“Mambu mayingi bevanganga o wantu ke kolo ko sumbula kiampwena metwasa. E mbanza zampwena zidimuka mu maza. Vekala ye mbangazi ke yateka vangama ko. Tembwa yangolo. Kondwa kwa maza. Nti ye bulu yayingi ifukiswa emvimba. E kiaki ke savu ko, ngatu sakisa mambu. Akwa ngangu za nza bekutuvovesanga vo ediadi disinga vangama avo ayadi ke basobele e mpila ya sadila e kura ko.”—Mvovo mia António Guterres, nsoneki a Nações Unidas, muna lukutakanu luna ayadi bafimpila e diambu ditadidi nsobani za nsungi kina kia 4 kia Abidi, 2022.

 “Akwa ngangu za nza belukisanga vo muna mvu mikwiza e mpatu zawonso 423 za zisansilwanga e bulu [kuna Estados Unidos], zifwasuka mu kuma kia nsobani za nsungi, musungula e mpatu zina zikalanga ye mbangazi ayingi. E sumbula ibwa ke kolo ko, yafwanana ye ina tutanganga muna Bibila: tiya, kizalu, zeloka kwa gelo, mbu mizalanga ye mavuku mampwena.”—“E Kizalu Kiatwese Sumbula ku Yellowstone, i sinsu kia sumbula ibwa kuna sentu,” Nsangu za zulunalu The New York Times, kina kia 15 kia Yuni, 2022.

 E diambu dia lufwasu lwa nza, nga dilenda singikwa? Avo i wau, nani osingika dio? Tala dina Bibila kivovanga.

 E Bibila kivovanga vo Nzambi osinga “fwasa awana befwasanga e nza.” (Lusengomono 11:18) E sono kiaki kia Bibila mambu matatu kikutulonganga:

1.  1. O wantu muna mavangu mau befwasa e nza.

2.  2. O lufwasu lwa nza fokoka lusinga fokoka.

3.  3. Nzambi osingika e diambu dia lufwasu lwa nza, ke wantu ko.

 E Bibila kivovanga vo ‘o ntoto ukala yakwele mvu.’ (Kimpovi 1:4) O wantu bekwamanana zingila ova ntoto.

•   “Ansongi bevua nza, bezingila vo yakwele mvu.”—Nkunga 37:29.

 O ntoto una vo i kalu kieto vangululwa uvangululwa.

•   “O makanga ye nsi ayuma iyangalala, o nzanza umona e kiese yo mena e mvuma nze safoni.”—Yesaya 35:1.