Mu nsaka za Olímpico za mvu wau wa 2024, tezo kia bilhões tanu dia wantu betala awana bevanga e nsaka, batukidi mu mu nsi 206. Thomas Bach wa mfidi a buka kitalanga oma ma nsaka za Olímpico wavova vo: “E nsaka zazi zisadisa wantu mu nza yawonso mu zingila mu luvuvamu. Yambula twayikama e kani dia nsaka zazi dia sia vo wantu balenda zingila mu kintwadi ye luvuvamu kana una vo tuna ye fu ya kisi nsi yaswaswana.”

 Nga e nsaka za Olímpico zilenda lungisa e kani diadi? Nga e nza isinga kikilu kala mu kintwadi ye luvuvamu?

 E nsaka za Olímpico za mvu wau ke mpasi nsaka kaka ko. E nsaka zazi zisengomonanga mambu mayingi ma tuyalu ye mankaka mevambulanga o wantu. Muna mambu mama, tulenda yika luvevoko lwa wantu, mpambani za makanda, kitantu kia mabundu ye nswaswani vana vena wantu.

 E nsaka nze za Olímpico zilenda twasa e kiese kwa wantu. Kansi vana fulu kia twasa kintwadi ye luvuvamu, e nsaka zazi zisengomonanga yo nungununa kitantu ye kimpala vana vena wantu.

 E Bibila kiasakula fu ya mpila mu mpila ina ikakidilanga wantu mu kadila kuna luvuvamu ye kintwadi. (2 Timoteo 3:1-5) Muna zaya diaka mayingi mu kuma kia ungunza una muna Bibila, tanga e longi dina yo ntu a diambu “Será que a Bíblia predisse o modo como as pessoas iriam pensar e agir nos nossos dias?”

 Bibila kisonganga ye ziku kiawonso vo vesinga kala ye luvuvamu ye kintwadi ova nza. Bibila kisianga nsilu vo wantu ova nza besinga zingila mu kintwadi muna luyalu luyikilwanga vo “Kintinu kia Nzambi.”—Luka 4:43; Matai 6:10.

 Yesu Kristu wa Ntinu a Kintinu kiaki, osinga twasa luvuvamu mu nza yawonso. Bibila kivovanga vo:

•   “O nsongi osakumuka, luvuvamu luwokela.”—Nkunga 72:7.

•   “Okûla nsukami vava kekaza . . . Okubakûla muna lubangamu ye nsoki.”—Nkunga 72:12, 14.

 Kana nkutu o unu, malongi ma Yesu meyikakesanga ulolo wa wantu mu vioka 239 ma nsi. Nze Akristu, Mbangi za Yave mu nza yawonso belongokanga una balenda zingilanga mu luvuvamu. Muna zaya dina dikubasadisanga, tanga Eyingidilu dina yo ntu a diambu “E Fu kia Menga Akaka Aweyi Kifokokela?.”