Umpuki muna tuyalu i diambu dia nz’amvimba ditwasanga mfwilu miayingi. a Muna bonga e nona, mu kolo kiaki kia vuku kia COVID-19, muna nsi mosi, ayadi akaka befundwanga vo bakitukidi se mvuama muna nzimbu zikubikwanga mu sadisa awana bebakamanga o mumvidi wa COVID-19. Muna kuma kia umpuki wau, o nkangu ke belendanga solola ko o mawuku mana bavwidi o mfunu, ediadi ditwasanga mpasi yo lufwa lwa wantu ayingi.

 E mfwilu mitwasanga o tuyalu twa umpuki mina muna fulu yawonso. David Cameron ona wakala se nyadi antete kuna nsi a Reino Unidos wavova vo: “O umpuki i konde diampwena, e nsi zawonso zabakama muna konde diadi.”

 Kansi tulenda kala ye ziku vo ke kolo ko o tuyalu twatu twawonso twa umpuki tufukiswa emvimba. Ekuma? Mun’owu wa Bibila, tala mana Nzambi kevanga.

 Tala mvovo mia Nzambi miasonama muna Bibila: “Kadi omono Yave izolanga unsongi; Imenganga wivi yo kondwa kwa unsongi.” b (Yesaya 61:8) Vava wantu be monanga e mpasi mu kuma kia mavangu ma umpuki wa wantu ankaka, Nzambi omonanga dio. (Ngana 14:31) Osianga nsilu vo: “Muna kuma kia mpasi zimweswanga minkondwa asadisi, . . . Se yatelama yo vanga diambu.”— Nkunga 12:5.

 Adieyi Nzambi kevanga? Vana fulu kia singika tuyalu twa unu, o Nzambi ovingisa vo luyalu lwandi luyikilwanga vo “Kintinu kia Nzambi.” (Maku 1:14, 15; Matai 6:10) Bibila kivovanga vo: “O Nzambi a zulu otongeka kintinu kina . . . kikosomona yo sukisa yintinu yayi yawonso, kiau kaka kiyala yakwele mvu.” (Daniele 2:44) Kieleka, o Nzambi ofokola o umpuki una tumonanga o unu.

 Aweyi tuzayidi wo vo muna Kintinu kia Nzambi ke mu kala umpuki ko? Tala o mambu malende.

1.  1. Wisa. E wisa kia Kintinu kiaki kwa Nzambi kitukanga.—Lusengomono 11:15.

    Ekuma ediadi dinina o mfunu: O tuyalu twa wantu mu nzimbu zitukanga kwa nkangu tusadilanga una ufwene. Ediadi nkumbu miayingi difilanga wantu mu lomba mbabu, yiya yo vunginika akaka. Kansi, e Kintinu kiaki mu wisa kia Nzambi kiyandila. Muna kuma kiaki, ntangwa zawonso kilungisa e nsatu za nkangu.—Nkunga 145:16.

2.  2. Ntinu. O Nzambi wasola Yesu Kristu kakala se Ntinu muna Kintinu kiandi.—Daniele 7:13, 14.

    Ekuma ediadi dinina o mfunu: Ayadi a wantu betoma vukumunuanga kw’akaka mu vanga mambu mambi, kana nkutu awana bena ye makani mambote. (Kimpovi 7:20) Nswaswana ye ayadi a wantu, Yesu wasonga vo ke vukumunua ko. (Matai 4:8-11) Vana ntandu, o Yesu muna mawonso kevanganga, mu zola kwakieleka ye wete dia nkangu andi kevangilanga mo.— Nkunga 72:12-14.

3.  3. Nsiku. E Nsiku mia Kintinu kia Nzambi mialunga, ye kiese mitwasanga kw’awana belemvokelanga mio.—Nkunga 19:7, 8.

    Ekuma ediadi dinina o mfunu: E nsiku mia wantu nkumbu miayingi miapimpita mikalanga, miampasi yovo elau mivananga kwa wantu mu kituka akwa umpuki. Kansi, e nsiku mia Nzambi miambote ye nluta kaka mitwasanga. (Yesaya 48:17, 18) Vana ntandu, e nsiku miami ke misingikanga kaka mavangu ko kansi ye makani ma wantu mpe. (Matai 22:37, 39) O Nzambi olenda zaya mana mena muna ntima mia wantu yo vanga mawonso kimana vo nsiku miami mia sadilwa kuna kiese.—Yeremiya 17:10.

 Tulombele wa zaya diaka mayingi mu kuma kia nsilu a Bibila wasia vo kuna sentu o tuyalu twa umpuki ke tukala diaka ko.

•   Tanga e longi “O reino de Deus—um governo sem corrupção” kimana wa mona e kuma tatu isonganga vo e Kintinu kia Nzambi ke kikituka kia umpuki ko.

•   Tala e video Nki i Kintinu kia Nzambi? mu zaya zaya mayingi mu kuma kia luyalu lwa Nzambi ye mana luvanga ova nza.

•   Lomba e longi dia ngovo dia Bibila kimana wazaya una olenda vwila e nluta muna nsilu mia Bibila.