Zasoneka Yoane 21:1-25
21 I bosi, Yesu omonekene diaka kwa alongoki andi kuna Mbu a Tiberia. Mu mpila eyi kamonekene:
2 Simone Petelo kumosi kakala yo Toma, (ona wayikilwanga vo Dipasa),+ ye Natanaele+ wa musi Kana a Ngalili, ye wan’a Zebedayo+ ye alongoki andi wole akaka.
3 Simone Petelo ubavovese vo: “Ngiele baka mbizi zame za maza.” Bamvovese vo: “Tuzolele kwenda yaku.” Bavaikidi, bakotele muna nzaza, kansi muna fuku wauna ke babakidi kima ko.+
4 Ekolo kuma kwakianga, Yesu otelamene vana kumu, kansi alongoki ke babakwidi wo ko vo i Yesu.+
5 I bosi, Yesu ubavovese vo: “Aleke, nga lekwa* kia dia luna kiau e?” Bamvutwidi vo: “Ve!”
6 Ubavovese vo: “Nutuba e konde kuna lunene lwa nzaza, nuabaka e mbizi.” Batubidi e konde, kansi ke balendele dio vola ko mu kuma kia mbizi zayingi.+
7 I bosi, o nlongoki ona Yesu katoma zolanga+ ovovese Petelo vo: “Ndioyo i Mfumu!” O Simone Petelo vava kawidi vo i Mfumu, ovuete* kinkutu kiandi, kadi nkonga* kakala, uyitubidi muna mbu.
8 Alongoki akaka bezidi muna nzaza yakete, bavolele e konde diazala ye mbizi, kadi lukufi bakala ye kumu, tezo kia 300 za tambi.*
9 Kansi, vava batombokele vana seke, bamwene tiya ye mbizi vana makala ye mbolo.
10 Yesu ubavovese vo: “Nutwasa ezaka mbizi zina nubakidi owau.”
11 Simone Petelo wele muna nzaza, ovolele e konde vana seke, diazala ye mbizi, 153 dia mbizi zanene. Kana una vo zayingi zakala, e konde ke diabakuka ko.
12 Yesu ubavovese vo: “Nuiza dia.” Kansi, ke mosi ko vana vena alongoki wakala yo unkabu wakunyuvula vo: “Ongeye u nani e?” kadi bazaya wo vo i Mfumu.
13 Yesu wizidi, obongele mbolo kumosi ye mbizi, ubavene zo.
14 Eyayi i mboneka yatatu+ kamonekene o Yesu kwa alongoki andi vava kafuluka muna mafwa.
15 Vava bamene dia, Yesu oyuvuidi Simone Petelo vo: “E Simone wa mwan’a Yoane, nga olutidi kunzola ke mu yayi ko e?” Umvutwidi vo: “Ingeta, e Mfumu, ozeye wo vo zola ikuzolanga.” Umvovese vo: “Dikila wan’ame a mameme.”+
16 Unyuvuidi diaka mu nkumbu a nzole vo: “E Simone wa mwan’a Yoane, nga zola okunzolanga e?” Umvutwidi vo: “Ingeta, e Mfumu, ozeye wo vo zola ikuzolanga.” Umvovese vo: “Vungula mameme mame.”+
17 Unyuvuidi mu nkumbu a ntatu vo: “E Simone wa mwan’a Yoane, nga zola okunzolanga e?” Petelo omwene ntantu wau kanyuvuidi nkumbu ina yatatu vo: “Nga zola okunzolanga e?” Dianu, umvutwidi vo: “E Mfumu, ongeye ozeye mawonso; ozeye wo vo zola ikuzolanga.” Yesu umvovese vo: “Dikila mameme mame.+
18 Kieleka, kieleka ivovese vo, vava wakala toko, ngeye kibeni wavuatanga yo kwenda konso kuna ozolele. Kansi, vava onuna, olambula moko maku, muntu akaka okuvuika yo kunata kuna kuzolele ko.”
19 Ovovele diambu diadi muna songa vo e mpila o Petelo kefwila, Nzambi ikembelela. Vava kavovele wo, umvovese vo: “Kwamanana kundanda.”+
20 Petelo ovilukidi, omwene nlongoki ona Yesu katoma zolanga+ okwiza alandinge, ndiona wayekama vana tulu kia Yesu muna nlekelo, ndiona wanyuvula vo: “E Mfumu, nani okuyekola?”
21 O Petelo vava kamwene, ovovese Yesu vo: “E Mfumu, adieyi tuvova mu kuma kia ndioyu?”
22 Yesu umvovese vo: “Avo nzolele wo vo kakala o moyo yavana ikwiza, ekuma otokanenanga? Ongeye kwamanana kundanda.”
23 Dianu vo, e diambu diadi dimwanganene vana vena ampangi vo, o nlongoki ndioyo ke fwa ko. Kansi o Yesu kamvovesa ko vo nlongoki ndioyu ke fwa ko, edi kavova vo: “Avo nzolele wo vo kakala o moyo yavana ikwiza, ekuma otokanenanga?”
24 I yandi ndioyu o nlongoki+ ona osianga umbangi wa mambu mama yo soneka mo, tuzeye wo vo umbangi wandi waludi.
25 Kieleka, vena mpe ye mambu mayingi mankaka mana Yesu kavanga, kele vo mawonso masonekwa, nanga e nza ke yadi fwana nkanda miasonama ko.+
