Tuzolele yitila maza muna mbongo a ludi tukunanga. (1 Kor. 3:6) Muna kuma kiaki, avo tusolwele muntu osongele luzolo lwambote, diambote twasisa e kiuvu tubadika muna nkingula ilanda. Ediadi difila muntu mu kutuvingila. Dikutusadisa mpe mu kubika mana tuvova vava tuvutuka kunkingula. Vava tuvutuka, tulenda kumvovesa vo twizidi mu vana e mvutu za kiuvu twasisidi mu nkumbu ansuka twamokene.

• Vava okubikanga e nsunzula osadila mu salu kia nzo ke nzo, kubikanga mpe kiuvu ovanina e mvutu muna nkingula ilanda. Olenda yika kiuvu kivaninu e mvutu muna nkanda okunsisila. Yovo olenda sadila kiuvu kivaninu e mvutu mu umosi muna nkanda tusadilanga mu longoka Nkand’a Nzambi yo wantu una ozolele kunkayila muna nkingula ilanda.

• Vava ofokala e moko yo muntu osongele luzolo lwambote, unzayisa e tima diaku dia mokena yandi diaka. Ibosi vanga kiuvu okubikidi. Avo dilendakana, unyuvula kuna kezingilanga yovo lomba e numero andi ya telefone.

• Avo umvovese e ntangwa ovutuka kunkingula, lungisa e mvovo miaku. —Mat 5:37.