Nga ozolele vanga mayingi muna salu kia Yave muna nsungi a Luyindulu? (2 Kor. 5:14, 15) Muna ngonde ya Malusu ye Abidi aviti a nzila ansadisi balenda sola sala ola 30 yovo 50. Avo dilendakana mu kuyivana muna salu kiaki, soneka e ndomba yo vana yo kwa Akuluntu a Buka kia Salu kia Nkutakani. Konso ngonde, e nkumbu za awana besala se aviti a nzila ansadisi zizayiswa kwa nkutakani. Muna mpila yayi, e nkutakani ilenda vana e moko kwa aviti a nzila muna salu kia umbangi. Yambula yeto awonso twasadila e lau diadi muna nsungi a Luyindulu kimana twatomesa e ndekwa zeto muna salu kia umbangi yo kasakesa muntu yo nkwandi.—1 Tes. 5:11.