Ekani dia Nzambi Se Dilungana

Vav’o Nzambi kasem’o ntoto ekani diandi diakala vo, wazingilwa kwa wantu a kiese muna nkal’a unsongi. Muna lenda vo zingila, o wantu bafwete lemvokela e nsiku mia Nzambi, kansi o yakala yo nkento antete bakolama, i nkituka bakituka s’asumuki, batumbwa e tumbu kia fwa. Ediadi diatwas’esumu yo lufwa kwa mbongo au yawonso.—Etuku 1:27, 28; 2:16, 17; 3:1-19; Roma 5:12.

O Nzambi, oyu una ye nkumbu a Yave, wabak’e nzengo za sukisa mawonso matwaswa kwa ukolami y’esumu ova ntoto. Oku kwayiziwa, watal’ova nza yo mona vana kati kwa wantu muntu mosi wa kwikizi, i Abarama, oyu Kasob’e nkumbu vo Abarayama. Nzambi wasil’o nsilu kwa Abarayama vo e mbongo andi ikituka se zula kiayingi, oku vo okumvana mbongo ina vo o makanda mawonso ma nza i mesambulwilwa.—Etuku 12:1-3; 18:18, 19; 22:18; Nkunga 83:18; Ayibere 11:8-16.

Lukufi ye mbaninu a tandu kia 16 dia nkama za mvu VTK, (Vitila Tandu Kieto) e mbongo a Yakobo wa ntekolo a Abarayama, yakituka se makanda 12, bazingilanga muna ubundu kuna Engipito. O Yave wakûla Aneyisaele awaya tuka muna Engipito yo kubakitula se zula. Muna Mose, wabavana e Nsiku muna Mongo a Sinai, se lusikidisu lwa nkangu. Yave wakala se Ntinu au, Mfundisi au ye Munsi’a nsiku miau. E zula kia Isaele kiakituka se nkangu asolwa a Nzambi, mbangi zandi, bakubikwa mu lunganes’ekani Diandi. Muna yau kadi kwizila o Masia, ona wadi tongeka e kintinu kiakwele mvu mu kuma kia wete dia wantu a zula yawonso.—Luvaiku 19:5, 6; 1 Tusansu 17:7-14; 1 Ntinu 4:20, 25; Yesaya 33:22; 43:10-12; Roma 9:4, 5.

Una vavioka 15 dia nkama za mvu, i sia vo se tezo kia 2.000 ma mvu, Nzambi wafila Mwan’andi amosi tuka kun’ezulu keza ova ntoto, kawutuka kwa Maria wa ndumb’a mwenze a mwisi Yuda. Wayikilwanga vo Yesu i yandi ovingil’e Kintinu kin’o Nzambi kasil’o nsilu kwa nkulu andi Davidi. Muna kimbuta kia mvu 30, Yesu wavubwa kwa Yoane wa Mvubi, wayantik’o samun’e Kintinu kia Nzambi. Wau kawukang’e mbevo, wasonga owu e Kintinu kiaki kisinga  sambulwil’o wantu. Muna yingana, wasasila edi divavwanga kw’awana bazolele o moyo a mvu ya mvu. I bosi, o Yesu wavondwa vana nti, o moyo andi wa muntu alunga wakituka se lukulu lwa wantu.—Matai 1:18-24; 3:13-16; 4:17-23; 6:9, 10; kapu kia 13; 20:28; Luka 1:26-37; 2:14; 4:43, 44; 8:1; Yoane 3:16; Mavangu 10:37-39.

Yesu wasonga vo e Kintinu kia Masia ku ntwala kikilu kisinga tongekelwa, kuna mbaninu a tandu kiaki. Muna kolo kiakina, okala se Ntinu olembi moneka oyalanga kun’ezulu, osongela e nkal’andi muna fil’e ngindu zandi ova ntoto. Oma mevangamang’omu nza yawonso mesonganga vo mu kolo kiokio se tuzingilanga tuka muna mvu wa 1914. E nsangu zambote za Kintinu zisamunwanga muna nza yawonso, muna umbangi kwa zula yawonso, nze i una kayik’o Yesu. Muna kuma kiaki, wantu a zula yawonso mu lungalakeswa se bena kuna sambu dia Kintinu kia Nzambi. Oyau i besala yo moyo muna mbaninu a tandu kiaki yo vwil’o moyo a mvu ya mvu ova ntoto, muna Kintinu kia Masia.—Matai, kapu kia 24 ye 25; Lusengomono 7:9-17.

O unu mabundu mayingi beyikanga vo luzolo lwa Nzambi bevanganga. Kansi, aweyi tulenda zayil’e nkutakani yakieleka ya Akristu? Muna fimpa e Sono kinumana twazaya owu wakal’e nkutakani ya Akristu ya tandu kiantete twamona ekana vo nani olandang’e mbandu yayina.

• O Abarayama yo Isaele aweyi bakadila se nonga-nonga muna ndungan’ekani dia Nzambi?

• Adieyi kavang’o Yesu muna uselo yo lufwa luandi?

• Nkia mambu masakulwa mafwete lungana omu tandu kieto?