E nkubik’a Yave mayingi ivanganga muna kubika e kunku mpila ya yantikila e moko. Ateleki ayingi bemonanga e nluta mia sadila e ndekwa ziyikwanga muna kunku kiaki muna zunga kiau. Kansi, wau vo konso zunga kivuidi mambu maswaswana, ateleki bena yo nswa wa sadila nsunzula zankaka muna salu kia umbangi ezi zilenda simba e ntima mia wantu muna zunga kiau. Ozevo, tufwete landanga konso luludiku mu kuma kia salu kia mpaika mu buka. Kadi e kani dieto i lungisa o nkanikinu a Yesu wa samuna e nsangu zambote za Kintinu.—Mat. 24:14.

Vava bevewanga kiyekwa muna nkutakani, ateleki bafwete sadilanga e diambu diasina diyikilu muna kunku, mpila ya yantikila e moko kina muna Zingu ye Salu Kieto kia Kikristu—Nkand’a Malongi. Kansi avo ke vena ye luludiku lwankaka ko, balenda soba kwau e kiuvu, sono yovo kiuvu besisa kwa muntu mun’owu wa nsatu za zunga kiau. Ediadi disingikidi o luludiku luna muna Nkand’a Malongi a Yuni, 2020 lukaya lwa 8.