Akengi a Zunga—Asadi Y’akwau Muna Ludi

Muna nkutakani ya Akristu ya tandu kiantete mwakala akengi a zunga bakingulang’e nkutakani muna kubasikidisa. Bayivananga yau kibeni, ke mu vava nluta ko, mu sadisa e yikwa ya nkutakani mu nungunuka yo kangala una ufwene kwa Nzambi.—Mavangu 11:23, 24; 14:21, 22; 15:32; 20:2, 31-35; Filipi 2:20-22, 29; 1 Tesalonika 2:5-12.

O unu mpe, e nkutakani za Mbangi za Yave betambulang’e nluta mia kingulwa kw’akengi a zunga. Wantu awaya asadi a mvu miayingi bena ye ngangu zafwana za salu kia Mbangi za Yave kia samun’e nsangu y’eki kia kinkengi. Bayambwidi mpe o sala e salu yau ya moko, ye yaka salu ya nzo zau, muna kuyivana mu salu kia uselo wa ntangwa ke ntangwa. Awana basompa, o nkento osalanga mpe entwadi yo yakala muna salu kiaki kia uselo kia ntangwa ke ntangwa.

O nkengi a zunga ovwidi salu kia kingulang’e zunga kimosi kin’e tezo kia 18 yaku 25 ma nkutakani. Konso nkutakani muna zunga okingulanga yo tezo kia nkumbu miole muna mvu, i bosi, vioka mvu miole yovo mintatu ofilwanga ku zunga kiakaka. Muna mpila yayi, e nkutakani zilenda bak’e nluta mia ntona ye ngangu z’akengi a zunga aswaswana.

O nkengi a zunga ofimpanga e nkal’a kimwanda ya nkutakani ye salu kiandi. Ovananga malongi mayingi muna nkutakani yo kutakana mpe kumosi y’akuluntu ye selo, muna fimpa una balenda tomesena e salu kiau muna nkutakani.

Muna lumingu lolo, tuka yandi yo nkaz’andi, avo wasompa, bevaikanga kumosi ye Mbangi za Yave za fulu kiakina, muna kubasadisa mu tomesa e salu kiau kia uselo wa nzo ke nzo. Oyandi yo nkaz’andi bekingulanga mpe o wantu akwa luzolo, mu kasakesa o lukwikilu lwau. Ongeye mpe olenda lomba kinumana wakingulwa.

O nkengi a mvivu ovwidi zayi wa kimwanda ye ntona zau azimosi. Ozietanga zunga muna zunga, ovangang’e nkubika za salu konso lumingu eki kia tukutakanu twa zunga. Oyandi yo nkaz’andi  besalanga mpe e salu kia teleka e nsangu kumosi ye Mbangi za nkutakani muna zunga kina kekingula. Oludikang’e nkubika za nsuka za lukutakanu lwa zunga yo vana malongi ma mpila mu mpila, kumosi y’elongi kuna kw’awonso.

Avo bafokwele kingula e nkutakani yovo zunga, bekwendanga mu kingula diaka nkutakani yovo zunga kiakaka, yo land’e nkubika yau ayimosi, yavana e nkutakani zawonso yovo zunga yimana kingulwa muna tezo kia ngonde sambanu; i bosi beyantikanga diaka.

Muna nsi zayingi, akengi a zunga mu makalu bekangalelanga yovo mu makalu ma nkangu a nsi. Muna zak’e nsi mu mvelo bekangalelanga yovo mpe mu malu. E Sociedade ofutang’e nzimbu za nkangalu wa nkengi a zunga, yo kubavutulwil’e finzimbu fiasumbila konso kina bavwidi o mfunu kumosi yo nkaz’andi. Nkumbu miayingi, e yikwa ya konso nkutakani bekubikang’e fulu kia leka yo madia mu kuma kia nkengi a zunga yo nkaz’andi.

E salu kiaki mwanda amvevo kivavanga. Akengi a zunga y’akazi au bakubama mu sala e salu kiau muna nkutakani lembi kala s’ezitu vana bena.—1 Tesalonika 2:9.

• Akengi a zunga nkia mfunu bakala muna nkutakani ya Akristu ya tandu kiantete?

• Aweyi akengi a zunga bakitukidi o unu se wantu afwana mu sala e salu kia uselo?

• Samun’e salu kivangwanga kwa akengi a zunga y’akengi a mvivu, ye aweyi bezingilanga.

[Foto muna lukaya 20]

Nkengi mosi a mvivu olonganga muna lukutakanu lwa zunga

[Mafoto zina muna lukaya 21]

Akengi a zunga belonganga owu wa sadil’e salu kia nzo ke nzo, bemokanga y’akuluntu a nkutakani, bekingulang’o wantu aya belongokang’o Nkand’a Nzambi, yo van’o malongi muna nkutakani