O Luyindulu lukutuvananga e lau dia yindula e nsambu tuvua kuna sentu mu kuma kia lukûlu. Zimosi muna nsambu zazi i lufuluku. Ke diakala kani dia Yave ko vo wantu bafwanga. Ekiaki i kuma tutoma kendalelanga vava tufwilwanga azolwa eto. (1 Kor 15:26) Yesu wakendalala vava kamona alongoki andi badilanga mu kuma kia lufwa lwa Lazaro. (Yoa 11:33-35) Wau vo Yesu wafwanana kikilu yo Se diandi, tulenda kala ye ziku vo Yave mpe okendalalanga vava kemonanga lukendalalu lweto mu kuma kia lufwa lwa azolwa eto. (Yoa 14:7) Yave ovingilanga ye tima diawonso e ntangw’a kefula selo yandi ana bafwa, oyeto mpe tuvingilanga ntangwa yayi ye tima diawonso.—Yobi 14:14, 15.

Wau vo Yave ke Nzambi a mvuanga ko, tulenda kala ye ziku vo o lufuluku luvangamena mu mpila yambote. (1 Kor 14:33, 40) Vana fulu kia kala ntangw’a luziku, ntangwa ya tambula awana befuluka ikala. Nga oyindulanga una ukala o lufuluku, musungula vava tukendalalanga mu kuma kia lufwa lwa azolw’eto? (2 Kor 4:17, 18) Nga ovutulanga matondo kwa Yave mu kuma kia lukûlu? Nga ovutulanga mpe matondo kwa Yave wau kasengomona muna Nkand’a Nzambi vo amafwa bezinga diaka?—Kol 3:15.

• Nani muna yitu yovo nkundi aku wafwa ozolele mona diaka?

• Nkia wantu beyikwanga muna Nkand’a Nzambi ozolele wanana yau yo mokena yau?