Kina kia Lumingu, kia 20 kia Novemba, 2022, kiafokokele Lukutakanu Lwampwena lwa Nações Unidas, COP27 mu kuma kia nsobani za nsungi. Kana una vo babakidi e nzengo za sia vo bekuba e nzimbu mu sadisa e nsi za usukami kimana bakakidila e sumbula ibwanga mu kuma kia mbangazi yasaka, ndonga bazeye wo vo e diadi ke difokola e tuku dia diambu ko.

•   “Ngina ye kiese kiayingi wau vo tubakidi e nzengo za kuba e nzimbu muna sadisa awana bebwilwanga e sumbula mu kuma kia mbangazi yasaka. Dialudi vo e nzimbu zazi ke zafwana ko. . . E nza yawonso wakinu mu vonza.” Mvovo mia António Guterres, Secretário Geral das Nações Unidas kina kia 19 kia Novemba, 2022.

•   “E nza mu finama kaka ina mu lufwasu mu kuma kia nsobani za nsungi.”— Mvovo mia Mary Robinson, mfidi ankulu a nsi a Irlanda ye mfidi ankulu a buka kia Nações Unidas kitalanga oma ma zitu wa wantu, kina kia 20 kia Novemba, 2022.

 Ambuta ye aleke betokananga mu kuma kia lufwasu lwa ntoto kuna sentu. Nga e nsi zawonso zilenda sala entwadi yo lungisa o nsilu wafokola e vonza kia nsobani za nsungi? E Bibila adieyi kivovanga?

 E Bibila kisonganga vo o luzolo besonganga o wantu ye ngolo bevanganga muna kakidila e sumbula ibwanga mu kuma kia nsobani za nsungi, ke zitwasa nluta ko. Tala e kuma yole tuvovele e diadi:

•   “Kina kiatekama ke kilendi singikwa ko.”—Kimpovi 1:15.

   Ediadi disongele vo: O tuyalu twa wantu tufunganga kadi o wantu ke bena ye lendo kia kukiyala ko. (Yeremiya 10:23) Kana nkutu e nsi zawonso zikotele muna kintwadi yo vanga e ngolo, ke zilenda fokola e mpasi za nza ko.

•   “Kadi wantu bekala akwa kuyizola, minzol’a nzimbu, . . . minkondwa ngwizani.”—2 Timoteo 3:2, 3.

   Ediadi disongele vo: E Bibila kiasakula ye ziku kiawonso vo omu lumbu yeto wantu bekala a kwa loko ye minkondwa ngwizani.

 Ozevo, e nsilu mia tuyalu twa wantu mia sia vo befokola mpasi za nza, ke milungana ko. Nzambi wasola Yesu Kristu se ntinu, yandi una ye lendo kia fokola e mpasi za nza. Mu kuma kiandi, Bibila kivovanga vo:

•   “O luyalu lukala vana mavembo mandi. Oyikilwa vo Nludiki a Sivi, Nzambi Nengolo, Se dia Mvu ya Mvu, Mfumu a Luvuvamu.”—Yesaya 9:6.

 Yesu i Ntinu a Kintinu kia Nzambi, yovo luyalu lwa zulu. (Matai 6:10) Ovwidi nkuma, ngangu yo luzolo lwa lunga-lunga o ntoto ye wantu. (Nkunga 72:12, 16) Muna luyalu lwandi, ofwasa “awana befwasanga e nza” yo lunga-lunga e kalu kia wantu.—Lusengomono 11:18; Yesaya 35:1, 7.

 Muna zaya diaka mayingi mu kuma kia nzengo zamfunu muna diambu ditadidi fokola e vonza kia nsobani za nsungi, tanga e longi: “E Bibila Adiyi Kivovanga Muna Diambu dia Nsobani za Nsungi ye Zingu Kieto kia Kusentu.”