Zakariya 14:1-21
14 “Tala, e lumbu mu lwaka se kina, e lumbu kia Yave, vava mavua maku* mekayaneswa vana kati kwaku se sanzu.
2 Ikutakesa zula yawonso yanuanisa Yerusaleme; e mbanza ibakama, e nzo zisanzwa, akento belekwa mu ngolo. E ndambu a nkangu a mbanza benatwa muna kinkole, kansi o nkangu una usala muna mbanza ke ufukiswa ko.
3 “Yave ovaika kanuanisa e zula yoyo,+ nze una kenuaninanga muna lumbu kia vita.+
4 E lumbu kiakina e tambi yandi ikala vana Mongo a Olive,+ una mantalani ye Yerusaleme, kuna este; e Mongo a Olive uvambana vana kati, tuka kuna este* yakuna weste,* vevangama ndimba anene vana kati; e ndambu a mongo ikwenda kuna node, e ndambu yankaka kuna sude.
5 Nutinina kuna ndimb’a miongo miame, kadi o ndimb’a miongo ulwaka yakuna Asele yawonso. Nutina nze una nuatinina e nzakam’a ntoto muna lumbu ya Uziya wa Ntinu a Yuda.+ Yave wa Nzambi ame okwiza, aveledi awonso bekala yandi.+
6 “E lumbu kiakina ke vekala ntemo ukezima ko,+ e lekwa zizama izizama.
7 E lumbu kiakina kizayakana se lumbu kia Yave.+ Ke vekala mwini ko ngatu fuku; muna fuku o ntemo uvaika.
8 E lumbu kiakina maza mamoyo+ mevaika tuka muna Yerusaleme,+ e ndambu a maza ikwenda kuna mbu wa este,*+ e ndambu yankaka ikwenda kuna mbu wa weste.*+ Ediadi divangama muna nsungi a mvula ye nsungi a sivu.
9 Yave okala se Ntinu a nza yawonso.+ E lumbu kiakina wantu awonso Yave kaka besambila,+ nkumbu andi kaka bekembelela.+
10 “E nsi yawonso ikituka nze Araba,+ tuka kuna Ngeba+ yakuna Rimone,+ kuna sude a Yerusaleme; Yerusaleme itundidikwa vana fulu kiandi, o nkangu uzingila mo,+ tuka vana Vitu dia Benyamini+ yakuna Vitu Diantete, yakuna Vitu dia Konko, tuka kuna nzo yandá ya Kananele+ yakuna makaminu ma ntinu.
11 Wantu bezingila mo; ke muzengelwa diaka tumbu kia lufwasu ko,+ Yerusaleme izingilwa muna luvuvamu.+
12 “Ekiaki i vuku kina Yave ketwasila nkangu miawonso minuanisa Yerusaleme:+ Wau batelamene, e nitu zau, meso mau yo tubini twau tuwola.
13 “Muna lumbu kiakina, e mavuanga metuka kwa Yave mekota vana kati kwau; konso muntu muna yau osimbinina nkwandi, konso muntu onuanisa nkwandi.+
14 Yuda mpe onuana vita muna Yerusaleme; e kimvuama kia zula yawonso izietele, kutikwa kikutikwa vamosi, wolo, palata ye mvuatu, ulolo kikilu.+
15 “E vuku kiaki kilwakila mpe mvalu, mula, samo ye mabuluku ye twelezi yawonso y’awana bena muna ndo.
16 “Awonso besala muna zula yawonso ina yayiza nuanisa Yerusaleme, betomboka konso mvu+ muna vumbamena* Ntinu, Yave a vu+ yo kembelela Nkinzi a Sudi.*+
17 Kansi, avo muntu muna makanda ma nsi olembele tomboka kuna Yerusaleme mu vumbamena Ntinu, Yave a vu, muna yau ke munoka mvula ko.+
18 Avo esi kanda dia Engipito balembi tomboka yo kota muna mbanza, ke benokenua mvula ko. Kansi, belwakilwa kwa vuku kina Yave ketwasa kwa zula ina yalembi tomboka muna kembelela Nkinzi a Sudi.*
19 Ekiaki i tumbu kia sumu dia Engipito ye sumu dia zula yawonso ina yalembi tomboka muna kembela Nkinzi a Sudi.*
20 “Muna lumbu kiakina e mvovo ‘O vauka kwa Yave’+ misonama muna ngunga za mvalu. E nzungu*+ za lambila muna nzo a Yave zikala nze pidi+ vana ndambu a ziku.
21 E nzungu* zawonso muna Yerusaleme ye Yuda zavauka zikala, za Yave a vu, awonso ana bekela yimenga bekwiza mo lambila. E lumbu kiakina ke mukala diaka musi Kenani* ko muna nzo a Yave a vu.”+
Mvovo vana yand'a lukaya
^ I sia vo, e mbanza iyikilu muna tini kia 2.
^ Yovo “kuna mpaikilu a ntangwa.”
^ Mvovo wa sina: “kuna kalunga.”
^ I sia vo, Mbu a Mediterrâneo.
^ I sia vo, Mbu Afwa.
^ Yovo “sambila.”
^ Yovo “Saba ya Zingila mu Kolo Kiakete.”
^ Yovo “Saba ya Zingila mu Kolo Kiakete.”
^ Yovo “Saba ya Zingila mu Kolo Kiakete.”
^ Yovo “nzungu zanene.”
^ Yovo “nzungu zanene.”
^ Nanga, “akiti.”
