Zasoneka Yoane 7:1-52
7 I bosi, Yesu wele azieti muna Ngalili, kadi kazolele kwenda zieti muna Yuda ko, e kuma kadi, Ayuda bavavidi kumvonda.+
2 Kansi o Nkinzi a Ayuda wa Saba*+ wafinamanga.
3 Dianu vo, aleke andi+ bamvovese vo: “Katuka vava, wenda kuna Yuda, kimana alongoki aku bamona mavangu mana ovanganga.
4 Kadi ke vena muntu ko ovangilanga mambu kuna sweki avo ozolele zayakana kwa wantu. Avo mambu mama ovanganga, uyisonga kwa nza.”
5 Kadi aleke andi ke bakwikilanga muna yandi ko.+
6 Muna kuma kiaki, Yesu ubavovese vo: “E ntangw’ame ke yafwene ko,+ kansi kuna kwa yeno konso ntangwa yambote kwandi.
7 E nza ke ina ye kuma kia kunumenga ko, kansi mono imenganga, kadi isilanga yo umbangi vo mavangu mandi mambi.+
8 Oyeno nutomboka kuna nkinzi; omono ke wau ko itomboka kuna nkinzi wau, kadi e ntangw’ame ke yafwene ko.”+
9 Vava kabavovese mambu mama, okedi kaka muna Ngalili.
10 Kansi, vava aleke andi batombokele kuna nkinzi, oyandi mpe wele atomboki, kayisongele kwa ndonga ko, kansi ku sweki kaka.
11 Dianu vo, Ayuda bayantikidi kumvava kuna nkinzi, bavovele vo: “O muntu ndioyo akweyi kena?”
12 E ndonga iyantikidi wuninina kwayingi mu kuma kiandi. Akaka bavovele vo: “Muntu ambote kwandi.” Ankaka vo: “Ve. Ndonga kevukumunanga.”+
13 Kansi, mu kuma kia wonga wa Ayuda,+ ke vakedi muntu ko wavovanga mu kuma kiandi vana meso ma ndonga.
14 O nkinzi vava walwaka vana kati, o Yesu otombokele kuna tempelo, oyantikidi longa.
15 Ayuda basivikidi, oku vo: “Ondioyu, aweyi kazayidi e Sono,+ wau kalembele tanga sikola?”*+
16 Yesu ubavutwidi vo: “Mana ilonganga ke mame ko, ma ndiona wantuma kaka.+
17 Avo muntu ozolele vanga luzolo lwandi, ozaya kana vo e malongi ma Nzambi+ yovo ma mono kibeni.
18 Konso ona ovovela muna ngindu za yandi kibeni, nkembo andi kevavanga; kansi konso ona ovava nkembo a ndiona wantuma,+ waludi, o luvunu ke luna muna yandi ko.
19 Nga o Mose kanuvana Nsiku ko e?+ Kansi vava nuina ke mosi ko olemvokelanga Nsiku. Ekuma nuzolele kumpondela?”+
20 E ndonga bavutwidi vo: “Nkuya una wau. Nani ozolele kuvonda?”
21 Yesu ubavutwidi vo: “Sinsu kimosi kaka mpangidi, yeno awonso nusivikidi.
22 Ekiaki i kuma o Mose kanuvanina o nsiku a zengwa+—ke watuka kwa Mose ko, kansi kwa mase meno+—oyeno nuzenganga muntu muna lumbu kia vundu.
23 Avo yeno nuzenganga wantu muna lumbu kia vundu kimana o Nsiku a Mose walembi kululwa, ekuma numfungidi makasi mandudi wau nsaswidi o muntu omu lumbu kia vundu e?+
24 Nuyambula fundisila muna mpwa, kansi nufundisa kaka e mfundisa ya unsongi.”+
25 Ozevo, akaka muna esi Yerusaleme bavovele vo: “O muntu ndioyo, ke yandi ko bevavanga kimana bamvond’e?+
26 Kansi, owau mu vova kena ova meso ma ndonga, yau ke bamvovese diambu ko. Nga mfumu zeto babakwidi wo kieleka vo yandi i Kristu e?
27 Muntu ndioyo, tuzeye kuna katuka;+ kansi o Kristu vava kekwiza, ke muntu ko ozaya kuna ketuka.”
28 I bosi, ekolo kelongelenga muna tempelo, Yesu ovovele mu nding’a ngolo vo: “Nunzeye, nuzeye mpe kuna yatuka. Kiayizila mu luzolo lwa mono kibeni ko,+ kansi Ndiona wantuma waludi, oyeno ke nunzeye ko.+
29 Omono inzeye,+ kadi kwa yandi yatuka, yandi mpe wantuma.”
30 Muna kuma kiaki, bavavidi kumbaka,+ kansi ke vakedi ona unsidi moko ko, kadi e ntangw’andi ke yafwene ko.+
31 Kansi engi vana vena ndonga bakwikidi muna yandi,+ bavovele vo: “O Kristu vava kekwiza, nga sinsu yayingi kevanga ivioka ina kavangidi o muntu ndioyu e?”
32 Afarisi bawidi e ndonga iwunininanga mambu mama mu kuma kiandi, e nganga zambuta ye Afarisi batumini makesa bambaka.
33 I bosi Yesu ovovele vo: “Yakinu yeno mu fikolo, vitila ngienda kwa Ndiona wantuma.+
34 Nukumpava, kansi ke nukunsolola ko, kuna ikwenda, oyeno ke nulendi ko kwenda ko.”+
35 Ayuda bavovele kwa muntu ye nkwandi vo: “O muntu ndioyu akweyi kekwenda, oyeto twalembi kunsolola? Nga kwa Ayuda ana bamwangana muna Mingerekia kekwenda yo longa Mingerekia e?
36 Adieyi kazolele vova wau kavovele vo: ‘Nukumpava, kansi ke nukunsolola ko, kuna ikwenda, oyeno ke nulendi ko kwenda ko’?”
37 Muna lumbu kiansuka, e lumbu kianene kia nkinzi,+ o Yesu otelamene, ovovele mu nding’a ngolo vo: “Avo muntu omona e vuina, yambula keza kwa mono, kanua.+
38 Konso ona okwikilanga omu mono, wauna uvovele e sono: ‘Muna nsi andi a mbundu mukukwila o maza ma moyo.’”+
39 Kansi, ovovele ediadi muna diambu dia mwanda, una betambula ana bekwikilanga muna yandi; kadi ke batambwidi ntete mwanda ko,+ e kuma kadi o Yesu kakembeso ntete ko.+
40 Ankaka muna ndonga ana bawidi mambu mama, bavovele vo: “Ndioyu Ngunza kieleka.”+
41 Ankaka bavovele vo: “Ndioyu i Kristu.”+ Kansi ankaka bavovele vo: “Kristu, nga muna Ngalili ketuka e?+
42 Nga e sono ke yivovanga ko vo o Kristu muna mbongo a Davidi+ ketuka, kuna Beteleme,+ e vata dina diatuka Davidi e?”+
43 Muna kuma kiaki, e ndonga ivambanene mu kuma kiandi.
44 Ankaka vana bena bazolele kumbaka, kansi ke vakedi ona unsidi moko ko.
45 I bosi makesa bavutukidi kuna kwa nganga zambuta ye Afarisi, oyau babavovese vo: “Ekuma nulembele kuntwasila?”
46 O makesa bavutwidi vo: “Ke vena nkutu muntu ko wavova kala nze muntu ndioyu.”+
47 Muna kuma kiaki, Afarisi babavutwidi vo: “Oyeno mpe nuvukumuinu’e?
48 Vana vena e mfumu zeto yovo Afarisi, nga vena yo muntu okwikidi muna yandi e?+
49 E ndonga yayi ilembele zaya o Nsiku, yasibwa.”
50 Nikodemo ona wateka kwiza kwa yandi, una vo mosi muna yau, ubavovese vo:
51 “Nga muna Nsiku eto o muntu olenda fundiswa lembi teka kunwá muna zaya dina kavangidi e?”+
52 Bamvutwidi vo: “Nga ongeye mpe u Mungalili e? Wenda vavulula wazaya wo vo muna Ngalili ke mutuka ngunza ko.”*
Mvovo vana yand'a lukaya
^ Yovo “Sudi.”
^ I sia vo, sikola za kirabini.
^ Ngungu zayingi zankulu zitoma bundwanga e vuvu zakatula e tini kia 53 yakuna kapu kia 8 tini kia 11.
