Mu mvu wa 2023, e nganga za mawuku bamwene vo diambu bafwete vanga kadi wantu ayingi benuananga ye yimbevo mu kuma kia kinsona. Adieyi dilenda sadisa wantu mu sunda kinsona?

•   Vivek Murthy wa ngang’a mawuku kuna Estados Unidos wavova vo: “Kinsona kilenda sia vimpi weto mu vonza yo kulula kiese kieto.” Kansi wakudikila vo: “Vena ye diambu tulenda vanga muna sunda kinsona.” Adieyi tulenda vanga? “Konso lumbu tulenda vanga mambu makete-makete muna siamisa yikundi yeto.” a

 O wantu kebemonanga kaka kinsona ko mu kuma kia sia vo va yau mosi kaka bena. Ayingi balenda mona kinsona kana nkutu vo va fulu kia ndonga bena. Kiakala nkia kuma tumwenanga kinsona, e Bibila kilenda kutusadisa kadi kivuidi malongi mambote malenda kutusadisa mu sunda kinsona yo vanga yikundi yambote.

 Kala ye mbokena zambote. E mbokena zambote ke diambu dia zayisa kaka ngindu zeto ko kwa akaka, kansi dia sianga mpe sungididi vava akaka bevovanga. Avo tuzolele kala ye yikundi yambote, tufwete tokanenanga e wete dia wantu ankaka.

•   Nkanikinu a Bibila: “Ke nuvavingi kaka wete wa yeno kibeni ko, kansi wete dia akaka mpe.”—Filipi 2:4.

 Vanga yikundi yo wantu ayingi. Kala ye tima dia vanga yikundi ye ambuta, aleke yo wantu a zunga yovo nsi zankaka.

•   Nkanikinu a Bibila: “Nuziula e ntima mieno.”—2 Korinto 6:13.

 Muna zaya diaka mayingi mu mpila olenda vangila yinkundi yambote, tanga e longi “Satisfazer a sede de amizades.”