Landila nsangu za Nações Unidas:

•   Tuka kina kia 7 kia Okutoba yakuna kia 23 kia Okutoba, 2023, o lutangu lwa nkangu ufwidi kala muna vita ya Gaza ye Isaele luviokele 6.400 ye awana balwele 15.200. Vana ntandu, mafunda ye mafunda bakitukidi se mintayila mia vita muna fulu yayingi.

•   Kina kia 24 kia Setemba, 2023, kuna Ucrânia o lutangu lwa nkangu ufwidi kala muna vita ya Russia ye Ucrânia, se 9.701 ye 17.748 balwala.

 E Bibila nkia vuvu kivananga kw’awana bemonanga e mpasi za vita?

 Bibila kiasakula vo Nzambi ‘osukisa e vita mu nza yawonso.’ (Nkunga 46:9) Nzambi ofwasa tuyalu twawonso twa wantu yo vingisa luyalu yovo kintinu kia zulu vana fulu kiau. (Dan. 2:44) Kintinu kia Nzambi kisinga twasa luvevoko lwa nkangu.

 Tala mana kevanga Yesu Kristu una vo i Ntinu a Kintinu kia Nzambi:

•   “Okûla nsukami vava kekaza, ye mumbona-mpasi ye ndiona okondelo nsadisi. Ofwila mumbona-mpasi e nkenda yo nsukami, ovuluza mioyo miau. Okubakûla muna lubangamu ye nsoki.”—Nkunga 72:12-14.

 Muna Kintinu kiandi, Nzambi osukisa emvimba usukami ye mpasi za vita ye nsoki.

•   “Okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi. O mambu mantete maviokele.”—Lusengomono 21:4.

 Ke kolo ko Kintinu kia Nzambi, nsobani zampwena kitwasa ova ntoto. Bibila kiasakula “vita ye nsangu za vita” tuwanga o unu. (Matai 24:6) E mambu mama mevangamanga ye mankaka mpe mesonganga vo mu “lumbu yambaninu” a tuyalu twa wantu tuzingilanga.—2 Timoteo 3:1.