Tuka muna ngonde a Setemba, muna Nkand’a Malongi, Zingu ye Salu Kieto kia Kikristu mukudikilwa nsunzula yaleboka yampa ina yo ntu a diambu, “Longa e Ludi.” E kani dieto i samuna e ludi kiasina kia Nkand’a Nzambi muna sadila kiuvu ye sono.

Avo tumwene vo muntu osongele luzolo lwambote, tulenda sisa diambu tumokena vava tuvutuka kunkingula, nkanda yovo songa e video ina muna jw.org. Tufwete vanganga mawonso mu vutuka kingula o muntu lembi viokesa lumbu yayingi mu wokesa etima diandi. E nsunzula yampa mu ntu mia mambu mia nkanda, Adieyi Nkand’a Nzambi Ulenda Kutulonga? yikala tuka. Muna nkanda wau tulenda mo wana mpe yuvu yankaka ye sono ilenda kutusadisa mu vutuka kingula o wantu yovo longoka yau muna sadila kaka Nkand’a Nzambi.

Vena ye nzila imosi kaka ifilanga ku moyo. (Mat 7:13, 14) Wau vo tumokenanga yo wantu a mabundu maswaswana, tufwete samunanga e ludi kia Nkand’a Nzambi mu mpila kilenda tuntila e sungididi kia konso muntu. (1 Tim 2:4) Ekolo tumokenanga mambu maswaswana ma Nkand’a Nzambi yo tomesa ndekwa zeto za “sasilang’e diambu dia ludi,” e kiese kieto kiwokela ye tuvua e nlutu mia longa e ludi kw’akaka.—2 Tim 2:15.