O katulwa mu salu dilenda kutwasila mpasi za zingu, mpasi muna nzo, ntokani yo dimbula e vuvu. Tala malongi mambote ma Bibila malende oma malenda kusadisa mu zizidila e mpasi zazi zawonso.

•   Zayisa e ntokani zaku kwa akaka.

   E Bibila adieyi kivovanga: “Nkundi akieleka ozolanga e ntangwa zawonso.”—Ngana 17:17.

   Vava muntu e katulwanga muna salu olenda bakamwa kwa lukendalalu, yo kuyi mwena makasi, mona kutu vo kena diaka mfunu ko yo lembi zaya dina dia vanga. Kansi, vo mokene ye finangani zaku, akundi ye yakaka una omonanga balenda kuvana lusadisu luna ovwidi o mfunu. O yau mpe balenda kuvana malongi mana me kusadisa mu kwamanana nuana.

•   Venga fu kia tokana kwayingi.

   Adieyi e Bibila kivovanga: “Ke nutokani ko mu kuma kia mbazi, kadi e lumbu kia mbazi kikala ye ntokani zandi.”—Matai 6:34

   E Bibila kikutukasakesanga twateka kubamanga. (Ngana21:5) Kikutulonganga mpe twalembi tokananga kwayingi yovo yangwamwa moyo mu kuma kia kusentu. Nkumbu miayingi tutokananga mu kuma kia mambu mana ke mesinga bwa kwandi ko. Diambonte mu tokanenanga kaka oma ma unu.

   Bibila kivananga malongi ma mbote mana olenda sadila mu lembi bakamwa kwa lukendalalu lwasaka. Mu zaya diaka mayingi tanga e longi “Como Lidar com o Estresse.”

•   Vanga konso sobani zivwilu o mfunu.

   Adieyi e Bibila kivovanga: “Yalongoka . . . kala ye ulolo ye kondwa lekwa.”—Filipi 4:12.

   Vanga e sobani mun’owu wa mambu onwananga mau. Ediadi divavanga vo wasoba mpila osadila e nzimbu mpasi vo walenda zingila ye ina una yau. Keba walembi kota mfuka za kondwa o mfunu.—Ngana 22:7.

   Mu zaya diaka mayingi mu kuma kia sobani ofwete vanga mu mpila osadilanga e nzimbu, tala e longi “Como viver com menos dinheiro?.”

•   Sadilanga e ntangw’aku mu mpila yambote.

   Adieyi e Bibila kivovanga: “Nukangadilanga muna ngangu . . . , nutoma sadilanga e ntangwa eno.”—Kolosai 4:5.

   Kana una vo kuna diaka ye ola ya sikidiswa ko ya sala, toma sadilanga e ntangw’aku. Muna wo vanga dikusadisa mu tanina e mpila zingu kiaku yo kala ye kiese.

•   Kala wakubama muna sala konso salu.

   Adieyi e Bibila kivovanga: “Muna mfuntu wawonso muna ye nluta.”—Ngana 14:23.

   Kala wakubama mu sala konso salu kina kwateka sala ko. Nanga divava vo wavava sala e salu kina omwenanga vo ke kina mfunu ko yovo ke kifutanga nzimbu zayingi ko, nze kuna wasadilanga.

•   Kala yo luzindalalu.

   Adieyi e Bibila kivovanga: “Kuna e mbongo aku muna mene, kuvundisa moko maku ko yavana kuma kufwa; kadi kuzeye ko ayeyi ivana nluta.”—Kimpovi 11:6.

   Kala yo luzindalalu muna vava e salu. Zayisa kwa akaka vo salu una vavanga. Zayisa kwa yitu yaku, awana nuzayanene, kwa awana wa salanga yau ye mfinangani zaku. Toma sia e sungididi muna fulu imwanganesanga e nsangu za salu muna zulunalu ye muna internet. Kala wa kubama mu kwenda mokena yo makompani mayingi mevavanga asadi yo kwamanana twika e nkanda mia salu muna makompani mevavanga asadi e kolo kwasolwele e salu ko.