Yezekele 8:1-18
8 Muna mvu wa sambanu,* muna ngonde yasambanu, muna lumbu kiatanu kia ngonde yoyo, vava nkedi yafonga muna nzo ame ye akuluntu a Yuda bafongele vana ntadisi ame, o koko kwa Mfumu Yave kwizidi omu mono.
2 Ekolo ntadidinge, mbwene fwaniswa kina ye mpw’a tiya; tuka vana vakedi nze luketo+ yakuna yanda vakedi tiya, tuka vana luketo yakuna ntandu e mpw’andi yankezimi, nze sengwa kia nkezimi.*+
3 I bosi, olambwidi kina kikedi nze koko yo kunsimba muna nsuki za ntu ame, o mwanda unzangwidi vana kati-kati kwa zulu yo ntoto, undete kuna Yerusaleme muna mona-meso ya Nzambi, vana mwelo a vitu diakati+ ditadidi kuna node, vana vakedi e teke* kia kimpala kina kitwasanga kimpala.+
4 O nkembo a Nzambi a Isaele ukedi vana,+ nze mpwa ina yamona kuna ndimba.+
5 I bosi, umpovese vo: “E mwan’a muntu, dodokolo sengola o meso kuna node.” Muna kuma kiaki nsengwele o meso kuna node, okwakuna, kuna node ya vitu dia ziku, kuna nkotelo, kukedi e teke* kia kimpala.
6 Umpovese vo: “E mwan’a muntu, nga omwene mambu mambi ye mangemi mevanganga e nzo a Isaele ovava,+ mana mekumfilanga mu vavuka e nzo ame avauka?+ Kansi ongeye omona mambu mangemi masundidi omama.”
7 I bosi, undete vana mwelo a yanzala, vava ntadidi, mbwene vundu muna yaka.
8 Umpovese vo: “E mwan’a muntu, dodokolo vongesa e vundu dina muna yaka.” Muna kuma kiaki mvongese e vundu muna yaka, mbwene mwelo.
9 Umpovese vo: “Kota wamona mambu mambi ye mangemi bevanganga mo.”
10 Muna kuma kiaki, nkotele yo tala, mbwene mpila zawonso za fwaniswa ya bulu iyatatanga+ ye bulu yangemi ye teke yawonso yangemi* ya nzo a Isaele;+ yabandulwa muna yaka yawonso.
11 Vana ntadisi a lekwa yayi, vatelamene 70 lwa akuluntu a nzo ya Isaele kumosi yo Yazaneya wa mwan’a Safani.+ Konso muntu okedi ye yokelwa kia ndumbu vana koko yo futumuna mwisi wa nsunga za ndumbu.+
12 Umpovese vo: “E mwan’a muntu, nga omwene dina akuluntu a nzo ya Isaele bevanganga muna tombe, konso muntu muna masuku makati muna mwabandulwa e teke? Kadi edi bevovanga vo: ‘O Yave ke kutumonanga ko. O Yave oyambwidi e nsi.’”+
13 Umpovese mpe vo: “Ongeye omona diaka mambu masundidi e ngemi mana bevanganga.”
14 Muna kuma kiaki, undete vana nkotelo a vitu dia nzo a Yave kuna node, okwakuna mbwene akento bafongele, bedilanga nzambi Tamuze.
15 Umpovese diaka vo: “E mwan’a muntu, nga omwene mo? Omona diaka mambu mangemi masundidi nkutu omama.”+
16 I bosi, undete vana yanzala kiakati kia nzo a Yave.+ Vana nkotelo a tempelo a Yave, vana kati-kati kwa veta kia mwelo ye ziku, vakedi tezo kia 25 ma wan’amakala bafididi e nima zau kuna tempelo a Yave ye ndose zau zatala kuna este; bavumbamene yo sambila e ntangwa kuna este.+
17 Umpovese vo: “E mwan’a muntu, nga omwene wo? Nga e nzo a Yuda ibenze vo o mambu mangemi bevanganga, mazadisa e nsi yo nsoki+ yo kwamanana kunkendeleka diambu diakete? Tala! Mu yala bena e ndala* ova nzunu ame.
18 Muna kuma kiaki, mu makasi ivangila o mambu; e disu diame ke dikubafwila nkenda ko;+ omono kibeni mpe kikubafwila nkenda ko. Kana nkutu vo bakazidi mu nding’angolo muna matu mame, kikubawá ko.”+
Mvovo vana yand'a lukaya
^ I sia vo, mvu wa sambanu wa kinkole kia Yoyakine wa Ntinu, Yezekele ye Ayuda ankaka. (Tala Yezekele 1:2).
^ Sengwa kia wolo yasangana ye palata.
^ Yovo “fwaniswa.”
^ Yovo “fwaniswa.”
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Nanga ndala zasadilwanga muna nsambil’a teke.
