Nkand’a Nzambi wasakula vo Satana okutubangika ye kani dia vunzanesa e salu kieto kia umbangi. (Yoa 15:20; Lus 12:17) Aweyi tulenda sadisila mpangi zeto z’Akristu bebangikwanga ana bezingilanga mu nsi zankaka? Tulenda samba mu kuma kiau. “E ndodokela za muntu ansongi zivuidi nkuma.”—Yak 5:16.

Adieyi tulenda lomba mu kuma kiau? Tulenda lomba kwa Yave kavana unkabu kwa mpangi zeto yo kubasadisa balembi mona wonga. (Yes 41:10-13) Tulenda samba mpe mu kuma kia ayadi balembi sima e salu kieto kia umbangi “kimana twakadila muna luvuvamu ye ngemba.”—1 Tim 2:1, 2.

Vava Paulu yo Petelo babangikwanga, Akristu a tandu kiantete basamba mu kuma kiau yo yika e nkumbu zau muna sambu. (Mav 12:5; Roma 15:30, 31) Kana nkutu vo katuzeye nkumbu za mpangi zawonso ko bebangikwanga, tulenda yika e nkutakani au nsi ye zunga kiau.