“Mvu 19 miviokele kala tuka mena yayantika wo vingila!” Nkia lekwa o mpangi eto kavingidinge? Nsekola ya Nz’ampa ya Sono ya Kingerekia ya Kikristu muna nding’andi a kingutukila, Bengali. Mpangi zayingi i wau mpe bevovanga vava kisunzulwanga e Nsekola ya Nz’ampa muna ndinga zau. Ozevo, nga wakiyuvula kala kana ameyi mevavuanga muna sekola yo nieteka e nsekola yayi ya Bibila?

 E ntete, Buka kia Asoneki kia Selo Yambuta besolanga asekodi ana besekola Bibila. Mvu kwa miviokanga muna sekola Bibila? Mpangi Nicholas Ahladis, osadilanga muna Buka Kitalanga e Salu kia Nsekola, kuna Warwick, Nova Iorque, wavova vo: “Mambu mayingi mesiwanga e sungididi, musungula asekodi kwa bafwana sadilwa mu sekola Bibila, nga e ndinga mpasi ina muna sekola, nga atangi bebakulanga una wakala e zingu kia wantu vava Nzambi kasonekesa Bibila, e ndinga nga mu zunga yayingi ivovuanga, nga konso zunga kina ye mpil’andi yavovela. Muna lukufi, mvu tatu miviokanga muna sekola e Sono ya Kingerekiya ya Kikristu ye mvu tanu diaka miviokanga muna fokola e Bibila kia mvimba. Vo i asekodi a ndinga za sinsu, mvu miayingi beviokesanga muna sekola e Bibila.”

 Asekodi a Bibila ke yau mosi kaka ko befokolanga e salu kiaki. Vesolwanga mpe buka kia ampangi ana batomene zaya e nding’au muna nkutakani zayingi ye nsi zaswaswana kimana batanganga yo fimpa e Bibila ekolo kisekolwanga. Mpangi zazi bekukivananga kuna mvevo mu yikama e salu kiaki. Mambu mana besingikanga muna ntangilu zau mesadisanga asekodi a Bibila mu singika yovo soba miaka mvovo kimana e nsekola yakala yatoma kiá yo simba e ntima mia wantu. O vanga wo mfunu kikilu dina, kadi nlongi mosi wa asekodi a Bibila kuna África do Sul wavova vo, “asekodi bekuyimwenanga vo mbembe ampwena bena yau vana meso ma Yave ye atangi wau besekolanga e Diambu dia Nzambi.”

 Avo e salu kia sekola kifokokele, e Bibila kifwete nietekwa yo vangwa mabuku. Muna vanga wo, sadilwa yayingi divavanga nze, papela, tinta, nsinga, dimbu, fukwa ye lekwa yankaka muna lenda yikanesa papela za nietekwa yo vanga mabuku. Muna mvu wa 2019, vioka tezo kia milhões 20 za nzimbu za dólar za futwa muna sumba e salanga yawonso muna nieteka Bibila mu ndinga zayingi. Ampangi besadilanga kuna masini menietekanga e nkanda mieto, tezo kia 300.000 ma ola basala muna nieteka yo kayanesa Bibila.

 Ekuma tufutilanga nzimbu zayingi yo sadila e ngolo ye ntangw’eto muna salu kia nieteka Bibila? Joel Blue, osadilanga muna Buka Kitalanga e Salu kia Nieteka Nkanda omu Nza Yawonso, wavova vo, “e Bibila i nkanda usundidi o mfunu muna nkanda miawonso tunietekanga. Muna diadi, tuzolele vo wakala ye mpwa yambote itwasa o nkembo kwa Nzambi ona tusambilanga ye kwa nsangu zina tusamunanga.”

 Tunietekanga mpe Nsekola ya Nz’ampa mu masono ma mpwena ye mu Braille, muna sadisa atangi ana bena vo mpofo yovo ke belendanga tanga masono makete ko. Muna bong’e nona, e Nsekola ya Nz’ampa ina muna masono ma braille mu tezo kia ndinga kumi. Muna nieteka Bibila kia mvimba kia masono ma braille kilenda vanga ola nana ye papela zandi fulu kiayingi zidianga muna masini, avo zindakeso vana tandabala zilenda lwaka tezo kia meta zole ye ndambu. Vana ntandu, tunietekanga mpe Bibila zisadilwanga muna pelezo zina vo, ke zitondanga kotesa nkanda mina ye fukwa ya ngolo ko.

 E Nsekola ya Nz’ampa isobanga e zingu kia wantu betanganga yo. Tala dina diavangamana muna nkutakani ya Kiluba, kuna vata dia Tombe, República Democrática do Congo. E vata diadi kwa ndá dina ye mbanz’a Kinshasa, tezo kia 1.700 za kilometa. Ampangi za nkutakani yayi Bibila kimosi kaka bakala kiau ye kia zala ye mvovo mia nkulu mia Kiluba. E Bibila kiaki kiakangalalanga mu nzo za mpangi zawonso kimana balenda kubika malongi ma tukutakanu. Kansi, tuka muna ngonde ya Agositu ya mvu wa 2018, konso muntu muna nkutakani watambula Bibila kia mvimba kia Nsekola ya Nz’ampa muna nding’a Kiluba kia leboka.

 Mpangi mosi a nkento ovovanga e nding’a Alemã, edi kavova mu kuma kia Nsekola ya Nz’ampa yafimpulwilu muna nding’andi: “Kivovanga diaka ko vo mfwete tanga Bibila. Kansi, Ikiyuvulanga vo, ‘Nkia ntangwa mfwete tanga diaka?’” Tala dina mbakami mosi kavova muna pelezo: “Yatambwidi Bibila kia Nsekola ya Nz’ampa, mu soba kina e zingu kiame. Kiasidi bakula e Diambu dia Nzambi ko, kansi owau e nsekola yayi insadisi mu bakula. Nzolele zaya mayingi mu kuma kia Mbangi za Yave ye dina ndenda vanga mu kituka se Mbangi a Yave.”

 Atangi awonso a Nsekola ya Nz’ampa bevutulanga matondo mu kuma tukau tweno tuvewanga muna yikama e salu kia nieteka yo kayanesa e Bibila kiaki. O tukau twatu tuyikamanga e salu kia nza yamvimba tuvaninwanga muna lusadisu lwa nzil’eto ya internete donate.pr418.com. Tuvutwidi matondo muna tukau tweno twa mvevo.