Bebangikwanga mu Kuma kia Unsongi

Nanga wa wa kala akundi yovo yitu bevovanga vo a Mbangi za Yave bekuyisianga muna mpasi mu kuma kia nsiku, yovo basiwa nsiku kwa tuyalu twakaka yovo e kuma oku vo wantu ambi. Nga nkia diambu kikilu beyikilwang’e mbi?

Ke mu diambu dia sia ko vo a Mbangi nsiku bekululanga, kansi e kuma kadi mbandu a Yesu belandanga. O Yesu wavova kwa alongoki andi vo o wantu bekubatumba, yo kubabangika, yo kubayikila bi wawonso kuna luvunu. Edi bebangikilwanga i diadi e kuma kadi o Satana wa ntantu antete a Nzambi, i nzambi a nza yayi, oyandi ozolele sima o wantu balembi sadila Nzambi.—Matai 5:10-12; 10:16-22, 34-39; 24:9, 10; Yoane 15:17–16:3; 2 Timoteo 3:12; 1 Petelo 5:8; Lusengomono 12:17.

Vava a ntumwa basiwa muna pelezo yo natwa vana mbazi ankanu, ke mu kuma kia sia ko vo dia nkanu bavanga, yovo akwa nkindu yovo avondi a wantu. Kansi mu kuma kia nsangu zambote basamunanga. Vav’o Paulu wa ntumwa kalomba vo kafundisilwa muna nzo yafundila nkanu, i mu kuma kia tanina yo sikidis’e salu ki’Akristu kia samuna e nsangu zambote.—Mavangu 4:18-20; 5:28-32; Filipi 1:7.

Omu tandu kiaki, a Mbangi za Yave Akristu, ana betumamang’e nsiku, befutang’e mpaku yo lemvokela akwa wisa. Bevananga kwa Kaisa ina ya Kaisa, kuna kwa Nzambi ina ya Nzambi. Avo vabwidi e ntantani yo konso luyalu, i sia vo o luyalu lolo kazolele kubayambulwila ko basala e salu kiau kia samun’e nsangu, yovo i mu diambu dia nkal’au yalembi kuyisia muna mambu ma nza. Kansi, muna diambu diadi, a Mbangi za Yave bafwete landa e mbandu ya ntumwa, ana bavova vo: “Twalemvokela Nzambi [nze nyadi, NW] ke mu wantu ko.”—Mavangu 5:29; Maku 12:17; Yoane 18:36; Tito 3:1, 2.

A Mbangi za Yave ke bevavanga bangikwa ko, kansi, zingu kia luvuvamu yo lembama bezolanga. Kansi kadi, vava bebangikwanga muna kuma kia land’o nsiku a Nzambi ye mbandu a Yesu Kristu, beyangalalanga mu zizidila lo.—Matai 5:10-12; Mavangu 5:40, 41; 1 Korinto 4:12; 1 Timoteo 2:2; 1 Petelo 3:14, 15; 4:12-16.

• Ekuma aselo ya Yave besaulwilwanga yo bangikwa?

• Ezak’e ntangwa ekuma a Mbangi za Yave bekadilanga ye ntantani y’akwa wisa, nze una wavangama kw’alongoki Akristu?

• Aselo ya Yave aweyi bebadikilang’o lubangamu?

[Mafoto zina muna lukaya 29]

Yesu wanatwa kuna kwa Pilato ye Paulu wa ntumwa wa siwa muna peleso mu kuma kia samuna e Kintinu kia Nzambi