Muna ngonde a Yuni ya mvu wa 2022, o mfumu a Buka Kitalanga Mambu ma Lundilu dia Nzimbu za Nza Yawonso wavovele vo: “E vonza kia mpasi za zingu kivutukidi diaka. Lekwa yayingi ye salu yankaka itombokele kikilu e ntalu. Kuna diaka e sambu wantu ayingi ke bena ye nzimbu zafwana ko mu sumbila e lekwa yovo sadisila e salu ina bavuidi o mfunu.”

 E nkubika ya Fundo Monetaria Internacional yavovele vo: “E mazuti ye madia mu tomboka kaka mena e ntalu, ediadi mu wokesa dina e mpasi kwa nkangu muna nsi za usukami.”

 E Bibila kikutusadisanga mu bakula e kuma mpasi za zingu ziwokelelanga, una tulenda zo zizidila ye kutuvana e vuvu vo zisukiswa emvimba.

•   E Bibila kiyikilanga e ntangwa tuzingilanga vo “lumbu yambaninu.”—2 Timoteo 3:1.

•   Yesu wavova vo mu lumbu yeto mukala “mambu mansisi” yovo mambu mampasi memwesanga wantu o wonga. (Luka 21:11) E mpasi za zingu, wantu zimwesanga o wonga. Wantu betokananga mu kuma kia zingu kiau kia kusentu. Betokananga mpe kana vo belenda dikila esi nzo zau.

•   Nkanda Lusengomono wasakula vo mu lumbu yayi e lekwa itomboka e ntalu. “Ngwidi ndinga . . . Ivovele vo: ‘Kilo kimosi kia masa yovo yilo tatu ya bale isumbilwa muna mfutu wa lumbu kiamvimba.”’—Lusengomono 6:6, Versão Facil de Ler.

 Muna zaya mayingi mu kuma kia “lumbu yambaninu” yo ungunza una muna nkand’a Lusengomono, tala e video E Nza Yasoba Tuka Muna Mvu wa 1914 yo tanga longi “Akwa Mvalu Nyá Nki Besunzulanga?”

•   “Betunga nzo yo zingila mo, bekuna mpatu za vinyu yo dia e bundu yau. Ke betunga nzo ko, o muntu ankaka kazingila mo, ke bekuna mpatu ko, kimana akaka badia. Kadi e lumbu ya nkangu ame ikala nze lumbu ya nti, awana nsolele betoma yangalela e salu ya moko mau.”—Yesaya 65:21, 22.

•   ‘Vekala ye ulolo wa masa ova ntoto; yamuna mbata za miongo. E mbongo a ntinu ivuembeta nze muna Lebanone, o wantu muna mbanza besakumuka nze titi ya ntoto.’—Nkunga 72:16.

•   “Muna kuma kia mpasi zimweswanga minkondwa asadisi, muna kuma kia bumu ki’asukami, se yatelama yo vanga diambu,” u kavovele o Yave.”—Nkunga 12:5. a

 Ke kolo ko Nzambi omanisa nkubika za nzimbu zafunga, ke mu nsi mosi kaka ko, kansi mu nza yawonso. Muna zaya una kevangila wo, tanga e longi “Será que é possível acabar com a desigualdade econômica?”

 Kana nkutu o unu, e Bibila kilenda kusadisa mu zizidila e mpasi tumonanga mu kuma kia lekwa itombokanga e ntalu. Mu nkia mpila? Kadi kivananga malongi mambote mesonganga o mfunu wakala ye ngangu muna sadila e nzimbu. (Ngana 23:4, 5; Kimpovi 7:12) Muna zaya diaka mayingi, tanga e longi “Toma Sadila e Nzimbu Zaku” ye “Como viver com menos dinheiro?”