Yesu wavova vo: “Ngovo nutambwidi, ngovo nuvana.” (Mat 10:8) Tulemvokelanga nkanikinu wau wakiá vava ke tulombanga nzimbu ko mu kuma kia nkanda tukayanga kumosi ye Nkand’a Nzambi. (2 Kor 2:17) Kansi e nkanda miami mivuidi ludi kiamfunu kia Diambu dia Nzambi. Ngolo ye nzimbu zayingi zivavuanga muna nieteka yo lwakisa e nkanda mieto muna nkutakani mu nza yawonso. Muna kuma kiaki, tufwete bakanga kaka nkanda mina tuvuidi o mfunu.

Sadila umbakuzi vava okayanga e nkanda, kana nkutu vava osilanga umbangi vana fulu kia ndonga. (Mat 7:6) Vana fulu kia tambika kaka e nkanda kwa wantu beviokanga, vanganga e ngolo za mokena yau mu vava zaya kana vo bena ye luzolo lwambote. Nga olenda vana e mvutu za yuvu ina vana babu kina va ndambu? Avo kutomene bakula ko kana vo muntu luzolo lwambote kena lwau, umvana kaka tratado. Kansi avo o muntu olombele Eyingidilu yovo nkanda wankaka, tulenda wo kumvana.—Nga 3:27, 28.