Zakariya 6:1-15
6 Nsengwele diaka meso, mbwene makalu mayá ma vita mekwizanga tuka vana kati kwa miongo miole, e miongo miami mia nsongo.
2 E kalu diantete diatuntwanga kwa mvalu miambwaki, diazole diantutwanga kwa mvalu miandombe.+
3 E kalu diatatu diatuntwanga kwa mvalu miampembe, e kalu diaya diatuntwanga kwa mvalu mia matona-matona.+
4 Ngiuvuidi kwa mbasi ona wamokenanga yame: “Ayeyi i nsas’a lekwa yayi, e mfumu ame?”
5 O mbasi umputwidi vo: “E miami i mianda yá+ mia zulu mivaikidi vava mimene kuyisunzula vana ndose a Mfumu a nza yawonso.+
6 E kalu dina diatuntwanga kwa mvalu miandombe diele kuna nsi a node;+ e mvalu miampembe miele kuna simu dia kalunga; mina mia matona-matona miele kuna nsi ya sude.
7 E mvalu mia matona-matona mikedi ye tima dia vaika kimana mienda kangadi muna nza.” I bosi ovovele vo: “Nuenda, nuzieta e nza.” Miyantikidi kwenda yo zieta e nza.
8 I bosi umbokele, umpovese vo: “Tala, mina mivaikidi kimana mienda kuna nsi ya node mivundisi mwand’a Yave kuna nsi ya node.”
9 E diambu dia Yave dizidi diaka kwa mono, oku vo:
10 “Tambula kwa Keledai, Tobiya yo Yedaya ina batambwidi kwa nkangu una muna kinkole; e lumbu kiakina, ofwete kwenda kuna nzo a Yosiya wa mwan’a Sefaniya kumosi ye awaya batukidi kuna Babele.
11 Ofwete bonga palata ye wolo, vanga e kolowa* yo vuika yo muna ntu a Yosua+ wa ngang’ambuta wa mwan’a Yosadake.
12 Umvovesa vo:
“‘I wau wuwu kavovele o Yave a vu: “Tala o muntu una ye nkumbu a Ntombo.+ Mena kemena vana fulu kiandi yo tunga e tempelo a Yave.+
13 Yandi otunga e tempelo a Yave, otambula zitu. Ovuanda vana kunda kiandi kia kimfumu yo yala, okala mpe se nganga vana kunda kiandi kia kimfumu,+ okala ye mbebe zazi zau zole muna twasa luvuvamu.*
14 E kolowa* ikala se luyindulu lwa Eleme, Tobiya, Yedaya+ yo Kene wa mwan’a Sefaniya, muna tempelo a Yave.
15 Awana bena kwandá bekwiza tunga tempelo a Yave.” Nuzaya wo vo Yave a vu untumini kwa yeno. Ediadi divangama, avo nutomene wila nding’a Yave wa Nzambi eno.’”
Mvovo vana yand'a lukaya
^ Yovo “kolowa anene.”
^ Yovo “e mbebe zau zole ngwizani zikala.”
^ Yovo “kololwa anene.”
