Omu ngonde a Yuli ya 2022, e mbangazi yawokele kikilu mu zunga yayingi ova nza:

•   “E nsi a China yizayisi o wokela kwa mbangazi mu mbanza 70 mu nkumbu wanzole omu ngonde yayi.”—Kia 25 kia Yuli, 2022, CNN Wire Service.

•   “O wokela kwa mbangazi kutwese e tembwa yangolo yo yoka mfinda zayingi mu nsi za Mputu.”—Kia 17 kia Yuli, 2022, The Guardian.

•   “Kina kia lumingo e mbanza zawonso za nsi a Estados Unidos zilwakilu kwa mbangazi yasaka eyi yisayanene muna nlambu a mbu a Este.”—Kia 24 kia Yuli, 2022, The New York Times.

 Ediadi nkia nsasa dina? Nga ediadi disongele vo muna lumbu ilanda ova nza ke vekala diaka vangwa ya moyo ko? E Bibila adieyi kivovanga?

 Ingeta. Bibila kiasakula vo o mambu mama nze iwokela kwa mbangazi mevangama mu lumbu yeto. Muna mbonge nona, Yesu wavova vo “mukala mpe mambu mansisi,” yovo “mambu mampasi.” (Luka 21:11; Nova Versão Internacional) Mu kuma kia wokela kwa mbangazi mu nza yawonso wantu ayingi bena yo wonga mu sia vo o wantu be fwasa e nza.

 Ve. Nzambi wavanga o ntoto kimana o wantu bazingila vo yakwele mvu. (Nkunga 115:16; Kimpovi 1:4) Nzambi ke yambula ko vo wantu bafwasa o ntoto. Muna kuma kiaki, ‘ofwasa awana befwasanga e nza.’—Lusengomono 11:18.

 Tala mambu mole kevanga nze una kasila o nsilu:

•   “O makanga ye nsi ayuma iyangalala, o nzanza umona e kiese yo mena e mvuma nze safoni.” (Yesaya 35:1) Nzambi ke yambula ko vo o ntoto wakituka nze makanga makondwa vangwa ya moyo. O vangulula yawonso o wantu befwasanga.

•   “Olunga-lunganga ntoto, oyimisanga wo mbongo yo vuamisa wo.” (Nkunga 65:9) Nzambi okitula o ntoto se paradiso.

 Muna toma bakula una e nsobani za nsungi zilungisilanga o ungunza wa Bibila, tanga e longi “E Bibila Adieyi Kivovanga Muna Diambu dia Nsobani za Nsungi ye Zingu Kieto kia Kusentu.”

 Muna zaya diaka mayingi mu kuma kia nsilu wa Bibila usonganga vo Nzambi ovangulula o ntoto, tala e longi “Quem salvará a Terra?”