Yosua 7:1-26
7 Aneyisaele basumukini muna lekwa yayekolwa mu fwaswa, kadi Akani+ wa mwan’a Kami wa mwan’a Zebadi wa mwan’a Zera, musi kanda dia Yuda, obongele eyaka lekwa ina yayekolwa mu fwaswa.+ O makasi ma Yave mafusukidi muna Aneyisaele.+
2 Yosua otumini wantu tuka kuna Yeriko benda kuna Ai,+ ina kuna ndambu a Betavene kuna este a Betele,+ ubavovese vo: “Nuenda nualanga e nsi.” Bele, balangidi Ai.
3 Vava bavutukidi kwa Yosua, bamvovese vo: “Ke dina kwandi mfunu ko vo nkangu wawonso benda. Mafunda mole yovo matatu ma wantu mafwana kwandi mu fwasa Ai. Kumwesesa nkangu wawonso mpasi ko, kadi akete kaka bena.”
4 Dianu vo, tezo kia 3.000 ma wantu bayenda, kansi batinini vana vena esi Ai.+
5 Esi Ai bavondele wantu 36, babalende tuka vana vitu dia mbanza yakuna Sebare,* babavondele kuna nkulumuka. E ntima mia nkangu mizelokele yo kukula nga maza.
6 Yosua otiazwini e mvuatu miandi, ofukamene vana vena Nkel’a Yave yakuna masika, oyandi ye mbuta za Isaele, bayisidi e mbundukutu a ntoto vana ntu.
7 Yosua ovovele vo: “Ekwe! E Mfumu Yave, ekuma oyambulwidi nkangu wau wasauka Yodani? Nga watuyekola vana moko ma Aneyamore kimana batufwasa? Ekwe kele vo twayangalala kweto kala kuna simu dia* Yodani!
8 Dodokolo e Yave, adieyi ivova wau vo Isaele otinini vana vena mbeni zandi?
9 Anekenani ye nkangu wawonso wa nsi vava bewá wo, bekutuzieta yo vunzuna e nkumbu eto ova nza, aweyi ovanga mu kuma kia nkumbu aku anene?”+
10 Yave ovutwidi Yosua vo: “Telama! Ekuma ofukamene yo bukika ndose vana ntoto?
11 Isaele osumukini. Bakulwidi e kangu+ diame dina yabavovesa vo balunda. Babongele lekwa ina yayekolwa mu fwaswa,+ bayiyidi yo,+ basidi yo muna salanganu yau+ kuna nsweki.
12 Ozevo, Aneyisaele ke besunda mbeni zau ko. Befila kaka mbeni zau e nima yo tina, kadi bakitukidi se lekwa kiayekolwa mu fwaswa. Kikala yeno diaka ko, avo nualembi katula vovo nuina e lekwa kiayekolwa mu fwaswa.+
13 Telama wavaula nkangu!+ Ubazayisa vo: ‘O mbazi nuyivaula, kadi i wau wuwu kavovele o Yave wa Nzambi a Isaele: “E Isaele, vena y’eki kiayekolwa mu fwaswa vovo wina. Kutelama ko vana vena mbeni zaku, yavana okatula vovo wina eki kiayekolwa mu fwaswa.
14 O mbazi mu mene nuyisunzula vana ndose a Nzambi, kanda mu kanda, e kanda dina kesola Yave+ difinama vana ndose a Nzambi, vumu mu vumu, e vumu kina kesola o Yave kifinama vana ndose a Nzambi, nzo muna nzo, e nzo ina kesola o Yave ifinama vana ndose a Nzambi, muntu muna muntu.
15 Ndiona obakama ye lekwa kiayekolwa mu fwaswa, yokwa keyokwa,+ yandi ye yawonso kena yau, kadi okulwidi e kangu+ dia Yave, ovangidi edi dia uzowa muna Isaele.”’”
16 Yosua osikamene muna mene-mene, obokele Isaele vana ndose a Nzambi, kanda mu kanda, e kanda dia Yuda disolelo.
17 Osunzwidi vumu kia Yuda vana ndose a Nzambi, e vumu kia Zera+ kisolelo, osunzwidi vumu kia Zera vana ndose a Nzambi, muntu muna muntu, o Zabidi osolelo.
18 Osunzwidi nzo a Zabidi vana ndose a Nzambi, muntu muna muntu, o Akani wa mwan’a Kami, wa mwan’a Zabidi, wa mwan’a Zera muna kanda dia Yuda, osolelo.+
19 Yosua ovovese Akani vo: “E mwan’ame, dodokolo, kembesa Yave wa Nzambi a Isaele, funguna kwa yandi. Dodokolo, unzayisa edi ovangidi. Kunsweki dio ko.”
20 Akani ovutwidi Yosua vo: “Kieleka, mono nsumukini Yave wa Nzambi a Isaele, edi yavangidi.
21 Vava yamwene muna sanzu, mvuela yambote-mbote ya nyadi a Sina+ ye 200 za sekele* za palata ye vimpa kia wolo kizitanga 50 ma sekele, ngiangalele yo, mbongele yo. Tala yalundwa muna nsi a ntoto muna saba kiame, ye nzimbu kuna nsi.”
22 Vana vau Yosua otumini wantu, bele nswalu kuna saba, basolwele mvuela yaswekwa muna saba kiandi ye nzimbu kuna nsi.
23 Bavaikisi e lekwa yayi muna saba, banete yo kwa Yosua yo Aneyisaele awonso, basidi yo vana ndose a Yave.
24 Yosua ye Isaele awonso babongele Akani+ wa mwan’a Zera ye palata yo mvuel’a nyadi ye baya kia wolo+ yo wan’andi amakala ye amakento ye ngombe ye mabuluku ye mameme ye saba ye yawonso kakala yau, babanete kuna Ndimb’a Ako.+
25 Yosua ovovele vo: “Ekuma ututwasidi e mpasi zazi?+ Yave okutwasila e mpasi o unu kiaki.” Isaele yawonso intubidi matadi,+ i bosi babayokele.+ Muna mpila yayi yau awonso batubilu matadi.
26 Bankundidikidi ulolo wa matadi, makinu vana yamu unu kiaki. Muna diadi e makasi ma Yave makulukidi.+ Ekiaki i kuma e fulu kiakina kiyikilwanga vo Ndimb’a Ako* yamu unu.
Mvovo vana yand'a lukaya
^ Ina ye nsasa vo: “Fulu kia Bakila Matadi.”
^ I sia vo, ku ndambu a este a.
^ Ina ye nsasa vo: “Sumbula; Bembolwa.”
