Tezo kia bilhões tanu za wantu balanda e nsaka za Somba dia Malu dia Nza yawonso diakubikwa kwa FIFA tuka kina kia 20 kia Novemba yakuna kia 18 kia Desemba, 2022. Ndonga beyindulanga vo e nsaka zazi za somba zilenda vanga mayingi ke yikakesa kaka nkangu ko ekolo betalanga dio.

•   “E nsaka za somba zivuidi o nkuma wasoba e nza. Zivuidi o nkuma wafila e zingu kia wantu. Zivuidi o nkuma wayikakesa wantu mu mpila yasivi.”—Mvovo mia Nelson Mandela, ona wakala se mfidi a nsi ya África do Sul.

•   “E somba dia malu . . . Diyikakesanga wantu muna vuvu, muna kiese, muna zola ye makanda maswaswana.—Mvovo mia Gianni Infantino, mfidi a FIFA. a

 Nga e Somba dia Malu dia Nza Yawonso yovo nsaka zankaka zilenda lungisa o mambu mama mamfunu?

Nga vena ye vuvu vo o wantu besinga kala mu kintwadi ye luvuvamu?

 E Somba dia Malu dia Nza Yawonso dia mvu wau, difididi wantu mu yindula mambu mayingi, kansi ke nsaka kaka ko. E nsaka za somba diadi, zifididi wantu ayingi mu filana mpaka mu kuma kia nzimbu, mpasi za nkangu, mambu ma mbumba, zitu wa wantu, fu kia sia mpambula ye mpasi za zingu.

 Kana una vo i wau, wantu ayingi beyindulanga mpe vo e nsaka za nz’amvimba nze i somba dia malu kiese kiayingi zitwasanga. Kansi, wau vo wantu ayingi bekwendanga muna nsaka zazi, ke zilendi yikakesa wantu ko yakwele mvu. Vana fulu kia yikakiana, o wantu fu kia sia mpambula betoma songanga. E Bibila kivovanga vo e fu kiaki i sinsu kia “lumbu yambaninu.”—2 Timoteo 3:1-5.

 E Bibila kiyikanga e vuvu kiakieleka muna diambu ditadidi yikakesa e nza yawonso. Kisianga o nsilu vo wantu awonso ova nza, bekala bayikakiana muna wisa kia luyalu lwa zulu luyikilwanga vo “Kintinu kia Nzambi.”—Luka 4:43; Matai 6:10.

 O Ntinu a Kintinu kiaki, Yesu Kristu, otwasa luvuvamu omu nza yawonso. E Bibila kivovanga vo:

•   “O nsongi osakumuka, luvuvamu luwokela.”—Nkunga 72:7.

•   “Okûla nsukami vava kekaza, . . . Okubakûla muna lubangamu ye nsoki.”—Nkunga 72:12, 14.

 Kana nkutu o unu, malongi ma Yesu mayikakese kala mafunda ye mafunda ma wantu muna nsi 239. Belongokanga vo bayambula e fu kia menga akaka. Muna zaya diaka mayingi, tanga e longi divaikanga dina yo ntu a diambu vo “E Fu kia Menga Akaka Aweyi Kifokokela?”