Yosua 9:1-27
9 Atinu awonso bakala kuna simu dia Yodani+ kuna este, vava bawá mana mavangama, ana bakala muna zunga ya miongo kuna Sefela, muna nlambu awonso a Mbu Anene,*+ mantalani ye Libanone—Anekete, Aneyamore, Anekenani, Aneperese, Anekivi yo Aneyebuse+—
2 bakangidi e kangu kimana banuanisa Yosua ye Isaele.+
3 Esi Ngibone+ bawidi mpe una Yosua kavanga kwa Yeriko+ ye Ai.+
4 I dianu vo, kuna ndekwa zawonso, basidi madia muna nsaku zafwa, zamana bâkuka, banatini zo muna mabuluku mau ye madila ma vinyu mavua bâkuka yo londwa;
5 bavuete mpe nsampatu za bâkuka, zamana londwa ye mvuatu miabakûka miamana londwa. E mbolo zawonso banete zamana yuma yo kesomoka.
6 Bele kwa Yosua kuna ndo kuna Ngilengale,+ bavovele kwa yandi ye kwa Aneyisaele vo: “Ku nsi yandá tutukidi. Owau nukanga yeto e kangu.”
7 Kansi, Aneyisaele bavovese Anekivi+ vo: “Nanga numfinangani zeto. Aweyi tukangila yeno e kangu?”+
8 Bavovese Yosua vo: “Oyeto tu ntaudi zaku.”
Yosua ubayuvuidi vo: “Oyeno nu aki nani, akweyi nutukidi?”
9 Bamvovese vo: “E ntaudi zaku ku nsi yandá kikilu+ batukidi mu kuma kia nkumbu a Yave wa Nzambi aku, kadi tuwidi nsangu zandi ye mawonso kavanga muna Engipito+
10 ye mawonso kavanga kwa atinu wole a Aneyamore kuna simu* dia Yodani, Sikone+ wa Ntinu a Kesebone, yo Onge+ wa Ntinu a Basani, kuna Asitarote.
11 Ozevo, e mbuta zeto ye nkangu awonso a nsi batuvovese vo, ‘Nubonga madia ma nkangalu, nuenda kubakika. Nubavovesa vo: “Oyeto tu ntaudi zeno,+ nukanga yeto e kangu.”’+
12 E mbolo zazi zatiya zakala e lumbu twakatuka muna nzo zeto muna kunukika. Nze una numwene, owau zimene yuma yo kesomoka.+
13 E madila mama ma nkanda, mampa makala vava twazadisa mo ye vinyu, owau mavuidi buka.+ E mvuatu ye nsampatu zeto zimene fwa kadi kwandá tutukidi.”
14 Muna kuma kiaki batambwidi* madia mau, lembi teka yuvula Yave.+
15 Yosua ovangidi yau ungudi+ yo kanga yau e kangu vo ke kubavonda ko, akuluntu a nkutakani babadididi e ndofi vo belungisa e mvovo miau.+
16 Vava vaviokele lumbu tatu tuka bakangidi yau e kangu, bawidi wo vo lukufi bekalanga, mfinangani zau kwandi.
17 Aneyisaele basimbidi e nzila, muna lumbu kiatatu balweke muna mavata mau; e mavata mau, Ngibone,+ Kefera, Berote ye Kireyate-yarimi.+
18 Kansi, Aneyisaele ke babanuanisi ko kadi akuluntu a nkutakani babadidi e ndofi muna Yave+ wa Nzambi a Isaele. E nkutakani yawonso iyantikidi yidimina akuluntu.
19 Akuluntu bavovese nkutakani yawonso vo: “Wau vo twabadididi e ndofi muna Yave wa Nzambi a Isaele, katulendi kubavanga mbi ko.
20 Edi tuvanga: Tubayambula bakala moyo, o makasi ma Nzambi malembi kutufusukila wau twabadididi e ndofi.”+
21 Akuluntu bavovele diaka vo: “Yambula bakala moyo, bakituka se atiami a nkuni ye ateki a maza ma nkutakani yawonso.” Idiau didi akuluntu babasila o nsilu.
22 Yosua ubabokele, ubayuvuidi vo: “Ekuma nutuvunini vo: ‘Kwandá kikilu tukalanga yo yeno,’ kinga vava twina i nuzingilanga?+
23 Tuka owau nusibilu,+ ntaudi kaka nukala, atiami a nkuni ye ateki a maza ma nzo a Nzambi ame.”
24 Bavutwidi Yosua vo: “E ntaudi zaku batomene zayiswa vo Yave wa Nzambi aku wakanikina Mose wa ntaudi andi vo kanuvana e nsi yawonso yo fukisa nkangu miawonso ova ndose eno.+ Tumwene wonga wa mioyo mieto mu kuma kieno+ i tuvangidi diambu diadi.+
25 Owau tuna ova moko maku. Utuvanga konso dina omwene vo diambote ye diansongi.”
26 I diau kabavangidi; ubavulwizi vana moko ma Aneyisaele, ke babavondele ko.
27 E lumbu kiakina, Yosua ubakitwidi se atiami a nkuni ye ateki a maza ma nkutakani+ ye ma ziku dia Yave muna fulu kina kesola Nzambi,+ i wau bevanganga yamu unu kiaki.+
