Zasoneka Yoane 13:1-38
13 Vitila nkinzi a Nduta, Yesu wazaya wo vo e ntangw’andi+ yakatuka ova nza yayi yo kwenda kwa Se+ ifwene. Wau vo ozolele alandi andi ana bakedi ova nza, okwamanene kubazola yakuna nsuka.+
2 Ekolo bedianga nlekelo, o Nkadi ampemba wateka sia muna ntim’a Yuda wa musi Kereote+ wa mwan’a Simone, e ngindu za kunyekola.+
3 O Yesu wau kezeye wo vo o Se wayekeka e lekwa yawonso vana moko mandi, ye kwa Nzambi katuka, kwa Nzambi mpe kekwenda,+
4 otelamene vana nlekelo, okatwidi yunga kiandi. Obongele twaya, ozingidi dio muna luketo.+
5 I bosi, osidi maza muna longa, oyantikidi sukula malu m’alongoki yo kunguna mo muna twaya dina kayizingidi.
6 I bosi, olweke kwa Simone Petelo. Oyandi umvovese vo: “E Mfumu, ngeye osukula malu mame?”
7 Yesu umvutwidi vo: “Edi ivanganga, owau kubakula dio ko, kansi obakula dio vava kivioka e mambu mama.”
8 Petelo umvovese vo: “Kulendi sukula malu mame ko.” Yesu umvutwidi vo: “Avo kisukwidi malu maku ko,+ kuna yame ntwadi ko.”
9 Simone Petelo umvovese vo: “E Mfumu, kusukula kaka malu mame ko, kansi sukula mpe moko mame yo ntu ame.”
10 Yesu umvovese vo: “Konso ona oyowele, kavuidi mfunu akuyisukula ko, nanga malu mandi kaka, kadi watoma velela kwandi. Oyeno nuavelela, kansi ke yeno awonso ko.”
11 Kadi wazaya ona okunyekola.+ Kiaki i kuma kavovèle vo: “Ke yeno awonso ko nuavelela.”
12 Vava kamene sukula malu mau yo vuata yunga kiandi, ovuende diaka vana meza, ubavovese vo: “Nga nubakwidi dina inuvangidi e?
13 Oyeno nukungikilanga vo, ‘Nlongi’ ye ‘Mfumu,’ nulungidi kweno, kadi u ngina.+
14 Dianu vo, omono avo i Mfumu ye Nlongi, nsukwidi malu meno,+ oyeno mpe nufwete* sukula malu ma muntu yo nkwandi.+
15 Kadi inuvene e mbandu, wauna inuvangidi, i una nufwete vanganga mpe.+
16 Kieleka, kieleka, inuvovese vo, o ntaudi kaviokele mfumu andi o nene ko, ngatu o ntumwa kavioka ona wantuma.
17 Avo nuzeye mambu mama, nukala ye kiese avo nuvanga mo.+
18 Kivovele mu kuma kia yeno awonso ko; ibazeye ana yasola. Kansi mpovele wo kimana e sono eki kialungana:+ ‘Ona wadianga yame,* okitukidi se mbeni ame.’*+
19 Tuka owau, inuzayisi wo, una ke wavangamene ko, kimana vava uvangama nuakwikila vo i mono yuyu.+
20 Kieleka, kieleka, inuvovese vo, konso ona otambula ndiona ntumini, mono mpe ketambula.+ Konso ona okuntambula, otambula mpe Ndiona wantuma.”+
21 Yesu vava kavovele mambu mama, omwene kikilu ntantu, osidi umbangi, oku vo: “Kieleka, kieleka, inuvovese vo, mosi vovo nuina okungiekola.”+
22 Alongoki bayantikidi talaziana, kadi ke bazeye ko kana nani kayikidi.+
23 Mosi muna alongoki andi, ona o Yesu katoma zolanga,+ wavuanda kumosi yo* Yesu.
24 Simone Petelo unvangidi sinsu muna ntu, umvovese vo: “Utusamunuina nani kayikidi.”
25 Muna kuma kiaki, ndiona oyekamene vana tulu kia Yesu, unyuvuidi vo: “E Mfumu, nani ndioyo?”+
26 Yesu ovutwidi vo: “I yandi yuna ivana tini kia mbolo kina ivunga muna longa.”+ Vava kavungidi e mbolo, ovene yo kwa Yuda wa mwan’a Simone wa musi Kereote.
27 Vava Yuda katambwidi e mbolo, Satana okotele muna yandi.+ Yesu umvovese vo: “Dina ovanga, vanga dio mu nzaki.”
28 Kansi, ke vakedi mosi ko vana meza wabakula e kuma kamvovesele wo.
29 Kadi ankaka babenze vo, wau vo Yuda wakala ye nkel’a nzimbu,+ Yesu wamvovesa vo: “Sumba kina tuvuidi o mfunu muna nkinzi,” yovo kavana lekwa kwa asukami.
30 Vava katambwidi e mbolo, vana vau ovaikidi kuna mbazi. O kuma kufwidi.+
31 Vava kavaikidi, Yesu ovovele vo: “Owau Mwan’a muntu okembeswa,+ o Nzambi mpe okembeswa muna yandi.
32 Nzambi yandi kibeni okunkembesa,+ okunkembesa vana vau.
33 E wan’ame anzolwa, kolo kiakete ikala yeno. Nukumpava; wauna yavovesa Ayuda vo: ‘Kuna ikwenda, oyeno ke nulendi ko kwenda ko,’+ owau mpovele wo mpe kwa yeno.
34 Nkanikinu ampa inuvene, nuzolaziana; wauna inuzolele,+ i una mpe nuzolazianina.+
35 Muna wau i bezayila o wantu awonso vo nu alongoki ame—avo nzolani nuna yau.”+
36 Simone Petelo umvovese vo: “E Mfumu, akweyi okwenda?” Yesu ovutwidi vo: “Kuna ikwenda, kulendi kwiz’a ndandi ko owau, kansi kuna sentu okundanda.”+
37 Petelo umvovese vo: “E Mfumu, ekuma kilendi kulandila owau ko? Iyekola o moyo ame muna wete diaku.”+
38 Yesu umvutwidi vo: “Moyo aku oyekola mu kuma kiame? Kieleka, ivovese vo, vitila e nsusu yakokola, okumpanina nkalu nkumbu tatu.”+
Mvovo vana yand'a lukaya
^ Yovo “oyeno mpe luna ye mbebe ya.”
^ Mvovo wa sina: “mbolo ame.”
^ Mvovo wa sina: “unzangulwidi bombo kia kulu.”
^ Mvovo wa sina: “vana tulu kia.”
