Eyingidilu dia 1 kia Yuni ya mvu wa 1912 diavova vo: “Nanga ayingi muna atangi a nkanda mieto bazeye wantu ayingi bena vo ampofo ana balenda tambula nkanda mia ngovo mia tanga. . . . E nkanda miami mivuidi sinsu ya mfinga ilenda tangwa kw’ampofo.” Eyingidilu diakudikila vo: “Mpofo zayingi betoma yangalalanga e nsangu za sia vo, ke kolo ko o wantu ova nza betambula ulolo wa nsambu.”

 Vava mvovo miami miasonekwa, e mpila yasonekenwanga masono m’ampofo yaswaswana yakalanga muna nsi zivovuanga e Kingelezo. Mbangi za Yave “sinsu yamfinga” basadilanga muna soneka e ludi kia Bibila muna nkanda mia ampofo. Yamu wau twakinu sadila e sinsu yayi! Owau vioka ndinga 50 zisekolanga nkanda mia ampofo. Aweyi mivaikisilwanga?

 E salu kiantete kisalwanga muna vaikisa nkanda mi’ampofo i soneka wo muna sinsu y’ampofo. Michael Millen osadilanga Muna Buka kia Kubika e Sono wasasila vo: “Muna mvu miavioka, e programa ya computador twasadilanga muna soneka nkanda mi’ampofo ya makompani mankaka, kansi ke yasalanga ko muna ndinga zankaka twazola vaikisila nkanda mia ampofo. Owau e programa tusadilanga ya kimvuka kieto ye tulendanga soneka nkanda mi’ampofo muna ndinga zayingi zivovuanga ova nza. Ngina ye ziku vo ke vena ye programa yankaka ko ilenda fwanana ye programa yayi ya kimvuka kieto.”

 Muna nkanda mia ampofo divavanga vo e fwaniswa yasasilwa. Muna bonga e nona, e fwaniswa kina vana fuku kia nkanda Zinga ye Kiese Yakwele Mvu! muna sono y’ampofo, mpil’eyi kisasilwanga: “Yakala okangalanga muna nzila ya nlelo yaviokela muna nzanza miambote-mbote, muna kundubulu ye miongo.” Jamshed, una vo mpofo, selo kia salu ye mviti a nzila, wavova vo: “E mpila yasasilwa e fwaniswa kiaki yamfunu kikilu kwa mono.”

 Avo nkanda umene sonekwa, utwikwanga muna mavula malenda wo sekola muna sinsu y’ampofo. Muna mavula mama, e sinsu inietekwanga muna papele zabala, e sinsu muna papela zazi ke ilendi fwasuka ko muna ntangw’a nieteka ngatu vava ikala sadilwa. I bosi, makaya mawonso mebundakeswanga se nkanda yo twikwa muna nkutakani yovo se lukau kwa ampofo kele vo e kompani diatwikila nkanda salu kiaki disalanga. Avo divuilu o mfunu, e mavula mevanganga e nkubika ya twika mu nzaki e nkanda besadila ampofo muna tukutakanu.

 Ntangwa ye nzimbu zayingi zivavuanga muna sala e salu kiaki. Ozevo, e ola zivavuanga mu nieteka 50.000 ma Bibila muna masini meto ma nietekena e nkanda kuna Wallkll, Nova York, i ola mpe zivavuanga muna nieteka Bibila zola kaka z’ampofo. Mabuku 25 mekalanga muna konso Bibila kia grau ya nzole muna Kingelezo. E salanganu ivavuanga muna nieteka mabuku mama iviokele nkumbu 123 muna ntalu a nzimbu zivavuanga muna nieteka Bibila kimosi kia ndinga zivovuanga. a E fukwa ya mabuku 25 tezo kia 150 ma dolar ifwanga.

 Awana bevananga moko mu nieteka nkanda mia sinsu ya ampofo aweyi bemonanga mu kuma kia salu kiau? Nadia, ona osadilanga kuna Vula dia África do Sul wavova vo: “E zingu kia mpangi zeto zamakala ye zamakento bena vo ampofo yovo awana ke betoma monanga ko, kiampasi kikilu. Muna diadi, kwa mono i nsambu kikilu mu vana moko muna vanga e lekwa kilenda kubasadisa. Ekiaki i ziku kisonganga vo Yave otoma kubazolanga.”

 Kansi, adieyi tuvova avo o mpofo kazeye tanga nkanda mi’ampofo ko? Muna mvu miavioka, twavaikisa o nkanda Longoka Tanga Nkanda mia Ampofo, muna nkanda wau muna ye sono ya ampofo ye sono ya wantu bemonanga. Wakubikwa mu kuma kia ampofo ye awana ke betoma monanga ko. Nkanda wau usadilwanga kumosi ye salanganu ilenda sadisa ampofo mu soneka. Awana belongokanga e sono ya ampofo besadilaanga e salanganu yayi mu soka e sono ya yau kibeni. Ovutukilanga e sono yayi nkumbu miayingi disadisanga o nlongoki mu sungamena yo bakula yo muna babata kaka.

 Aweyi ampangi ana bena vo mpofo ye awana ke betoma monanga ko bebakilanga e nluta mu nkanda miami? Ernst, ozingilanga kuna Haiti wayendenga muna tukutakanu, kansi kakala ye nkanda mia ampofo ko. Muna kuma kiaki, muna fila malongi yo vana e mvutu muna tukutakanu, diavavanga vo katoma sungamenanga e mambu. Wavova vo: “Owau ndenda zangula o koko yo vana mvutu konso ntangwa. Owau imonanga vo ntwadi ngina ye mpangi zame. Yeto awonso tutambulanga madia mau mamosi ma kimwanda. ”

 Jan una vo nkuluntu kuna Australia, ona ke toma monanga ko ye ofilanga e longi dia Eyingidilu ye Longi dia Bibila dia nkutakani wavova vo: “Nkanda mieto miatoma kiá ke mu nkanda miakaka mia ampofo ko mina yatanga kala. Muna bonga e nona, e makaya mena ye lutangu, diasazu mu solola e mvovo vana yand’a lukaya ye masono metoma sasilanga e mafoto.”

 Seon-ok, wa mviti a nzila kuna Korea do Sul mpofo ye wafwa matu. Muna mvu miavioka, muna landa malongi ma tukutakanu diavavanga vo kasimba o koko kwa muntu, kansi owau otanganga e Bibila muna sono ya ampofo yo kala ye longi dia yandi kibeni. Seon-ok wavova vo: “Diampasi dikalanga mu tanga nkanda miankaka mia ampofo, kadi e sinsu yandi nzaki ilalanga, e papela besadilanga mpe zatoma leboka. ”Kansi Mbangi za Yave papela zambote besadilanga, e sinsu yau mpe yamfinga, muna diadi ke dikalanga diampasi ko kwa mono muna mio tanga. Muna mvu miavioka, mu lusadisu lwa wantu ankaka yalongokelanga e nkanda misasilanga e Bibila. Kansi owau, ndenda longoka mono kibeni. Kiese dikumpananga mu kubika malongi ma tukutakanu twa kati kwa lumingu yo vananga e mvutu una ufwene. Yatanga nkanda mieto miawonso muna sono y’ampofo. Nanga olenda vova vo ‘yakituka se mbundu’ a tanga e nkanda miami.”

 Muna nkanda mieto, kumosi ye nkanda miampofo mukalanga ye mvovo emi: “E nkanda wau ke wateka ko. Wakubikwa mu longa wantu Nkand’a Nzambi mu nza yawonso. E salu kiaki mu tukau twamvevo kisadilwanga.” Tuvutwidi matondo muna tukau tweno nuvananga muna sadila e ndekwa ziyikwanga muna nzil’eto donate.pr418.com. E fu kieno kiavanina kuna mvevo kisadisanga mu kubika madia mama mawonso ma mwanda, kumosi ye madia mampofo ye awana ke betoma monanga ko.