Yezekele 9:1-11
9 I bosi, obokele mu nding’angolo muna matu mame, oku vo: “Nukutakesa awana betwasa e tumbu muna mbanza, konso muntu ye nuaninua kiandi kia vondela vana koko!”
2 Mbwene wantu sambanu batukidi kuna nzil’a vitu diantandu,+ diatala kuna node, konso muntu okedi ye nuaninua kiandi kia vondela vana koko; vana kati kwau vakedi muntu ovuete mvuatu a lino, ye bungwa kia* tinta yansoneki vana luketo lwandi. Bakotele, batelamene vana ndambu a ziku dia nsongo.+
3 I bosi, o nkembo a Nzambi a Isaele+ una ukedi vana ntandu a akelubi ukatukidi, wele vana sumbuka* kia nzo.+ Nzambi obokele muntu ovuete mvuatu a lino, ona okedi ye bungwa kia tinta yansoneki vana luketo.
4 Yave ovovese kwa muntu vo: “Wenda muna mbanza, muna Yerusaleme, sia e dimbu vana nkuta za lose za wantu ana bebumanga+ yo nionga mu kuma kia mambu mawonso mangemi mevangwanga muna mbanza.”+
5 Ngwidi muna matu mame vava kavovese akaka vo: “Nuenda muna mbanza, nulanda ona ovitidi, nuvonda o wantu. Ke nuyambula ko vo o meso meno mabafwila e nkenda ngatu kubavukisa.+
6 Nufwete vonda yau awonso, mbut’a muntu, toko, ndumba, kingiana-ngiana ye akento.+ Nuyantikila muna nzo ame avauka.+ Kansi, ke nufinama konso muntu ko una ye dimbu.”+ Bayantikidi vonda akuluntu ana bakedi vana ntwal’a nzo.+
7 I bosi, ubavovese vo: “Nufunzula e nzo yo zadisa e yanzala yo mavimbu.+ Nuenda!” Muna kuma kiaki, bavaikidi yo vonda o wantu muna mbanza.
8 Ekolo bavondanga, nsidi mono kaka, mbwidi mambukama yo kaza: “Ekwe Mfumu Yave! Nga ovonda awonso basidi muna Isaele, muna pongola e nsita zaku muna Yerusaleme?”+
9 Umvutwidi vo: “O bi wa nzo a Isaele ye Yuda wingi, wingi kikilu.+ E nsi izele ye mbungul’a menga,+ e mbanza izele ye minkondwa ziku.+ Kadi edi bavovele vo: ‘O Yave obembwele e nsi, o Yave kemonanga ko.’+
10 Vo i mono, e disu diame ke dikubafwila nkenda ko;+ omono kibeni mpe kikubafwila nkenda ko, itwasa e mfwilu mia nzila zau vana ntu miau.”
11 I bosi, mbwene o muntu ovuete mvuatu a lino, on’okedi ye bungwa kia tinta yansoneki vana luketo, ovutukidi yo vova vo: “Mvangidi wauna unkanikini.”
Mvovo vana yand'a lukaya
^ Yovo “mpok’a lundila.”
^ I sia vo, vana veviokelanga e kielo avo kiziwilu.
