi wandi.”
^ I sia vo, mesonsa masuba mu kuma kia wonga.
^ I sia vo, e ntu miau mivalwa se sinsu kia kifwidi.
^ Mvovo wa sina: “bafukilu.”
^ I sia vo, e palata au ye wolo wau.
^ I sia vo, e lekwa yau ya wolo ye palata.
^ I sia vo, e palata au ye wolo wau besadilanga mu vanga e teke.
^ Nanga i fulu kia kati kia nzo avauka a Yave.
^ I sia vo, ngonzi za kimbakami.
^ Yovo “luludiku lwa.”
