Mu ngonde a Yuli ya 2022, akwa nsoki, ndonga ayingi bavondele muna nkele mu nza yawonso:

•   “O lufwa lwa nkwa mbumba otomene zayakana, ona wavondelo muna nkele, [Shinzo Abe ona wateka kala se Mfidi Antete wa Luyalu lwa Japão] lwakendelekele kikilu e nsi ye nza yawonso. Musungula kuna Japão kuna vo o nsoki ke wayingi ko ye muna kuma kia nsiku, diampasi kikilu mu vua o nkele.”—Kia 10 kia Yuli 2022, The Japan Times.

•   “E nsi a Dinamarca yakendalala kikilu ina, kadi nongi mosi wavondele wantu tatu muna vula diatekela e lekwa muna mbanz’a Copenhague.”—Kia 4 kia Yuli, 2022, Reuters.

•   “África do Sul: Buka kia wantu ye nkele miau bakotele mu kingolo muna nzo ya tekela madia muna mbanz’a Soweto ye bavondele wantu 15.”—Kia 10 kia Yuli, 2022, The Guadian.

•   “Vioka 220 ma wantu bavondelo muna nkele kuna Estados Unidos muna nsuk’a lumingu lwakedi o nkinzi wa kia 4 kia Yuli.”—Kia 5 kia Yuli, 2022, CBS News.

 Nga vena ye vuvu vo mavangu mama ma nsoki mesinga fokoka? E Bibila adieyi kivovanga?

 E Bibila kiyikilanga e lumbu yeto vo “lumbu yambaninu.” Kivovanga mpe vo mu nsungi yayi o wantu bekala akwa lulendo ye besakisa o nsoki. (2 Timoteo 3:1, 3) O nsoki wau ufilanga wantu mu zingila mu wonga. (Luka 21:11) Kansi, e Bibila kisianga o nsilu vo vekala ye ntangwa o nsoki ufokoka emvimba. I bosi, ‘nkangu uzingila vana fulu kia luvuvamu, muna fulu ya lutaninu ye muna fulu yavuvama.’ (Yesaya 32:18) Ediadi aweyi divangamena?

 Nzambi ofwasa wantu ambi ye nkele miawonso.

•   “Yimpumbulu, befwaswa ova ntoto.”—Ngana 2:22.

•   “[Nzambi] osukisanga e vita muna nza yawonso. Yo tolola mfumba yo bukuna e dionga; oyokanga makalu ma vita vana tiya.”—Nkunga 46:9.

 Nzambi osukisa e tuku dia nsoki muna longa wantu kimana bakala akwa luvuvamu.

•   “Ke bevanga mbi ko ngatu fwasa konso lekwa muna mongo ame awonso wavauka, kadi e nza izala kieleka yo zayi wa Yave wauna o maza mefukilanga kalunga.”—Yesaya 11:9.

•   Kana nkutu owau, Nzambi olonganga wantu mu nza yawonso ‘bakitula e nsosolo miau se nsengo. O madionga mau se zengelwa ya titi,’ i sia vo bakala akwa luvuvamu yo yambula sadila e nkele.—Mika 4:3.

 Muna zaya mayingi mu kuma kia nza yakondwa wonga, tanga e longi “É possível ficar livre do medo?”

 Muna zaya mayingi mu kuma kia mpila ifokokela nsoki, tanga e longi “Paz na Terra enfim!”