Nga kimbuta kia mvu 23 ye 65 una kiau ye mu salu kia ntangwa ke ntangwa wina? Nga vimpi wambote una wau ye olenda kwenda sadila kuna zunga kivuidi ateleki ayingi o mfunu? Avo e mvutu zaku elo muna yuvu yayi, nga olenda soneka e ndomba kimana wakota e Sikola ya Ateleki a Kintinu? Tuka kiayantikila e sikola yayi, ulolo wa akazi, mpangi za makala ye za makento bena vo ampumpa bakotele kala e sikola yayi. Kana una vo i wau, mpangi zayingi za ampumpa tuvuidi o mfunu mu kota sikola yayi. Muna kuma kiaki, samba kwa Yave kimana kasadisa mu wokesa e tima diaku dia kunyangidika yo tanginina Mwan’andi. (Nku. 40:8; Mat. 20:28; Ayib. 10:7) I bosi, yindula dina olenda vanga mu vevola e zingu kiaku kimana wayifwanisa muna kota sikola yayi.

Nkia mwelo wampwena waziuka kwa awana bakota kala sikola yayi? Akaka bafilwa muna zunga ivovuanga ndinga zankaka yovo muna mbanza zanene. Akaka, besadilwanga mu sadisa akengi a zunga muna kingula e nkutakani, akaka besalanga se akengi a zunga ye missionário. Yindula mana olenda vanga muna salu kia Yave yo kala nze Yesaya wa ngunza, ona wavova vo “Mon’oyu! Untuma!”—Yes. 6:8.

TALA E VIDEO, MISSIONÁRIO—ASADI MUNA NKUTIKA, I BOSI VANA E MVUTU ZA YUVU ILENDE:

• Aweyi besolelwanga e missionário ana befilwanga muna salu kia umbangi?

• Nkia salu kiampwena besalanga e missionário muna salu kia umbangi?

• Nkia nsambu betambulanga awana besalanga se missionário?