KWAMANANA YINGILA!
Akristu ye Vita—E Bibila Adieyi Kivovanga?
Ekolo e vita kuna Ucrania isonganga vo mfumu zayingi za mabundu ma Kikristu bevanganga mawonso muna yikama e vita. Tala una akaka muna yau beyikamenanga e ndambu zau zole:
“Makesa mawonso benwananga ye mbeni muna tanina e nsi au ya kivwila, bafwene zitiswa yo kubavutula matondo. . . Tusambanga muna wete dieno ye tukunuyikamanga ye nsi a ntima yawonso.”—Mvovo mia Metropolita Epifânio I de Kiev, landila e zulunalu The Jerusalem Post, kia 16 kia Malusu, 2022.
“O mfidi a dibundu dia Ortodoxa Russa kina kia lumingu wa fididi e sambu muna wete dia makesa ma Rússia. Walombele muna sambu vo batanina e nsi au ‘mu mpila ina vo esi Russia kaka balenda wo vanga,’ e kolo luyalu lwa Moscovo lukwamanananga nwana e vita kuna Ukrania.—Reuters kia 3 kia Abidi, 2022.
Nga Akristu bafwete yikamanga e vita? E Bibila adieyi kivovanga?
E Bibila adieyi kieleka kivovanga
E Bibila kisonganga vo alandi akieleka a Yesu Kristu ke beyikamanga vita ko.
“Vutula o nsosolo aku vana fulu kiandi, kadi awonso bebonga e nsosolo muna nsosolo befwila.”—Matai. 26:52.
Ndiona otondanga e vita yovo nwana e vita, nga o lemvokelanga kieleka o nkanikinu a Yesu?
“Nkanikinu ampa inuvene, nuzolaziana; wauna inuzolele, i una mpe nuzolazianina. Muna wau i bezayila o wantu awonso vo nu alongoki ame—avo nzolani nuna yau.”—Yoane 13:34, 35.
Nga ndiona oyikamanga e vita una yo zola kwaku kayika o Yesu vo i kuzayilwanga alongoki yovo alandi andi?
Muna zaya diaka mayingi, tanga e longi “A guerra é Compatível com o Cristianismo?”
Akristu ye vita mu lumbu yeto
Nga dilendakana kwa Akristu o unu mu lembi yikama e vita? Ingeta. E Bibila kiasakula vo omu lumbu yayi tuzingilanga eyi yikilwanga vo “lumbu yambaninu,” mu kala yo wantu a zula yawonso ana belanda malongi ma Yesu ye kebelongoka diaka nwana mvita ko.—Yesaya 2:2, 4.
Muna zaya diaka mayingi, tanga Eyingidilu “Nga Nzambi Oyangalelanga e Vita?.”
Ke kolo ko Yave a wa “Nzambi a luvuvamu” osadila Kintinu kiandi mu vuluza wantu “muna lubangamu ye nsoki.”—Filipi 4:9; Nkunga 72:14.
Muna zaya una ediadi divangamena, tala e video Nki i Kintinu kia Nzambi?
a Yave i nkumbu a Nzambi.—Nkunga 83:18.