Mbangi za Yave betoma sadisanga mpangi zau. (1 Petelo 2:17) Ayingi omu yeto tumonanga nze una kemonanga o mpangi Tannis kuna Quênia. Wavova vo: “Iyangalalanga zaya mambu mebwilanga mpangi zame mu nzʹamvimba.” Aweyi mpangi Tannis kumosi ye ulolo wa mpangi zeto bezayilanga mambu mama? Tuka muna mvu wa 2013, twavaikisa e kunku kia Nsangu muna nzil’eto jw.org.

 Mu kunku kiaki muvaikanga e nsangu mu kuma kia Mbangi za Yave, nsunzula za Bibila, salu kia vana lusadisu kwa awana bebwilanga e sumbula, salu kia tunga e fulu ya nsambila ye mambu mankaka mamfunu. Kunku kiaki kikutuzayisanga e nsangu za mpangi zeto bena mu pelezo mu kuma kia lukwikilu lwau. Kikutuzayisanga mpe e nona ya lukasakeso mu kuma kia sila umbangi muna buka ye Luyindulu. Aki nani bevavanga mambu mesiwanga mu kunku kiaki ye aweyi bekubikilanga mo?

 E Departamento ya Nsangu za Nz’amvimba i yau ilunga-lunganga e kunku kiaki kia Nsangu. E departamento yayi ina kuna vula diasina ye isalanga muna lutumu lwa Buka kia Afidi muna Buka kia Selo Yambuta. Vioka tezo kia mpangi 100 besadilanga muna Departamento yayi—ayingi muna yau besadilanga muna nzo zau. Akaka asoneki, avavuludi, abandudi a mafoto ye asekodi. Akaka muna yau, bemokenanga ye ayadi, alongi a sikola ye amwangi a nsangu. Vioka 80 lwa Buka ya Azayisi a Nsangu muna mavula beyikamanga Departamento yayi.

 Muna kubika nsangu zampa, e Departamento ya Nsangu za Nz’amvimba isalanga entwadi ye Buka ya Azayisi a Nsangu. Vava ampangi bezayanga diambu diamfunu dibwidi, bevavanga e ntu a diambu ye mambu maziku. Balenda mokena mpe ye ambangi ye akwa umbangu. Vava bezayanga e ziku kia mambu mawonso, besonekanga mo, besingikanga yo fimpulula mo yo tula mo mafoto. I bosi betwikanga mo kwa Buka kia Afidi kimana kiavana o nswa wavayikisa mo.

 Aweyi mpangi zeto bemonanga mu kuma kia kunku kiaki kiazayisilwanga e Nsangu? Mpangi Cheryl, ozingilanga kuna Filipinas wavova vo: “Iyangalalanga yantika e lumbu kiame muna tanga e nsangu mu kuma kia nkubik’a Yave ye nkangu andi.”

 Atangi ayingi bayika e nswaswani bamona muna kunku kia Nsangu muna jw.org ye muna nzila zankaka za mwangina e nsangu muna internet. Mpangi Tatiana kuna Cazaquistão wavova vo: “Itoma yangalalanga e kunku kiaki, kadi ndenda bunda e vuvu muna nsangu zivaikiswanga muna jw.org. Kadi zaziku ye zasikididi.” Mpangi Alma kuna México wavova vo: “Nswaswani ye nsangu za nkenda zivayikiswanga kwa amwangi a nsangu, e kunku kiaki kia Nsangu kitoma kutukasakesanga.”

 E kunku kia Nsangu kekibundwanga kaka vuvu ko, kansi kikumikanga mpe lukwilu. Mpangi Bernard kuna Quênia wavova vo: “E kunku kia Nsangu kikunsadisanga mu badikila mpangi zame omu nz‵amvimba nze yitu yame, kiakala nkia fulu bena. Muna sambu yame iyikanga e nkumbu zau ye mambu benuananga mau.” Mpangi ankento una ye nkumbu a Bybron, ozingilanga mpe kuna Quênia, wavova vo: “Itoma yangalalanga konso ntangwa imonanga e nsangu za nsunzul’a Bibila mu ndinga zaswaswana. E nsangu zazi zikunsungamesanga vo Yave kesianga mpambula ko.”

 Kana nkutu e nsangu zivovelanga una mpangi zeto bezizidilanga lubangamu, zilenda kutukasakesa. Mpangi Jackline kuna Quênia wavova vo: “O yindula unkabu besonganga, dikumikanga lukwikilu lwame. Ntangwa zawonso ivavanga zaya adieyi dikubasadisanga mu zizidila. Yabakula vo mambu mana tulongwanga bevanganga nze: samba, tanga e Bibila yo yimbila. Mambu mama mekubasadisanga mu kala wakumama.“

 Mpangi Beatriz kuna Costa Rica, oyangalelanga e nsangu zivovelanga oma ma sumbula. Wavova vo: “E Nsangu zazi zikunsadisanga mu mona una nkubik’eto ivaninanga lusadisu kwa mpangi zeto mu nzaki, mu mpila yambote yo kadila yau kuna zola. Ediadi dikunkwikidisanga vo eyayi i nkubik’a Yave.”

 Ekwe kiese tuna kiau mu zaya mayingi mu kuma kia mpangi zeto mu nz’a mvimba! Mawonso mama mevangamanga mu kuma kia nkayilu mieno nuvananga muna yikama e salu kia nz’amvimba, miayingi muna nkayilu miami nuvaninanga mio muna nzil’a donate.pr418.com. Tunuvutwidi matondo mu kuma kia nkayilu mieno.