Yesu wavovesa alongoki andi vo: “Nukala mbangi zame . . . yakuna nsuk’a nza.” (Mavangu 1:8) O unu, Mbangi za Yave besalanga e salu kiaki yo vema kwawonso. Kansi, muna nsuka za nza muna ye zunga ina vo wantu ayingi ke besilwanga umbangi ko. Muna nsi zankaka, e Mbangi za Yave ke bena ndonga ko. (Matai 9:37, 38) Ameyi tuvanganga mu lwakisa e nsangu zambote kwa wantu ayingi?

 Muna lemvokela nkanikinu a Yesu, e Buka kia Salu muna Selo Yambuta ya Mbangi za Yave kitumanga misionario muna zunga ivuidi asadi o mfunu omu nza yawonso. Owau, 3,090 lwa ampangi besalanga e salu kia misionario omu nza yawonso. a Ndonga muna yau bakota sikola za Bibila, nze i Sikola ya Ateleki a Kintinu. Misionario muna luzolo lwau besisanga e nsi zau yo kwenda sadila muna nsi za kinzenza. Wau vo batoma zikuka ye betoma longwanga ye bazeye e salu kieto, e mpangi zazi z’akwa kwikizi besadisanga mu sayanesa e nsangu zambote yo sadisa ateleki ampa muna mbandu au ambote.

 Muna konso vula, e Buka Kitalanga e Salu kia Umbangi muna Departamento ya Salu besalanga kumosi ye afidi a mavula mu lunga-lunganga e nsatu za misionario, nze kubavavila e nzo zambote, mawuku mambote ye lusadisu lwakete lwa nzimbu. Muna mvu wa salu wa 2021, Mbangi za Yave tezo kia mafuku milhões 27 za doler basadidi mu lunga-lunga e misionario. Muna kuma kia tukau tweno, e misionario balenda sia e sungididi muna salu kiau yo kumika ampangi muna nkutakani zau.

 E salu kia misionario aweyi kitwasilanga e nluta muna salu kia samuna e nsangu zambote? O mpangi Frank Madsen, ona osadilanga muna Buka kia Afidi a Vula dia Malawi wavova vo: “Muna kuma kia unkabu ye ndekwa zau, misionario besadisanga mpangi za nkutakani mu silanga umbangi kana nkutu muna zunga ina vo yampasi mu lwaka, nze muna belo ikalanga ye ayingidi ye belo izingilaga wantu bevovanga ndinga za kinzenza. E ngolo bevanganga mpe mu longoka ndinga za kisi nsi ye kinkulu, zikalanga se mbandu ambote kw’akaka. E mbandu au ambote mpe itoma tuntanga aleke mu kota mu salu kia ntangwa ke ntangwa. Tuvutulanga matondo kwa Yave muna salu kisalanga e misionario.”

 Mosi muna Afidi a Vula dia nsi yankaka wavova vo: “E misionario i ziku kisonganga vo nkangu a Yave wayikakiana omu nza yawonso. Kana nkutu wantu ankaka ana ke besambilanga Yave ko balenda mona vo e fu ya kisi nsi ke ikutuvambulanga ko. E malongi ma Nkand’a Nzambi mekutukitulanga se kintwadi kia wan’angudi.”

 E salu kia misionario aweyi kisadisilanga ampangi muna nkutakani? Paulo, wa musi Timor-Leste, ovutulanga matondo mu kuma kia misionario bafilwa muna nkutakani andi. Wavova vo: “Omu zunga kieto e mbangazi ngolo ikalanga. Kansi, e misionario ana batuka muna zunga ya kiozi, ke beyambulanga ko vo e mbangazi yayi yabakakidila mu sala e salu kia samuna e nsangu zambote. Ntangwa zawonso bekalanga muna lukutakanu lwavaika mu salu kia umbangi muna mene. Nkumbu miayingi ikubamonanga vava bekingulanga wantu muna midi, ola ina vo e mbangazi ngolo kikilu yikalanga. Besalanga mpe yamuna nkokela. Wantu ayingi besadisanga mu zaya e ludi, kumosi ye mono kibeni. Kuna vema ye kiese kiawonso, besadilanga e zingu kiau kiawonso muna salu kia Yave. Ediadi difilanga ampangi muna nkutakani mu sadila Yave una ufwene.”

 Ketti, mviti a nzila a ngonde ke ngonde kuna Malawi, wayika una akazi mosi a misionario basadisila esi nzo andi: “Vava akazi awaya a misionario balwaka mu nkutakani eto, muna nzo eto mono kaka yasadilanga Yave. Batoma kunsadisa yo kituka se akundi akola kwa esi nzo ame. E mbandu au ambote yasadisa wan’ame mu mona una e salu kia Yave kitwasilanga e kiese ye zingu kiasikila. Muna kuma kia lusadisu lwa misionario awaya, wan’ama atatu a makento owau besalanga se aviti a nzila a ngonde ke ngonde. O nkaz’ame wayantikidi kwenda mu tukutakanu.”

 E nzimbu zisadilwanga mu sadisa misionario akweyi zitukanga? Muna tukau twa salu kia nz’amvimba, twayingi muna tukau twatu tuvaninuanga muna nzila ya donate.pr418.com. Tuvutulanga matondo muna kuma kia tukau twatu twa mvevo.