Konso mvu, akaka muna selo ya salu kia espesiale kia ntangwa ke ntangwa omu nza yawonso bebokelwanga benda kota e Sikola ya Ngiladi ya Torre de Vigia, eyi ivangamenanga kuna Centro Educacional da Torre de Vigia, kuna Patterson, Nova York. a Muna sikola yayi, o wana kalasi belongokanga una balenda lungisa e yiyekwa yau una ufwene omu nkubika Yave. O malongi momo mekubasadisanga mu siamisa e nkutakani yo mavula mu nza yawonso.

 E Ngiladi sikola ya nz’amvimba kikilu. Muna bonga e nona, e kalasi kia 147, eki kiavamanga muna mvu wa 2019, kiakala ye 56 ma alongoki batuka mu nsi 29. Awana bebokelwanga bakota e sikola ya Ngiladi, i awana bena kala muna salu kia espesiale kia ntangwa ke ntangwa nze, ampangi kuna Betel, akengi a zunga, misionario ye aviti a nzila a espesiale.

 E nkubika za bokelesa awana bekota e sikola zavangamanga kolo kiandá vitila e kalasi kiayantika. Kaskil’owu, e Departamento ya Nkangalu ya Vula Diasina yau isumbanga e tike ya awana babokeleso benda kota e sikola. Muna bonga e nona, muna kalasi kia 147 kia Ngiladi, konso nlongoki watuka mu nsi a kinzenza, o nkangalu andi wa kwenda kuna Patterson yo vutuka 1.075 lwa dolare wafwa. Alongiki ana batuka kuna Ilhas Salomão, ndeki ziyá babaka muna lwaka kuna Patterson. I bosi, babaka diaka ndeki zitatu muna vutuka. Mu lumbu yayingi bavanga o nkangalu wowo wa 35.400 ma kilometa! O nkangalu wowo bavanga mu ndeki, tezo kia 2.300 za dolore wafwa muna konso muntu. Muna lembi fwasa nzimbu zayingi, e Departamento ya Nkangalu isadilanga programa ya komputadore mu vava tike ya ntalu akuluka. Kana nkutu vo basolwele kala yo lundisa e tike kia ntalu akuluka, e programa ikwamanananga vava mu zaya kana vo e ntalu ikulukidi diaka. E Departamento ya Nkangalu isadilanga mpe nkayilu bevenanga o makompani ma ndeki (yovo créditos e milhas da companhia aérea) muna sumba e tike.

 Kuna kwa alongoki ayingi divavanga bafwete kala ye visto muna kota muna nsi ya Estados Unidos. Muna kuma kiaki, e Departamento ya Nkangalu ya Vula Diasina isadisanga alongoki balenda e visto ya kwenda tangila kuna Estados Unidos. Muna baka o nkanda wau yo nswa wa kota kuna nsi yayina, 510 dia dolare ifutwanga muna konso muntu.

 Oyeto nkia nluta tubakanga muna mambu belongokanga awana bekotanga sikola yayi? O Hendra Gunawan una vo nkuluntu a nkutakani imosi kuna sude-lunene ya Asia, eyi ina ye akazi bakota sikola ya Ngiladi, wavova vo: “Entete, e nkutakani eto ke yakala ye mviti a nzila a ngonde ke ngonde kana mosi ko, kansi vava akazi awaya batuka kuna Ngiladi balwaka, o ntimau amvevo yo vema kwau kwasambila ampangi mu nkutakani, akaka bakituka se aviti a nzila. Kuna kwalanda, mpangi mosi ankento a nkutakani eto wakota Sikola ya Ateleki a Kintinu!”

 Sergio Panjaitan ku Betele kesadilanga kuna sude-lunene ya Asia kumosi ye mpangi bakota sikola ya Ngiladi. Sergio wavova vo: “Mana balongoka kuna Ngiladi matwasa nluta miayingi kwa yau; kansi matwasa mpe nluta kwa yeto. Mambu mayingi balongoka! Kansi vana fulu kia sadila mambu momo muna kuyitundidika, oyau belonganga mambu momo kwa wantu akaka. Ediadi ditoma kutukasakesanga, dikutusadisanga mpe mu kasakesa wantu akaka.”

 Akweyi kutukanga e nzimbu zisadilwanga mu sikola yayi? Muna tukau tuvewanga mu kuma kia salu kia nz’amvimba. Twayingi muna tukau twatu mu internete tuvaninuanga, muna nzila donate.pr418.com. Tuvutwidi matondo muna tukau twaku twamvevo, otu tuyikamanga e sikola ilonganga wantu a nza yawonso.