O nkanda Kutulonga yo nkanda Adieyi Kelonganga Nkand’a Nzambi miafwanana. E sadilwa yayi yau yole ludi kimosi ilonganga, e ndandani ya malongi mpe yafwanana. Kansi o nkanda, Kutulonga usadilanga mvovo mialeboka mu mpila yakiá. Wakubikwa mu kuma kia awana ke betoma bakulanga ko nkanda Adieyi Kelonganga Nkand’a Nzambi. Vana fulu kia sadila e nkudika, o nkanda Kutulonga una ye babu kina yo ntu a diambu, Mvovo Misasilu, kisasilanga mvovo ye ngindu zina muna sono yasina. Kuna lubantiku lwa kapu, ke kuna yuvu ko ngantu babu kialufimpu kuna mfoko. Kansi kuna mfoko a kapu, kuna ye babu kia lufimpu lwa mvovo miasina mia ludi kia Nkand’a Nzambi kisasilwanga muna sono yasina. Nze nkanda Adieyi Kelonganga Nkand’a Nzambi, o nkanda Kutulonga ulenda kayiwa konso ntangwa kana nkutu vo ke ukayiwa muna ngonde ko. Aweyi tulenda sadila nkanda Kutulonga vava tufilanga longi dia Nkand’a Nzambi?

LUFIMPU LWA MVOVO MIASINA: Kuna kwa wantu ayingi, e ndekwa tusadilanga za tanga e tini muna nkanda Adieyi Kelonganga Nkand’a Nzambi yo vanga e kiuvu, zina se ndekwa zambote yamu wau. Kansi adieyi tuvova avo nlongoki katomene zaya ndinga ko ngatu zaya toma tanga? Olenda sadila o nkanda Kutulonga, i bosi sadila e babu ya Lufimpu lwa Mvovo Miasina yo kunkasakesa katanga e sono yayi muna ndinga kebakulanga. Konso ludi kia Nkand’a Nzambi kina muna kunku kiaki, kilenda longokwa mu miniti 15. Wau vo e babu kia Lufimpu lwa Mvovo Miasina ke kisasilanga mawonso ko mena muna kapu, o nlongi kafwete toma kubama yo zaya e nsatu za nlongoki. Avo nlongi ofididi e longi muna tini ina muna kapu, olenda sadila e babu kia Lufimpu lwa Mvovo Miasina nze lufimpu.

MVOVO MISASILU: E mvovo ye ngindu zina muna babu kia Mvovo Misasilu, zina muna ndandani nze una imonekenanga muna kapu. O nlongi olenda zaya kana nkia ntangwa bebadika mvovo misasilu ekolo belongokanga o nkanda Kutulonga.